ਮੌਸਮ

ਆਰਸੀ ਤੇ ਨਵੀਆਂ ਰਚਨਾਵਾਂ

ਦੋਸਤੋ! ਜਿਵੇਂ ਕਿ ਤੁਸੀਂ ਜਾਣਦੇ ਹੀ ਹੋ ਕਿ ਆਰਸੀ ਨੂੰ Facebook ਅਤੇ Twitter ਨਾਲ਼ ਵੀ ਜੋੜ ਦਿੱਤਾ ਗਿਆ ਹੈ। ਜੇਕਰ ਤੁਹਾਡੇ ਕੋਲ਼ ਇਹਨਾਂ ਸਾਈਟਾਂ ਤੇ ਅਕਾਊਂਟ ਹਨ, ਤਾਂ ਤੁਸੀਂ ਆਰਸੀ ਬਲੌਗ ਨੂੰ ਓਥੋਂ ਵੀ join ਅਤੇ follow ਕਰ ਸਕਦੇ ਹੋ। ਲਿੰਕ ਹੇਠਾਂ ਦਿੱਤੇ ਜਾ ਰਹੇ ਹਨ। ਹੁਣ ਤੱਕ ਤੁਹਾਡੇ ਦਿੱਤੇ ਹਰ ਸਹਿਯੋਗ ਲਈ ਮਸ਼ਕੂਰ ਹਾਂ।
ਅਦਬ ਸਹਿਤ
ਤਨਦੀਪ ਤਮੰਨਾ



Tuesday, November 17, 2009

ਪ੍ਰਿੰ: ਤਖ਼ਤ ਸਿੰਘ - ਗ਼ਜ਼ਲ

ਗ਼ਜ਼ਲ

ਨਿਰਾ ਪੁਰਾ ਸਾਂ ਮੈਂ ਜਦ ਕਾਲ਼ ਕੋਠੜੀ ਵਰਗਾ।

ਕਿਸੇ ਦਾ ਧਿਆਨ ਸੀ ਦੀਵੇ ਦੀ ਰੌਸ਼ਨੀ ਵਰਗਾ।

-----

ਪਤਾ ਨਹੀਂ ਕਿ ਸੀ ਕਿੰਨੀ ਕੁ ਵਿਹੁ ਹਨੇਰੀ ਵਿਚ,

ਸਰੀਰ ਬਿਰਛ ਦਾ ਡਿੱਠਾ ਮੈਂ ਛਾਨਣੀ ਵਰਗਾ।

-----

ਸਜਾ ਸਕਾਂਗਾ ਕਿਵੇਂ ਸੋਚ ਦੀ ਕਲਾ-ਸ਼ਾਲਾ,

ਕਿ ਦਿਲ ਹੈ ਉਡਦਿਆਂ ਰੰਗਾਂ ਦੀ ਪੋਟਲੀ ਵਰਗਾ।

-----

ਜੇ ਜ਼ਹਿਰ ਜ਼ਹਿਰ ਸੀ ਦਿਲ, ਸ਼ਹਿਦ ਸ਼ਹਿਦ ਸਨ ਗੱਲਾਂ,

ਅਜੀਬ ਨਾਗ ਸੀ, ਸਚ ਮੁਚ ਹੀ ਆਦਮੀ ਵਰਗਾ।

-----

ਉਦਾਸ ਜਿੰਦ, ਜਿਵੇਂ ਝੀਲ ਸੀ ਹਨੇਰੇ ਦੀ,

ਚੁਫ਼ੇਰੇ ਆਸ ਦਾ ਕੰਢਾ ਸੀ ਚਾਨਣੀ ਵਰਗਾ।

-----

ਲੁਕੇ ਨਾ ਹੋਣ ਕਿਤੇ ਤਕਣੀਆਂ ਚ ਚੰਗਿਆੜੇ,

ਸਰੀਰ ਸਾਂਭ ਕੇ ਟੁਰ ਮੋਮ ਦੀ ਡਲੀ ਵਰਗਾ।

-----

ਉਦ੍ਹਾ ਬਦਨ ਸੀ ਕਿ ਭੰਡਾਰ ਸੀ ਸੁਗੰਧਾਂ ਦਾ,

ਕਿ ਅੰਗ ਅੰਗ ਸੀ ਸਜਰੀ ਖਿੜੀ ਕਲੀ ਵਰਗਾ।

-----

ਕਿਸੇ ਦੀ ਗੋਦ ਚ ਝੂਟੇ ਲਏ ਮੈਂ ਸੁਰਗਾਂ ਦੇ,

ਕਿਸੇ ਦਾ ਪਿਆਰ ਸੀ ਫੁੱਲਾਂ ਦੀ ਪਾਲਕੀ ਵਰਗਾ।

-----

ਨਜ਼ਰ ਦੀ ਘਾਟ ਸੀ ਜਾਂ ਤ੍ਰੇੜ ਤ੍ਰੇੜ ਸੀ ਸ਼ੀਸ਼ਾ,

ਮੈਂ ਅਪਣੇ ਆਪ ਨੂੰ ਲਗਿਆ ਸਾਂ ਅਜਨਬੀ ਵਰਗਾ।

No comments: