ਜਤਿੰਦਰ ਔਲਖ - ਲਘੂ ਨਜ਼ਮਾਂ

ਲਘੂ ਨਜ਼ਮਾਂ

ਜੇ ਤੂੰ ਕਹੇਂ ਪਾੜ ਦੇਵਾਂ
ਧੁਖਦੇ ਅਤੀਤ ਦੇ ਵਰਕੇ
ਜੇ ਤੂੰ ਕਹੇਂ ਸਮੇਟ ਲਵਾਂ
ਉੱਖੜੇ ਉੱਖੜੇ ਸਾਹ
======

ਹਨੇਰੀ ਝੰਭੇ ਰੁੱਖ 'ਤੇ
ਆ ਬੈਠੀ ਸਫ਼ੈਦ ਚਿੜੀਆਂ ਦੀ ਡਾਰ
ਨਿਪੱਤਰੀਆਂ ਟਾਹਣੀਆਂ 'ਤੇ
ਹੋ ਗਈ ਦੀਪਮਾਲ਼ਾ
=====
ਸੁੰਦਰਾਂ! ਤੇਰੇ ਰੰਗ ਮਹਿਲੀਂ
ਆਏ ਜੋਗੀ
ਕਿਲਕਾਰੀ ਬਦਲੀ
ਸੋਗੀ ਹਟਕੋਰਿਆਂ ਵਿਚ
=====
ਦੇਰ ਬਾਅਦ ਫਰੋਲੇ ਖ਼ਤ
ਯਾਦ ਆਏ
ਨਾਜ਼ੁਕ ਕਿਨਾਰਿਆਂ ਨੂੰ
ਖਰੂਦੀ ਵਹਿਣਾਂ ਨਾਲ਼ ਰਿਸ਼ਤੇ
====
ਪੜ੍ਹੀ ਆਸਾ ਦੀ ਵਾਰ
ਭਰ ਆਇਆ ਮਨ
ਰੂਹ ਜਾਣਾ ਚਾਹੇ
ਸੌਰ ਮੰਡਲ ਦੇ ਪਾਰ
=====
ਪਰੇਸ਼ਾਨ ਨਾ ਹੋਵੋ
ਅਣਚਾਹਿਆ ਮਹਿਮਾਨ ਹਾਂ
ਹਨੇਰੀ ਗੁਫ਼ਾ 'ਚੋਂ ਆਇਆ
ਆਦਮਖ਼ੋਰ ਨਹੀਂ
=====
ਹਵਾਏ! ਮੈਨੂੰ ਵੀ ਲੈ ਚੱਲ
ਰੇਤ ਨਹੀ, ਖ਼ੁਸ਼ਬੋਈ ਹਾਂ
ਦੂਰ ਤੱਕ ਨਾਲ਼ ਜਾ...
ਬਿਖਰ ਜਾਵਾਂਗੀ
=====
ਪੁਰਾਣੇ ਬੋਹੜ ਦੀ ਦਾਹੜੀ ਨਾਲ਼
ਲਾਲ ਕੱਪੜਾ ਬੰਨ੍ਹ
ਵਰਮੀ 'ਤੇ ਕੱਚੀ ਲੱਸੀ ਡੋਲ੍ਹ
ਪਰਤ ਗਈ ਸੁਪਨਮਈ ਸੰਸਾਰ 'ਚ
=====

ਉਹ ਤਾਂ ਪੌਣ ਹੈ
ਜੂਏ 'ਚ ਹਾਰੀ ਦਰੋਪਤੀ ਨਹੀ
ਕਿ ਭਰੀ ਸਭਾ 'ਚ
ਕਰ ਦੇਵੋ ਨਗਨ
=====
ਸੁੱਤ-ਉਨੀਂਦੇ ਨੈਣਾਂ 'ਚ
ਖ਼ੁਸ਼ਕ ਹੋਏ ਪਾਣੀ
ਅੱਜ ਦਿਨ ਹੈ ਸਮਾਜ ਵਿਗਿਆਨ ਦੇ
ਪੀਰੀਅਡ ਜਿਹਾ ਨੀਰਸ
======
ਧੁਖ ਰਹੇ ਖੰਡਰਾਤ 'ਤੇ ਦੀਵਾ ਜਗਾ
ਪਰਤ ਜਾਵੀਂ ਝੀਲ ਵਿਚਲੇ
ਸ਼ਿਕਾਰਿਆਂ ਦੀ ਅਰਾਮਗਾਹ 'ਚ
ਤੇ ਕਹੀਂ ....
ਰੁੱਤ ਬਦਲੀ ਹੈ
( ਨੋਟ: ਦੋਸਤੋ! ਪਿਛਲੇ ਕਈ ਦਿਨਾਂ ਤੋਂ ਯੂਨੀਕੋਡ 'ਚ ਊੜੇ ਉੱਪਰ ਅੱਧਕ ਟਾਈਪ ਕਰਦਿਆਂ ਬਿੰਦੀ ਜਿਹੀ ਬਣ ਰਹੀ ਹੈ, ਇਸ ਗ਼ਲਤੀ ਵੱਲ ਮੇਰਾ ਧਿਆਨ ਹੈ, ਕਿਰਪਾ ਕਰਕੇ ਇਸਨੂੰ ਅੱਧਕ ਹੀ ਪੜ੍ਹਿਆ ਜਾਵੇ....ਧੰਨਵਾਦ )