ਨਵੇਂ ਸਾਲ ਦੇ ਸ਼ੁੱਭ ਦਿਹਾੜੇ ‘ਤੇ
ਨਜ਼ਮ
ਸਭ ਲੋਕ
ਆਪਣੇ ਰਿਸ਼ਤੇਦਾਰਾਂ
ਸਨੇਹੀ
ਮਿੱਤਰਾਂ ਨੂੰ
ਸ਼ੁੱਭ ਕਾਮਨਾਵਾਂ ਭਰੇ
ਕਾਰਡ ਪਾਉਂਦੇ ਨੇ
ਲੰਬੀ ਉਮਰ ਦੀਆਂ
ਦੁਆਵਾਂ ਕਰਦੇ ਨੇ
ਤੇ ਇਸ ਤਰਾਂ ....
ਮੈਂ ਵੀ....
ਕੁਝ ਨਾ ਕੁਝ ਲਿਖਣਾ ਚਾਹੁੰਦਾ ਹਾਂ
ਸੋਹਣੇ-ਸੋਹਣੇ ਰੰਗ-ਬਿਰੰਗੇ
ਕਾਰਡ ਖਰੀਦਦਾ ਹਾਂ
ਮੈਂ ਦਿਲੀ ਅਰਮਾਨ ਲਿਖਦਾ
ਉਲੀਕਦਾ ਹਾਂ
ਕਿੰਨੇ ਹੀ ਕਾਰਡ
ਲਫਾਫ਼ਿਆਂ 'ਚ ਬੰਦ ਕਰਦਾ ਹਾਂ
ਤੇ ਅਖੀਰ.....
ਇੱਕ ਕਾਰਡ ਓਸਦੇ ਨਾਮ....!!
ਜਿਸ ਨੇ ਜ਼ਿੰਦਗੀ ਦੇ ਮਾਅਨੇ ਹੀ
ਬਦਲ ਦਿੱਤੇ--
ਜ਼ਿੰਦਗੀ ਬਦਲ ਦਿੱਤੀ
ਜ਼ਿੰਦਗੀ ਦੇ ਰਾਹ ਹੀ ਬਦਲ ਦਿੱਤੇ
ਅੱਜ...
ਓਸਦਾ ਸਿਰਨਾਵਾਂ ਵੀ ਹੈ
ਪਰ ਉਸਨੂੰ ਕਾਰਡ ਪਾ ਨਹੀਂ ਸਕਦਾ
ਐਸੀ ਪਾਬੰਦੀ ਕਿ...
ਓਥੇ ਜਾ ਨਹੀਂ ਸਕਦਾ
ਓਹਦਾ ਸੋਹਣਾ ਘਰ ਹੈ
ਸੋਹਣਾ ਦਰ ਹੈ
ਚਿੱਟੀ ਰੂੰ ਵਰਗਾ
ਬਰਫ ਦਾ ਘਰ !!
ਅਰਮਾਨਾਂ ਦਾ
ਬਲ਼ਦਾ ਭਾਂਬੜ ਲੈਕੇ ਜਾਵਾਂ
ਤਾਂ ਕਿੰਝ ਜਾਵਾਂ !
ਓਹਦਾ ਬਰਫ਼ ਦਾ ਘਰ
ਪਿਘਲ ਜਾਵੇਗਾ
ਤੇ.....
ਇੱਕ ਹੋਰ ਇਲਜ਼ਾਮ
ਮੇਰੇ ਸਿਰ ‘ਤੇ ਆਵੇਗਾ
ਕਿ...
ਮੇਰਾ ਮਸਾਂ-ਮਸਾਂ ਵਸਿਆ ਘਰ
ਫਿਰ ਉਜਾੜ ਦਿੱਤੈ
ਤੇਰੀਆਂ ਇਹ ਸ਼ੁੱਭ- ਕਾਮਨਾਵਾਂ ਨੇ !
ਤੇ...
ਇੰਝ ਓਹਦੇ ਲਈ
ਦਿਲੀ-ਦੁਆਵਾਂ
ਮੇਰੇ ਦਿਲ ‘ਚ ਹੀ
ਵਰਿਆਂ-ਬੱਧੀ
ਦਫ਼ਨਾਈਆਂ ਰਹਿ ਜਾਣਗੀਆਂ !!
No comments:
Post a Comment