ਦਵਿੰਦਰ ਸਿੰਘ ਪੂਨੀਆ - ਗ਼ਜ਼ਲ

ਗ਼ਜ਼ਲ
ਹੋ ਗਏ ਮਿਹਰਬਾਨ ਚੀਜ਼ਾਂ ਤੇ।
ਹੁਣ ਨਿਕਲ਼ਦੀ ਹੈ ਜਾਨ ਚੀਜ਼ਾਂ ‘ਤੇ।
----
ਵਾਸੀਆਂ ਨਾਲ਼ ਉਹ ਨਾ ਘਰ ਬਣਦਾ,
ਕਰਦਾ ਨਿਰਭਰ ਮਕਾਨ ਚੀਜ਼ਾਂ ‘ਤੇ।
----
ਮਿਲ਼ ਰਿਹਾ ਹੈ ਸਕੂਨ ਚੀਜ਼ਾਂ ਤੋਂ,
ਖਪ ਰਿਹਾ ਹੈ ਜਹਾਨ ਚੀਜ਼ਾਂ ‘ਤੇ।
----
ਹੁਣ ਚਰਿੱਤਰ ਦੀ ਕੋਈ ਗੱਲ ਹੀ ਨਹੀਂ,
ਆਨ ਚੀਜ਼ਾਂ ‘ਤੇ ਸ਼ਾਨ ਚੀਜ਼ਾਂ ‘ਤੇ।
----
ਗੁਣ ਕਦੇ ਖ਼ਾਨਦਾਨ ਮੰਨਦੇ ਸਨ,
ਆ ਗਏ ਖ਼ਾਨਦਾਨ ਚੀਜ਼ਾਂ ‘ਤੇ।
----
ਘਰ ‘ਚ ਜਦ ਨੂੰਹ ਦਾ ਆਗਮਨ ਹੁੰਦੈ,
ਘਰ ਦਾ ਹੁੰਦੈ ਧਿਆਨ ਚੀਜ਼ਾਂ ‘ਤੇ।
----
ਗਿਆਨ ਦਾ ਕੰਮ ਹੁੰਦੈ ਚੇਤਨਤਾ,
ਖਪ ਰਿਹਾ ਅੱਜ ਗਿਆਨ ਚੀਜ਼ਾਂ ‘ਤੇ।
----
ਰੂਹ ਦਾ ਰਾਗ ਰੰਗ ਭੁੱਲ ਹੀ ਗਏ,
ਤਾਲ ਚੀਜ਼ਾਂ ਦੀ ਤਾਨ ਚੀਜ਼ਾਂ ‘ਤੇ।
----
ਹੁਣ ਜਹਾਨ ਇਕ ਦੁਕਾਨ ਵਰਗਾ ਹੈ,
ਚਲ ਰਹੀ ਹੈ ਦੁਕਾਨ ਚੀਜ਼ਾਂ ‘ਤੇ।