ਆਰਸੀ: ਪ੍ਰਭਜੋਤ ਸੋਹੀ

ਦੋਸਤੋ! ਜਿਵੇਂ ਕਿ ਤੁਸੀਂ ਜਾਣਦੇ ਹੀ ਹੋ ਕਿ ਆਰਸੀ ਨੂੰ Facebook ਅਤੇ Twitter ਨਾਲ਼ ਵੀ ਜੋੜ ਦਿੱਤਾ ਗਿਆ ਹੈ। ਜੇਕਰ ਤੁਹਾਡੇ ਕੋਲ਼ ਇਹਨਾਂ ਸਾਈਟਾਂ ਤੇ ਅਕਾਊਂਟ ਹਨ, ਤਾਂ ਤੁਸੀਂ ਆਰਸੀ ਬਲੌਗ ਨੂੰ ਓਥੋਂ ਵੀ join ਅਤੇ follow ਕਰ ਸਕਦੇ ਹੋ। ਲਿੰਕ ਹੇਠਾਂ ਦਿੱਤੇ ਜਾ ਰਹੇ ਹਨ। ਹੁਣ ਤੱਕ ਤੁਹਾਡੇ ਦਿੱਤੇ ਹਰ ਸਹਿਯੋਗ ਲਈ ਮਸ਼ਕੂਰ ਹਾਂ।
ਅਦਬ ਸਹਿਤ
ਤਨਦੀਪ ਤਮੰਨਾ

Wednesday, September 12, 2012

ਪ੍ਰਭਜੋਤ ਸੋਹੀ - ਨਜ਼ਮ

ਕਰਬਲਾ

ਨਜ਼ਮ

ਮੇਰੇ ਅੰਦਰ

ਕੱਚੀ ਉਮਰੇ

ਦਮ ਤੋੜਦੀਆਂ

ਨਜ਼ਮਾਂ ਦਾ ਵਿਰਲਾਪ ਹੈ...

ਅੱਖਰ .. ਸ਼ਬਦ .. ਵਾਕ

ਇਕ ਦੂਜੇ 'ਚ ਰਲ਼ਗੱਡ

ਅਹਿਸਾਸਾਂ ਦੀਆਂ

ਖੂੰਟੀਆਂ ‘ਤੇ ਲਟਕੇ

ਬੇ-ਵਿਸਾਹੀ ਜਿਹੀ ਨਾਲ਼

ਤੱਕ ਰਹੇ ਨੇ ਇਕ ਦੂਜੇ ਵੱਲ...

.............

ਇਹ ਕਿਸ ਤਰ੍ਹਾਂ

ਦੀ ਡਗਰ ‘ਤੇ ਹਾਂ

ਕਿ ਬੇਅੰਤ ਮੀਲ਼ਾਂ ਦੇ
ਸਫ਼ਰ ਤੋਂ

ਬਾਅਦ ਵੀ ਖੜ੍ਹਾ ਹਾਂ

ਉੱਥੇ ਹੀ...

...........
ਭੌਤਿਕਤਾ ਦਾ ਅਜਗਰ

ਨਿਗਲ਼ ਰਿਹੈ

ਸੂਖ਼ਮਤਾ ਦੇ ਪਰਿੰਦੇ

ਤੇ

ਜਜ਼ਬਿਆਂ ਦੀ ਖ਼ੁਦਕੁਸ਼ੀ

ਸਿਰਜ ਰਹੀ ਹੈ

ਨਿੱਤ ਨਵਾਂ

ਕਰਬਲਾ...

ਹਰ ਜਨਮ...

ਰੂਹ ਨੂੰ

ਪਿਆਸ ਦਾ ਵਰਦਾਨ ਹੈ

ਤੇ

ਸੁੰਨੇਪਣ ਦਾ ਸਰਾਪ ਹੈ..