ਗ਼ਜ਼ਲ
ਚੜ੍ਹਿਆ ਫੇਰ ਨਵਾਂ ਇਕ ਸਾਲ।
ਸਾਡਾ ਤਾਂ ਬਸ ਉਹੀਉ ਹਾਲ।
----
ਰੁਦਨ ਕਰੇਂਦੀ ਖ਼ਾਲੀ ਜੇਬ,
ਅੰਦਰ ਹੈ ਨੀ ਕੁਝ ਵੀ ਮਾਲ।
----
ਕਦੇ ਹੁੰਦਾ ਸੀ ਕਾਲ਼ਾ ਕਾਲ਼ਾ,
ਹੁਣ ਤਾਂ ਸਾਰੀ ਕਾਲ਼ੀ ਦਾਲ਼।
----
ਕੀ ਪੁਛਦੈਂ ਬਈ ਢੀਚਕ ਦਾ?
ਕੀ ਦੱਸਾਂ! ਕੀ ਹੋਇਆ ਹਾਲ।
----
ਗਿਆ ਸੀ ਠਾਣੇ ਰਪਟ ਲਿਖੌਣ,
ਓਦੋਂ ਦੀ ਹੀ ਵਿਗੜੀ ਚਾਲ।
----
ਸ਼ੋਅ-ਰੂਮ ਨਿਰਾ ਧੋਖਾ ਹੁੰਦੈ,
ਵਿਕਦੈ ਅੰਦਰ ਚਲਾਵਾਂ ਮਾਲ।
----
ਕੀ ਲੱਭਦਾ ਏਂ ਬਾਹਰੋਂ ਤੂੰ?
ਲੱਭਣਾ ਏਂ ਤਾਂ ਅੰਦਰੋਂ ਭਾਲ਼।
----
ਗਾਹੁੰਦੇ ਸੀ ਦਰਿਆਵਾਂ ਨੂੰ,
ਟੱਪਿਆ ਨਹੀਂ ਹੁਣ ਜਾਂਦਾ ਖਾਲ਼।
----
ਖ਼ੰਜਰ ਓਸ ਚੁਭੋਇਆ ਹੈ,
ਜੋ ਬਣਦਾ ਸੀ ਮੇਰੀ ਢਾਲ।
----
ਨ੍ਹੇਰ ਪੈ ਗਿਆ ਹਰ ਪਾਸੇ,
‘ਨਿਰਮਲ ਸਿੰਘਾ’ ਦੀਵਾ ਬਾਲ਼।
No comments:
Post a Comment