ਗ਼ਜ਼ਲ
ਹਰ ਨਜ਼ਰ ਵਿਚ ਕੁਝ, ਲਾ-ਜਵਾਬ ਹੁੰਦਾ ਹੈ।
ਨਜ਼ਰ ਦੀ ਪਰਖ ਦਾ, ਕੁੱਝ ਤਾਂ ਹਿਸਾਬ ਹੁੰਦਾ ਹੈ।
ਮੈਂ ਤੇਰੀ ਅੱਖ ‘ਚੋਂ ਮੱਛੀ ਦੀ ਅੱਖ ਤੱਕਦਾ ਹਾਂ,
ਸਵੰਬਰ ਇਸ ਤਰ੍ਹਾਂ ਹੀ ਕਾਮਯਾਬ ਹੁੰਦਾ ਹੈ।
ਹਰ ਇੱਕ ਸੋਚ ਵਿੱਚ, ਲੇਲਾ ਤੇ ਬਾਘ ਹੁੰਦੇ ਨੇ,
ਵਰਤੋਂ ‘ਚ ਉਂਝ ਉਹ ਲੇਲਾ ਕਿਤੇ ਬਾਘ ਹੁੰਦਾ ਹੈ।
ਹਰ ਪਰਿੰਦੇ ਦੇ ਹੁੰਦੇ ਨੇ ਖੰਭ ੳਡਣ ਲਈ,
ਐਪਰ ਉਕਾਬ ਜੋ ਹੁੰਦੈ, ਉਕਾਬ ਹੁੰਦਾ ਹੈ।
ਤੇਰੀ ਫ਼ਿਤਰਤ ਦੀਆਂ ਸ਼ੋਖ਼ ਸ਼ਰਾਰਤਾਂ ਕਰਕੇ,
ਮੇਰੀ ਨੀਂਦ ਦਾ ਇਹ ਪਲ ਹੀ ਖ਼ਾਬ ਹੁੰਦਾ ਹੈ।
ਤੇਰੀ ਨਜ਼ਰ ਪਏ ਜੇ ਕੰਡਿਆਂ ਜਾਂ ਫੁੱਲਾਂ ‘ਤੇ,
ਤਾਂ ਕੰਡਾ ਫੁੱਲ ਅਤੇ ਫੁੱਲ ਆਫ਼ਤਾਬ ਹੁੰਦਾ ਹੈ।
ਲੰਘਾਏ ਪਿਆਰ ਬਿਨ ਦਿਨ ਸਾਡੇ ਫ਼ੱਕਰਾਂ ਵਰਗੇ,
ਪਿਆਰ ਵਿਚ ਜਿੰਦ ਦਾ ਪਲ ਪਲ ਅਜਾਬ ਹੁੰਦਾ ਹੈ।
ਕਿਉਂ ਮੇਰਾ ਹੀ ਨਾਮ ਪੈਂਦਾ ਉਡੀਕ ਸੂਚੀ ਵਿਚ,
ਮਿਲ਼ਣ ਦੀ ਸੂਚੀ ਲਈ ਜੋ ਨਿੱਤ ਇੰਤਖ਼ਾਬ ਹੁੰਦਾ ਹੈ।
ਪੈਰੀਂ ਛਾਲੇ, ਅੱਖਾਂ ‘ਚ ਅੱਥਰੂ ਤੇ ਸੋਚਾਂ ‘ਚ ਸੁਪਨੇ,
ਤਨ ‘ਤੇ ਲੀਰਾਂ ਫਿਰ ਵੀ ਪਿਆਰਾ ਬੇਅੰਤ ਬਾ-ਆਦਾਬ ਹੁੰਦਾ ਹੈ।
ਮਿਲ਼ਣ ਪਿਆਰੇ ਨੂੰ ਤੁਰਨ, ਪੈੜਾਂ ‘ਤੇ ਬਲ਼ ਉਠਦੇ ਚਿਰਾਗ਼,
ਉਂਝ ਉਨ੍ਹਾਂ ਰਾਹਾਂ ‘ਚ ਨ੍ਹੇਰਾ, ਬੇ-ਹਿਸਾਬ ਹੁੰਦਾ ਹੈ।
ਮਿਲ਼ਣ ਦੇ ਚਾਅ ਦਾ, ਮਿਲ਼ਣ ਦਾ ਅਤੇ ਮੁੜ ਕੇ ਮਿਲ਼ਣ ਦਾ,
‘ਸੁਖਮਿੰਦਰ’ ਦੇ ਤਨ, ਮਨ, ਰੂਹ ‘ਚ ਇਨਕਲਾਬ ਹੁੰਦਾ ਹੈ।
2 comments:
‘ਆਰਸੀ’ ਲਈ ਰਚਨਾਵਾਂ ਭੇਜਣ ਲਈ ਤੁਹਾਡਾ ਬੇਹੱਦ ਸ਼ੁਕਰੀਆ। ਅੱਗੇ ਤੋਂ ਵੀ ਭਰਵੇਂ ਸਹਿਯੋਗ ਦੀ ਆਸ ਨਾਲ਼...
ਤਨਦੀਪ ‘ਤਮੰਨਾ’
Respected Uncle ji...India tuhadi awaaz ch trannum tuhadey geet bahut sunney si...ghazalan pahli vaar parhiaan ne...bahut khoob!!
ਮੈਂ ਤੇਰੀ ਅੱਖ ‘ਚੋਂ ਮੱਛੀ ਦੀ ਅੱਖ ਤੱਕਦਾ ਹਾਂ,
ਸਵੰਬਰ ਇਸ ਤਰ੍ਹਾਂ ਹੀ ਕਾਮਯਾਬ ਹੁੰਦਾ ਹੈ।
Iss sheyer da koi jawab nahin.
Tamanna
Post a Comment