ਮੌਸਮ

ਆਰਸੀ ਤੇ ਨਵੀਆਂ ਰਚਨਾਵਾਂ

ਦੋਸਤੋ! ਜਿਵੇਂ ਕਿ ਤੁਸੀਂ ਜਾਣਦੇ ਹੀ ਹੋ ਕਿ ਆਰਸੀ ਨੂੰ Facebook ਅਤੇ Twitter ਨਾਲ਼ ਵੀ ਜੋੜ ਦਿੱਤਾ ਗਿਆ ਹੈ। ਜੇਕਰ ਤੁਹਾਡੇ ਕੋਲ਼ ਇਹਨਾਂ ਸਾਈਟਾਂ ਤੇ ਅਕਾਊਂਟ ਹਨ, ਤਾਂ ਤੁਸੀਂ ਆਰਸੀ ਬਲੌਗ ਨੂੰ ਓਥੋਂ ਵੀ join ਅਤੇ follow ਕਰ ਸਕਦੇ ਹੋ। ਲਿੰਕ ਹੇਠਾਂ ਦਿੱਤੇ ਜਾ ਰਹੇ ਹਨ। ਹੁਣ ਤੱਕ ਤੁਹਾਡੇ ਦਿੱਤੇ ਹਰ ਸਹਿਯੋਗ ਲਈ ਮਸ਼ਕੂਰ ਹਾਂ।
ਅਦਬ ਸਹਿਤ
ਤਨਦੀਪ ਤਮੰਨਾ



Tuesday, January 31, 2012

ਕਮਲ ਦੇਵ ਪਾਲ – ਆਰਸੀ ‘ਤੇ ਖ਼ੁਸ਼ਆਮਦੀਦ – ਗ਼ਜ਼ਲ

ਆਰਸੀ ਤੇ ਖ਼ੁਸ਼ਆਮਦੀਦ

ਸਾਹਿਤਕ ਨਾਮ: ਕਮਲ ਦੇਵ ਪਾਲ


ਅਜੋਕਾ ਨਿਵਾਸ: ਕੈਲੇਫੋਰਨੀਆ, ਯੂ.ਐੱਸ.ਏ.


ਪ੍ਰਕਾਸ਼ਿਤ ਕਿਤਾਬਾਂ: ਇਕ ਗ਼ਜ਼ਲ ਅਤੇ ਇਕ ਕਾਵਿ ਸੰਗ੍ਰਹਿ ਪ੍ਰਕਾਸ਼ਨ ਅਧੀਨ ਹਨ।


----


ਦੋਸਤੋ! ਕੈਲੇਫੋਰਨੀਆ, ਯੂ.ਐੱਸ.ਏ. ਵਸਦੇ ਸ਼ਾਇਰ ਕਮਲ ਦੇਵ ਪਾਲ ਜੀ ਨੇ ਚੰਦ ਬੇਹੱਦ ਖ਼ੂਬਸੂਰਤ ਗ਼ਜ਼ਲਾਂ ਘੱਲ ਕੇ ਆਰਸੀ ਪਰਿਵਾਰ ਨਾਲ਼ ਪਲੇਠੀ ਸਾਹਿਤਕ ਸਾਂਝ ਪਾਈ ਹੈ। ਉਹਨਾਂ ਦੀ ਹਾਜ਼ਰੀ ਆਰਸੀ ਦਾ ਸੁਭਾਗ ਹੈ। ਉਹਨਾਂ ਨਾਲ਼ ਮੇਰਾ ਸੰਪਰਕ ਕੋਈ ਛੇ ਕੁ ਮਹੀਨੇ ਪਹਿਲਾਂ ਫੇਸਬੁੱਕ ਰਾਹੀਂ ਹੋਇਆ ਸੀ। ਮੈਂ ਬਲੌਗ ਨਾਲ਼ ਜੁੜੇ ਦੋਸਤਾਂ ਨੂੰ ਇਹ ਦੱਸਣਾ ਵੀ ਜ਼ਰੂਰੀ ਸਮਝਦੀ ਹਾਂ ਕਿ ਪਾਲ ਸਾਹਿਬ ਹੁਣ ਫੇਸਬੁੱਕ ਤੇ ਚਲਦੇ ਆਰਸੀ ਸਾਹਿਤਕ ਕਲੱਬ ਦੇ ਉਹ ਕੋ-ਐਡਮਿਨ ਵੀ ਹਨ।
...........
......ਕਮਲ ਪਾਲ ਉਹਨਾਂ ਗ਼ਜ਼ਲਗੋਆਂ ਵਿੱਚੋਂ ਹੈ ਜਿਨਾਂ ਨੇ ਪੰਜਾਬੀ ਗ਼ਜ਼ਲ ਦਾ ਮੂੰਹ ਮੱਥਾ ਸੰਵਾਰਨ ਵਿੱਚ ਆਪਣਾ ਅਹਿਮ ਯੋਗਦਾਨ ਪਾਇਆ ਹੈ.... ਜਦ ਪੰਜਾਬ ਵਿਚ ਗ਼ਜ਼ਲ ਲਹਿਰ ਸਿਖ਼ਰ ਤੇ ਸੀ ਤਾਂ ਉਸਦੇ ਮੋਹਰੀਆਂ ਵਿੱਚ ਗਿਣਿਆ ਜਾਣ ਵਾਲਾ ਨਾਮ ਹੈ ਕਮਲ ਪਾਲ ....ਗ਼ਜ਼ਲ ਦੇ ਪ੍ਰੰਪਰਿਕ ਮਾਪਦੰਡਾਂ ਤੇ ਪਹਿਰਾ ਦੇਣ ਦੇ ਹਾਮੀ ਹਨ ਤੇ ਖ਼ਿਆਲਾਂ ਦੀ ਜਦੀਦੀਅਤ ਅਤੇ ਪੁਖ਼ਤਗੀ ਦੇ ਕਾਇਲ ਨੇ ਕਮਲ ਪਾਲ।।ਗ਼ਜ਼ਲ ਦੇ ਹਰ ਪੱਖ ਤੇ ਅਬੂਰ ਹਾਸਿਲ ਹੈ...ਇਕ ਉਸਤਾਦ ਗ਼ਜ਼ਲਗੋ ਹੋਣ ਦੇ ਬਾਵਜੂਦ ਆਜ਼ਾਦ ਨਜ਼ਮ ਕਹਿਣ ਦਾ ਇੱਕ ਵੱਖਰਾ ਹੀ ਢੰਗ ਹੈਉਹਨਾਂ ਦੀਆਂ ਕਵਿਤਾਵਾਂ ਅਜੋਕੀ ਕਵਿਤਾ ਨਾਲੋ ਇੱਕ ਅਲੱਗ ਮੁਹਾਂਦਰਾ ਰੱਖਦੀਆਂ ਨੇ... ਇਕ ਬਹੁਤ ਹੀ ਵਿਲੱਖਣ ਵਿਚਾਰਧਾਰਾ ਨਾਲ ਜੁੜੀ ਹੋਈ ਅਦਬੀ ਹਸਤੀ ਹੈ ਕਮਲ ਪਾਲ....---- ਅਮਰੀਕ ਗ਼ਾਫ਼ਿਲ।


...........
ਪਾਲ ਸਾਹਿਬ
ਨੂੰ ਆਰਸੀ ਪਰਿਵਾਰ ਚ ਖ਼ੁਸ਼ਆਮਦੀਦ ਆਖਦਿਆਂ, ਇਹਨਾਂ ਗ਼ਜ਼ਲਾਂ ਨੂੰ ਅੱਜ ਦੀ ਪੋਸਟ ਚ ਸ਼ਾਮਿਲ ਕਰਨ ਦਾ ਮਾਣ ਹਾਸਲ ਕਰ ਰਹੀ ਹਾਂ। ਆਸ ਹੈ ਕਿ ਉਹ ਭਵਿੱਖ ਵਿਚ ਵੀ ਆਪਣੀਆਂ ਲਿਖਤਾਂ ਨਾਲ਼ ਹਾਜ਼ਰੀ ਲਵਾਉਂਦੇ ਅਤੇ ਧੰਨਵਾਦੀ ਬਣਾਉਂਦੇ ਰਹਿਣਗੇ। ਉਹਨਾਂ ਦਾ ਬੇਹੱਦ ਸ਼ੁਕਰੀਆ।


ਅਦਬ ਸਹਿਤ


ਤਨਦੀਪ ਤਮੰਨਾ


*****


ਗ਼ਜ਼ਲ


ਇਸ ਜ਼ਿੱਲਤ 'ਚੋਂ ਨਿਕਲਣ ਦਾ ਜੇਕਰ ਕਰਦੇ ਪਰਿਆਸ ।


ਅਪਣੇ ਘਰ ਵਿਚ ਏਸ ਤਰਾਂ ਨਾ ਕਟਦੇ ਕਾਰਾਵਾਸ।



ਰੋਜ਼ ਨਜ਼ਰਬੰਦੀ ਦੇ ਤੇਵਰ ਲੈ ਕੇ ਆਉਂਦੀ ਸ਼ਾਮ ,


ਚੰਗਾ ਹੁੰਦਾ ਜੇਕਰ ਸਾਨੂੰ ਮਿਲ ਜਾਂਦਾ ਬਨਵਾਸ।



ਜਿੰਨੀ ਵਾਰੀ ਛੂਹ ਛੂਹ ਦੇਖੇ ਹਨ ਤਿਤਲੀ ਦੇ ਰੰਗ ,


ਓਨੀ ਵਾਰੀ ਕੁਝ ਗੁੰਮਣ ਦਾ ਹੋਇਆ ਹੈ ਅਹਿਸਾਸ।



ਹੋਰ ਵੀ ਅਪਣਾ ਅਪਣਾ ਲੱਗਣ ਲਗਿਆ ਅਪਣਾ ਪਿੰਡ ,


ਅਪਣੇ ਪਿੰਡੋਂ ਜਿਸ ਦਿਨ ਤੋਂ ਹਾਂ ਕਰ ਆਏ ਪਰਵਾਸ।



ਪੂਰੇ ਸ਼ਹਿਰ 'ਚ ਚਰਚਾ ਹੈ ਇਹ ਜੋ ਬੰਦਾ ਸੀ ਆਮ ,


ਤੇਰੇ ਨਾਲ ਬਿਤਾ ਕੇ ਕੁਝ ਪਲ ਹੋ ਚਲਿਆ ਹੈ ਖ਼ਾਸ।



ਪਾਣੀ ਦੇ ਵਿਚ ਖੁਲ੍ਹ ਚੁੱਕੀ ਹੈ ਇਕ ਤੂੜੀ ਦੀ ਪੰਡ ,


ਤਾਂ ਹੀ ਉਲ਼ਝ ਰਹੇ ਨੇ ਰਿਸ਼ਤੇ ਤਿੜਕ ਰਹੇ ਵਿਸ਼ਵਾਸ।



ਦਾਣਾ ਦਾਣਾ ਚੁਗਦੇ ਪੰਛੀ ਇੱਕ ਸ਼ਿਕਾਰੀ ਦੇਖ ,


ਖੰਭਾਂ ਨਾਲ਼ ਉਡਾ ਕੇ ਲੈ ਗਏ ਅਪਣੀ ਅਪਣੀ ਆਸ।



ਖੂਨ ਜਿਗਰ ਦਾ ਦੇਵੋ ਇਸ ਨੂੰ ਤੇ ਸੋਚਾਂ ਦੀ ਪਾਣ ,


ਸ਼ਾਇਰੀ ਦੇ ਵਿਚ ਕੁਝ ਕੁਝ ਕਰਨਾ ਪੈਂਦਾ ਹੈ ਅਭਿਆਸ।



ਆਪੇ ਰੱਜੀ ਧਾਈ ਜਿਸਦੇ ਆਪੇ ਬੱਚੇ ਜੀਣ ,


ਉਸ ਮਹਿਫ਼ਲ ਨੂੰ 'ਪਾਲ' ਕਦੇ ਵੀ ਆ ਸਕਦਾ ਨਾ ਰਾਸ।


======


ਗ਼ਜ਼ਲ


ਆਪ ਇਹ ਕੀ ਕਰ ਗਏ ਹੋ ਇੱਕ ਹੀ ਨਖ਼ਰੇ ਦੇ ਨਾਲ਼।


ਆਪ ਦੀ ਚਰਚਾ ਸ਼ੁਰੂ ਉਹ ਕਰ ਦਏ ਮਤਲੇ ਦੇ ਨਾਲ਼।



ਰਾਂਗਲੇ ਪਲ ਸ਼ੋਖੀਆਂ ਕਿਉਂ ਜਾਗਿਆ ਤਾਂ ਉਡ ਗਏ ,


ਜਾਗ ਕੇ ਨਿਤ ਲੜ ਪਵਾਂ ਮੈਂ ਆਪਣੇ ਸੁਪਨੇ ਦੇ ਨਾਲ਼।



ਚਿਕ ਦੇ ਪਿੱਛੋਂ ਝਾਕ ਕੇ ਕੁਝ ਆਖ ਜਾਂਦੇ ਹੋ ਤੁਸੀਂ ,


ਇਸ ਤਰਾਂ ਵੀ ਪੇਸ਼ ਨਾ ਆਇਆ ਕਰੋ ਪਰਦੇ ਦੇ ਨਾਲ਼।



ਇਸ਼ਕ਼ ਹੈ ਤਲਵਾਰ ਦੀ ਜੇ ਧਾਰ ਤੋਂ ਵੀ ਖ਼ਤਰਨਾਕ ,


ਸਿਖ ਲਿਆ ਹੈ ਹੁਣ ਅਸੀਂ ਵੀ ਜੂਝਣਾ ਖ਼ਤਰੇ ਦੇ ਨਾਲ਼।



ਆਪ ਜੀਓ ਦੂਜਿਆਂ ਨੂੰ ਜੀਣ ਦਾ ਮੌਕਾ ਦਿਓ ,


ਜੀਣ ਦਾ ਆਇਆ ਸਲੀਕਾ ਪਰ ਬੜੇ ਅਰਸੇ ਦੇ ਨਾਲ਼।



ਕੱਲ੍ਹ ਤੋਂ ਸੱਚੀਂ ਤੁਹਾਨੂੰ ਭੁੱਲ ਜਾਣਾ ਹੈ ਅਸੀਂ ,


ਕੱਲ੍ਹ ਤੋਂ ਫਿਰ ਯਾਦ ਆਵੋਗੇ ਤੁਸੀਂ ਭੁਲਣੇ ਦੇ ਨਾਲ਼।



ਆ ਕੇ ਉਹ ਇਕਰਾਰ ਉੱਤੇ ਜਾਣ ਦੀ ਕਰਦੇ ਰਹੇ ,


ਪਿਆਰ ਵਿਚ ਵੀ ਪੇਸ਼ ਉਹ ਆਉਂਦੇ ਰਹੇ ਸਰਫੇ ਦੇ ਨਾਲ਼।



ਸੁਕ ਗਈ ਤਾਂ ਰੇਤ ਹੀ ਰਹਿ ਜਾਏਗੀ ਇਸਦੀ ਸਜ਼ਾ ,


ਬੇ-ਵਜ੍ਹਾ ਹੀ ਰੁਸ ਗਈ ਹੈ ਇਹ ਨਦੀ ਚਸ਼ਮੇ ਦੇ ਨਾਲ਼।



ਪਿਆਸ ਕਿੰਨੀ 'ਪਾਲ' ਨੂੰ ਹੈ ਲਾ ਨਾ ਅੰਦਾਜ਼ਾ ਮਹਿਜ਼ ,


ਉਹ ਗੁਜ਼ਾਰਾ ਕਰ ਲਵੇਗਾ ਇੱਕ ਹੀ ਤੁਪਕੇ ਦੇ ਨਾਲ਼।


=====


ਗ਼ਜ਼ਲ


ਸੰਘਰਸ਼ ਦੇ ਬਿਨਾ ਕਦ, ਜਾਗਣ ਨਸੀਬ ਸਾਡੇ ।


ਮੋਢੇ 'ਤੇ ਧਰ ਦਿਓ ਹੁਣ, ਹੱਕ਼ ਦੀ ਸਲੀਬ ਸਾਡੇ



ਕੁਝ ਲੋਕ ਜ਼ੁਲਮ, ਦਹਿਸ਼ਤ ਦੇ ਨਾਲ਼ ਜੂਝਦੇ ਹਨ,


ਕੁਝ ਹੇਰ ਫੇਰ ਕਰਕੇ , ਲਿਖਦੇ ਅਦੀਬ ਸਾਡੇ



ਜੇ ਪਲਟਣਾ ਹੈ ਤਖ਼ਤਾ, ਜ਼ਾਰਾਂ ਤੇ ਨਾਜ਼ੀਆਂ ਦਾ,


ਆਪਾਂ ਵੀ ਤੁਰ ਪਏ ਹਾਂ , ਆਵੋ ਕਰੀਬ ਸਾਡੇ



ਪੁੱਤਰ, ਭਰਾ, ਭਤੀਜੇ , ਬਣਦੇ ਸ਼ਰੀਕ ਆਖਿਰ,


ਕਿੰਨੇ ਕਰੀਬ ਦਿਲ ਦੇ , ਰਿਸ਼ਤੇ ਅਜੀਬ ਸਾਡੇ



ਮੁਖ਼ਬਰ ਘਰਾਂ 'ਚ ਜਦ ਤਕ, ਸੁਗਰੀਵ 'ਤੇ ਭਵੀਸ਼ਣ,


ਇਹ ਰਾਮ-ਰਾਜ ਤਦ ਤਕ, ਚੱਟੂ ਨਸੀਬ ਸਾਡੇ



ਲੋਕੀ ਗ਼ਰੀਬ ਜੇ ਹਨ, ਲੋਕਾਂ ਦਾ ਦੋਸ਼ ਵੀ ਹੈ ,


ਕਿਉਂ ਆਖਦੇ ਨੇ ਹਰ ਥਾਂ, ਖੋਟੇ ਨਸੀਬ ਸਾਡੇ



ਹੋਇਆ ਖ਼ਰਾਬ ਮੌਸਮ, ਬਦਲੋ ਵੀ ਆ ਕੇ ਰੁੱਤੋ,


ਕਿਉਂ ਹੋਰ ਹੋ ਰਹੇ ਹਨ, ਸੁਪਨੇ ਗ਼ਰੀਬ ਸਾਡੇ



ਧਰਤੀ ਦਾ ਕੁੱਲ ਰਕਬਾ , ਵੰਡਾਂਗੇ ਸਾਰਿਆਂ ਵਿਚ,


ਇਕ ਵਾਰ ਆ ਗਈ ਜਦ , ਹੱਥੀਂ ਜ਼ਰੀਬ ਸਾਡੇ



ਤੂੰ 'ਪਾਲ' ਖ਼ੁਦ ਸਮਝ ਕੇ , ਸਮਝਾ ਦੇ ਲੋਕ ਸਾਰੇ ,


ਲਿਖਦੇ ਨੇ ਸਾਮਰਾਜੀ, ਕਿੱਦਾਂ ਨਸੀਬ ਸਾਡੇ


======


ਗ਼ਜ਼ਲ


ਪਿਆਰ ਮੁਹੱਬਤ ਸਾਰੇ ਰਿਸ਼ਤੇ ਅਪਣੀ ਥਾਂ ।


ਭੈਣ, ਭਰਾ, ਪਤਨੀ, ਮਾਂ, ਬੱਚੇ ਅਪਣੀ ਥਾਂ



ਚੋਰ ਝਕਣ ਮੁਨਸਿਫ਼ ਤੋਂ ਮੁਨਸਿਫ਼ ਚੋਰਾਂ ਤੋਂ,


ਸਾਰੇ ਜਾਪਣ ਸੱਚੇ ਸੁੱਚੇ ਅਪਣੀ ਥਾਂ।



ਖ਼ਾਲੀ ਮੁੜ ਕੇ ਤੇਰੇ ਦਰ ਤੋਂ ਖ਼ੈਰ ਬਿਨਾ,


ਝਕਦੇ ਝਕਦੇ ਫ਼ੱਕਰ ਪਰਤੇ ਅਪਣੀ ਥਾਂ



ਤੁੱਲੇ ਨੇ ਲੁੱਟੇ ਵਿਉਪਾਰੀ ਯੁਗਤਾਂ ਨਾਲ਼,


ਸੋਹਣੀ ਨੇ ਸੌਦਾਗਰ ਲੁੱਟੇ ਅਪਣੀ ਥਾਂ



ਫੁੱਲ ਗੁਲਾਬੀ , ਲਾਲ , ਬਸੰਤੀ ਤੇ ਪੀਲ਼ੇ ,


ਗੁਲਸ਼ਨ ਦੇ ਵਿਚ ਸਾਰੇ ਫ਼ਬਦੇ ਅਪਣੀ ਥਾਂ



ਹੰਝੂ , ਵਰਖਾ , ਝਾਂਜਰ ਦਾ ਕੋਈ ਮੇਲ਼ ਨਹੀਂ,


ਫਿਰ ਵੀ ਤਿੰਨੇ ਛਮ ਛਮ ਕਰਦੇ ਅਪਣੀ ਥਾਂ।



ਕਹਿਰ ਮਚਾਉਂਦੇ 'ਪਾਲ' ਤਿਰੇ ਘਰ ਰਖਵਾਲੇ,


ਸੰਨ੍ਹ ਲਗਾ , ਪਹਿਰੇ 'ਤੇ ਖੜ੍ਹਦੇ ਅਪਣੀ ਥਾਂ


=====


ਗ਼ਜ਼ਲ


ਆਪ ਦੇਖੇ ਹਨ ਅਸੀਂ ਕੁਝ ਹਾਦਸੇ।


ਰਸਤਿਆਂ ਨੇ ਖਾ ਲਏ ਹਨ ਕਾਫ਼ਲੇ।



ਕ਼ਤਲ ਹੁੰਦੇ ਹਨ ਕਦੇ ਕੁਰਸੀ ਲਈ,


ਖ਼ੂਨ ਵੰਹਿਦੇ ਹਨ ਖ਼ੁਦਾ ਦੇ ਵਾਸਤੇ।



ਮਿਟ ਗਏ ਜੋ ਜੋ ਸਮੇਂ ਦੀ ਧੂੜ ਵਿਚ,


ਆਪ ਜ਼ੁੰਮੇਵਾਰ ਸਨ ਉਹ ਕਾਫ਼ਲੇ।



ਬੋਲਦੇ ਹਾਂ ਖ਼ਾਸ ਪੰਜਾਬੀ ਅਸੀਂ,


ਲਿਖ ਰਹੇ ਹਾਂ ਮਾਤ ਭਾਸ਼ਾ ਵਾਸਤੇ।



ਆਉਣ ਵਾਲਾ ਵਕ਼ਤ ਕਰਦਾ ਇੰਤਜ਼ਾਰ,


ਮੇਟ ਕੇ ਆਵੋ ਦਿਲਾਂ ਦੇ ਫਾਸਲੇ।



ਲੋਕਤੰਤਰ ਬਾਗ਼ ਦੀ ਰਾਖੀ ਲਈ,


ਰੋਕ ਦੇਵੋ ਤੋਤਿਆਂ ਦੇ ਦਾਖਲੇ।



ਰਲ ਗਏ ਹਨ ਚੋਰ ਤੇ ਰਾਖੇ ਜਦੋਂ,


ਜਾਗਦੇ ਰਹਿਣਾ ਲੋਕੋ! ਜਾਗਦੇ।



ਇਸ ਤਰਾਂ ਪਰੇਸ਼ਾਨ ਨਾ ਹੁੰਦਾ ਕਦੀ,


ਬੋਲਿਆ ਮਿੱਠਾ ਜੇ ਹੁੰਦਾ ਆਪ ਨੇ।



'ਪਾਲ' ਦੇ ਜੇਕਰ ਤੁਸੀਂ ਹੁੰਦੇ ਕਰੀਬ,


ਉਹ ਬੜਾ ਨਜ਼ਦੀਕ ਹੁੰਦਾ ਆਪ ਦੇ।


=====


ਗ਼ਜ਼ਲ


ਬਾਜ਼ਾਂ ਦੇ ਪਰ ਜੇ ਕੱਟੋਂ, ਤਾਂ ਸ਼ੁਕਰ ਹੈ ਤੁਹਾਡਾ।


ਚਿੜੀਆਂ ਨੂੰ ਵਰਜਦੇ ਹੋ, ਇਹ ਜਬਰ ਹੈ ਤੁਹਾਡਾ।



ਪੈਰਾਂ 'ਚ ਬੇੜੀਆਂ ਹਨ, ਤਾਂ ਵੀ ਹੈ ਮੜਕ ਪੂਰੀ,


ਆਵਾਮ ਦੇ ਦਿਲਾਂ ਵਿਚ, ਕੁਝ ਕਦਰ ਹੈ ਤੁਹਾਡਾ।



ਸਾਨੂੰ ਨਦੀ ਕਿਨਾਰੇ ਦੇ ਰੁੱਖ ਵਾਂਗ ਸਮਝੋ,


ਵਸਦੇ ਰਹੋ ਸਲਾਮਤ , ਬਸ ਫ਼ਿਕਰ ਹੈ ਤੁਹਾਡਾ।



ਹਰ ਜ਼ੁਲਮ ਤੇ ਤਸ਼ੱਦਦ ਝਲ ਕੇ ਰਹੇ ਸਲਾਮਤ,


ਭਾਰਤ ਦੇ ਐ ਸਪੂਤੋ , ਇਹ ਸਬਰ ਹੈ ਤੁਹਾਡਾ।



ਹਾਲੇ ਤੁਸੀਂ ਤਾਂ ਅਪਣਾ ਵਿਰਸਾ ਪਛਾਣਿਆ ਹੈ ,


ਇਸ ਦੇਸ਼ ਦੀ ਹਵਾ ਵਿਚ ਹੁਣ ਜ਼ਿਕਰ ਹੈ ਤੁਹਾਡਾ।



ਸਾਡੇ ਦਿਲਾਂ ਦੀ ਸੀਰਤ ਹੈ ਪਾਣੀਆਂ ਤੋਂ ਨਿਰਮਲ,


ਸਾਡੀ ਵਫ਼ਾ 'ਤੇ ਸ਼ੱਕ ਹੈ ? ਇਹ ਕੁਫ਼ਰ ਹੈ ਤੁਹਾਡਾ।



ਹੈ ਸੋਚ 'ਪਾਲ' ਸਾਡੀ ਕਿ ਬਖ਼ਸ਼ 'ਤੇ ਸਿਤਮਗਰ ,


ਇਸ ਦੇ ਤੁਸੀਂ ਨਾ ਕਾਬਲ ਇਹ ਹਸ਼ਰ ਹੈ ਤੁਹਾਡਾ।



Monday, January 30, 2012

ਜਗਜੀਤ ਸੰਧੂ - ਨਜ਼ਮ

ਮੈਂ ਸੱਖਣਾ ਹੀ ਆਇਆ ਹਾਂ

ਨਜ਼ਮ


ਨਾ ਤੂੰ ਭੈਅ ਨਾ ਰੱਖ
ਮੈਂ ਸੱਖਣਾ ਹੀ ਆਇਆ ਹਾਂ
ਮੇਰੀ ਲਾਲਸਾ
ਮੇਰੀ ਹਉਂ
ਮੇਰੇ ਅਰਮਾਨ
ਬੂਹੇ ਲਾਗੇ ਟੰਗੇ
ਮੇਰੇ ਹੈਟ ਚ ਪਏ ਨੇ
ਨਾ ਬੇਨਤੀ
ਨਾ ਹੁਕ਼
ਨਾ ਫ਼ਤਵਾ
ਇਹ ਸਭ ਮੇਰੀ ਹਉਂ ਤੇਵਰ ਜੁ ਹੋਏ
..........
ਇਹਨਾਂ ਦੀ ਗ਼ੈਰ ਹਾਜ਼ਰੀ ਚ ਮੈਂ ਕੁਝ ਕਹਿਣਾ ਹੈ
ਪਰ ਜਦ ਵੀ ਮੈਂ ਕੁਝ ਕਹਿਣਾ ਚਾਹਿਆ...
ਜਿਵੇਂ.... ਅੱਜ ਕਿੰਨੇ ਪਿਆਰੇ ਫੁੱਲ ਖਿੜੇ ਨੇ
ਤੂੰ ਕਿਆਰੀ ਵੱਲ ਝਾਕੀ
ਉੱਥੇ ਨਹੀਂ ਯਾਰ ਮੇਰੇ ਅੰਦਰ....ਹੁਣ ਇਹ ਕਹਿਣ ਦੀ ਲੋੜ ਹੁੰਦੀ ਹੈ ਭਲਾ??
ਜਾਂ..... ਕਿੰਨੀ ਨਮੀ ਹੈ, ਅੱਜ
ਇਸ ਤੋਂ ਪਹਿਲਾਂ ਕਿ ਮੈਂ ਕਹਿੰਦਾ ਤੇਰੇ ਬੁੱਲ੍ਹਾਂ ਤੇ-
ਤੂੰ ਕੂਲਰ ਬੰਦ ਕਰ ਦਿੱਤਾ
ਦੇਖ ਫਿਰ ਇੱਕ ਫਾਸਿਲਾ ਤਾਂ ਹੈ
ਤੇਰੀ ਤੇ ਮੇਰੀ ਕੁਰਸੀ ਦਰਮਿਆਨ
ਮੇਜ਼ ਕੁ ਜਿੰਨਾ
ਪਰ ਸਾਡੇ ਵਰਗੇ
ਲੱਗ ਮਤੇ ਦੇ ਲੋਕਾਂ ਲਈ
ਇਹ ਫਾਸਲਾ ਨਹੀਂ
ਬਚੀ ਖੁਚੀ ਨੇੜਤਾ ਹੁੰਦੀ ਹੈ
..........
ਚੱਲ ਆ.... ਆਪਾਂ
ਗੁੰਮ ਚੁੱਕੇ ਤੇ ਅਫ਼ਸੋਸ
ਗੁੰਮ ਰਹੇ ਤੇ ਪੜਚੋਲ
ਅਤੇ ਇਸ ਬਚੇ ਖੁਚੇ ਤੇ ਮਾਣ ਕਰੀਏ
..........
ਹੋਰ ਮੈਂ ਕਹਿਣਾ ਸੀ ਕਿ
ਮੈਂ ਰੁੱਖ ਨਹੀਂ
ਪੰਜਵੀਂ ਰੁੱਤ ਅਤੇ ਤੇਹਰਵੇਂ ਮਹੀਨੇ ਦਾ ਅਨੁਭਵੀ
ਮੈਂ ਮਰਦ ਹਾਂ
ਤਪਦੇ- ਠਰਦੇ ਜਾਣਦਾ
ਕਦੀ ਮਨ ਰਾਹੀਂ
ਕਦੇ ਜੁੱਸੇ ਰਾਹੀਂ
............
ਜੁੱਸੇ ਰਾਹੀਂ ਮੈਂ ਜਾਣਿਆ:
-
ਕਿ ਤੇਰੇ ਅੰਦਰ ਲਾਵਾ ਹਾਵੀ ਹੈ
ਅਤੇ ਬਾਹਰ ਨਦੀਆਂ
-
ਕਿ ਤੇਰੇ ਬਦਨ ਦੀ ਊਚ-ਨੀਚ
ਕਦ ਪਹਾੜੀ ਹੁੰਦੀ ਹੈ, ਕਦ ਪਠਾਰੀ
-
ਕਿ ਝਨਾਅ ਨੇ ਸੁਹਣੀ ਨਹੀਂ
ਉਸਦੀ ਪਿਆਸ ਪੀਣੀ ਸੀ
-
ਕਿ ਥਲ ਨੇ ਸੱਸੀ ਨਹੀਂ
ਉਸਦਾ ਸੇਕ ਠਾਰਨਾ ਸੀ
...........
ਸ਼ਾਇਦ ਤੂੰ ਵੀ ਕੁਝ ਕਹਿਣਾ ਹੋਵੇ
ਕਿ ਅੱਜ ਵੀ ਰਹੇਂਗੀ ਸਦਾ ਵਾਂਗ
ਬੋਲਾਂ ਚ ਸੰਜਮੀ
..........
ਵੇਖ ਰਿਹਾ ਹਾਂ
ਬੁੱਕਲ਼ ਚ ਪਿਆ ਸੱਜਾ ਹੱਥ
ਕਿਰ ਚੁੱਕੀ ਹੈ ਜਿਸ ਚੋਂ
ਅਲਵਿਦਾ
........
ਪਤਾ ਨਹੀਂ ਕਦ ਕੱਜ ਲਿਆ
ਇਸਦਾ ਖ਼ਾਲੀਪਨ
ਖੱਬੇ ਹੱਥ ਨਾਲ਼



Sunday, January 29, 2012

ਰਾਜਿੰਦਰਜੀਤ - ਗ਼ਜ਼ਲ

ਗ਼ਜ਼ਲ
ਸੋਚਿਆ ਨਾ ਸੀ ਕਿ ਏਦਾਂ ਦਿਨ ਸੁਨਹਿਰੇ ਹੋਣਗੇ
ਕੱਚੀਆਂ ਨੀਂਦਾਂ ਦੇ ਸੁਪਨੇ ਏਨੇ ਗਹਿਰੇ ਹੋਣਗੇ

ਟੁੱਟ ਕੇ ਬਰਸੇਗਾ ਪਾਣੀ ਵਾਂਗਰਾਂ ਰੂਹ ਦਾ ਗ਼ੁਬਾਰ,
ਬੱਦਲਾਂ ਵਾਂਗੂੰ ਜਦੋਂ ਵੀ ਦਰਦ ਗਹਿਰੇ ਹੋਣਗੇ

ਆਪਣੀ ਛਾਤੀ 'ਤੇ ਤਰਦੇ ਪੱਥਰਾਂ ਨੂੰ ਵੇਖ ਕੇ,
ਵਗ ਰਹੇ ਪਾਣੀ ਵੀ ਤਾਂ ਇੱਕ ਪਲ ਨੂੰ ਠਹਿਰੇ ਹੋਣਗੇ

ਆਪਾਂ ਜਦ ਹੋਏ ਵਿਯੋਗੀ, ਆਪਣੇ ਪੱਲੇ ਉਦੋਂ,
ਠੰਡੀਆਂ ਰਾਤਾਂ ਅਤੇ ਤਪਦੇ ਦੁਪਹਿਰੇ ਹੋਣਗੇ

ਇਹ ਨਹੀਂ ਦਾਅਵਾ ਕੋਈ, ਇਸ ਵਕ਼ਤ ਦੀ ਮਰਹਮ ਦੇ ਨਾਲ,
ਫ਼ੱਟ ਮੇਰੇ ਭਰਨਗੇ ਜਾਂ ਹੋਰ ਗਹਿਰੇ ਹੋਣਗੇ

ਲਿਖਦਿਆਂ ਮਾਸੂਮ ਅੱਖਰ ਸੋਚਿਆ ਨਾ ਸੀ ਕਦੇ,
ਮੇਰੀਆਂ ਨਜ਼ਮਾਂ 'ਤੇ ਵੀ ਛਵ੍ਹੀਆਂ ਦੇ ਪਹਿਰੇ ਹੋਣਗੇ

Saturday, January 28, 2012

ਅਜ਼ੀਮ ਸ਼ੇਖਰ - ਗੀਤ - ਨਵੇਂ ਵਰ੍ਹੇ ਦੀ ਪਲੇਠੀ ਪੋਸਟ - ਸਭ ਦੋਸਤਾਂ ਦੇ ਨਾਮ...:)

ਦੋਸਤੋ! ਯੂ.ਕੇ. ਵਸਦੇ ਦੋਸਤ ਅਜ਼ੀਮ ਸ਼ੇਖਰ ਹੁਰਾਂ ਨੇ ਇਹ ਗੀਤ ਮੈਨੂੰ 15 ਦਸੰਬਰ ਨੂੰ ਆਰਸੀ ਲਈ ਘੱਲਿਆ ਸੀ..ਜੋ ਮੇਰੀ ਘੋਲ਼ ਅਤੇ ਨਲਾਇਕੀ ਕਰਕੇ ਅੱਜ ਪੋਸਟ ਹੋ ਰਿਹਾ ਹੈ..ਖ਼ੈਰ! ਨਵੇਂ ਸਾਲ ਦੀ ਸ਼ੁਰੂਆਤ ਸ਼ੇਖਰ ਜੀ ਦੇ ਇਸ ਬੇਹੱਦ ਖ਼ੂਬਸੂਰਤ ਗੀਤ ਨਾਲ਼ ਹੋ ਰਹੀ ਹੈ.ਹੁਣ ਬਲੌਗ ਨਿਰੰਤਰਤਾ ਨਾਲ਼ ਅਪਡੇਟ ਕਰਿਆ ਕਰਾਂਗੀ....ਅਦਬ ਸਹਿਤ...ਤਨਦੀਪ

*************


ਨਵਾਂ ਸਾਲ ਮੁਬਾਰਕ
ਗੀਤ
ਸੋਹਣਾ ਜਿਹਾ ਲਿਆਵੀਂ ਨਵਾਂ ਸਾਲ ਮੇਰੇ ਮਾਲਕਾ
ਚੜ੍ਹਦੀ ਕਲਾ ਚ ਰੱਖੀਂ ਹਾਲ ਮੇਰੇ ਮਾਲਕਾ
ਸੋਹਣਾ ਜਿਹਾ ਲਿਆਵੀਂ...
-----

ਰਿਸ਼ਤਾ ਬਣਾ ਕੇ ਰੱਖੀਂ ਮੰਜ਼ਿਲਾਂ ਤੇ ਪੈਰਾਂ ਦਾ,
ਫ਼ਾਸਲਾ ਮਿਟਾ ਦੇਈਂ ਆਪੇ ਆਪਣੇ ਤੇ ਗ਼ੈਰਾਂ ਦਾ,
ਰਹੇ ਇੱਕ ਦੂਜੇ ਦਾ ਖ਼ਿਆਲ ਮੇਰੇ ਮਾਲਕਾ,
ਸੋਹਣਾ ਜਿਹਾ ਲਿਆਵੀਂ...
-----

ਬੁੱਢੇ ਮਾਪਿਆਂ ਦੇ ਹੱਥੋਂ ਖੋਹਵੀਂ ਨਾ ਡੰਗੋਰੀਆਂ,
ਵਸਦੀਆਂ ਰਹਿਣ ਧੀਆਂ ਚਾਵਾਂ ਨਾਲ ਤੋਰੀਆਂ,
ਮਾਵਾਂ ਦੇ ਖਿਡਾਵੀਂ ਗੋਦੀ ਲਾਲ ਮੇਰੇ ਮਾਲਕਾ
ਸੋਹਣਾ ਜਿਹਾ ਲਿਆਵੀਂ...
-----

ਖ਼ੁਸ਼ੀ ਦੇ ਕੇ ਲਾਹਵੀਂ ਸਾਨੂੰ ਸੋਚਾਂ ਦੀ ਸਲੀਬ ਤੋਂ,
ਰੁੱਸਿਆ ਨਾ ਰਹੇ ਕੋਈ ਆਪਣੇ ਨਸੀਬ ਤੋਂ,
ਹੱਲ ਹੋਣ ਸਾਰੇ ਹੀ ਸਵਾਲ ਮੇਰੇ ਮਾਲਕਾ,
ਸੋਹਣਾ ਜਿਹਾ ਲਿਆਵੀਂ...
-----

ਟੁੱਟੇ ਹੋਏ ਸਬਰਾਂ ਲਈ ਪੁਲ ਵੀ ਬਣਾਈਂ ਤੂੰ,
ਉਮਰਾਂ ਤੋਂ ਲੰਮੀਆਂ ਉਡੀਕਾਂ ਵੀ ਮੁਕਾਈਂ ਤੂੰ,
ਸਾਰੀਆਂ ਬਲਾਵਾਂ ਦੇਵੀਂ ਟਾਲ਼ ਮੇਰੇ ਮਾਲਕਾ,
ਸੋਹਣਾ ਜਿਹਾ ਲਿਆਵੀਂ...
-----

ਸੱਚ ਦੀਆਂ ਬਖਸ਼ੀਂ ਤੂੰ ਸਾਨੂੰ ਪਹਿਰੇਦਾਰੀਆਂ,
ਅਣਖਾਂ ਵੀ ਰਹਿਣ ਸਾਨੂੰ ਜਾਨ ਤੋਂ ਪਿਆਰੀਆਂ,
ਹੌਸਲੇ ਦੀ ਬਣੀ ਰਹੇ ਢਾਲ ਮੇਰੇ ਮਾਲਕਾ,
ਸੋਹਣਾ ਜਿਹਾ ਲਿਆਵੀਂ...
-----

ਚਿੜੀਆਂ ਤੋਂ ਕਾਵਾਂ ਨੂੰ ਨਾ ਚੋਗਾ ਖੋਹਣ ਦੇਵੀਂ ਤੂੰ,
ਕਦੇ ਕਿਸੇ ਬੱਚੇ ਨੂੰ ਨਾ ਭੁੱਖਾ ਰੋਣ ਦੇਵੀ ਤੂੰ,
ਜੀਣਾ ਕਦੇ ਕਰੀਂ ਨਾ ਮੁਹਾਲ ਮੇਰੇ ਮਾਲਕਾ
ਸੋਹਣਾ ਜਿਹਾ ਲਿਆਵੀਂ...
-----

ਰੱਖੀਂ ਤੂੰ ਸਲਾਮਤੀ ਵੀ ਚੁੰਨੀ ਨਾਲ ਪੱਗ ਦੀ,
ਹਾਜ਼ਰੀ ਲਵਾਈਂ ਸਦਾ ਚੱਲ੍ਹਿਆਂ ਚ ਅੱਗ ਦੀ,
ਵੇਹੜਿਆਂ ਚ ਪੈਂਦੀ ਹੇ ਧਮਾਲ ਮੇਰੇ ਮਾਲਕਾ,
ਸੋਹਣਾ ਜਿਹਾ ਲਿਆਵੀਂ...
-----

ਖ਼ੂਨ ਵਿੱਚ ਭਿੱਜੀਆਂ ਨਾ ਆਉਣ ਕਿਤੋਂ ਖ਼ਬਰਾਂ,
ਘਰਾਂ ਨੂੰ ਉਜਾੜਕੇ ਬਣਾਵੀਂ ਨਾ ਤੂੰ ਕਬਰਾਂ,
ਭਾਰੇ ਦੁੱਖ ਹੁੰਦੇ ਨਈਂ ਸੰਭਾਲ ਮੇਰੇ ਮਾਲਕਾ,
ਸੋਹਣਾ ਜਿਹਾ ਲਿਆਵੀਂ...
-----

ਕਰਦਾ "ਅਜ਼ੀਮ" ਹੈ ਦੁਆਵਾਂ ਸਭ ਵਾਸਤੇ,
ਸਾਹਾਂ ਦੀ ਪਤੰਗ ਜੀਹਦੀ ਉੱਡੇ ਤੇਰੀ ਆਸ ਤੇ,
ਵੇਂਹਦੇ ਰਹੀਏ ਤੇਰੇ ਹੀ ਕਮਾਲ ਮੇਰੇ ਮਾਲਕਾ,
ਸੋਹਣਾ ਜਿਹਾ ਲਿਆਵੀਂ ਨਵਾਂ ਸਾਲ ਮੇਰੇ ਮਾਲਕਾ....

ਸੋਹਣਾ ਜਿਹਾ ਲਿਆਵੀਂ...