ਗ਼ਜ਼ਲਧੜਕਦੇ ਦਿਲ ‘ਚ ਸੌਖੈ ਪਿਆਰ ਨੂੰ, ਕੁਝ ਚਿਰ ਦਬਾ ਲੈਣਾ।
ਛਲਕਦੇ ਜਾਮ ਅੱਖਾਂ ਦੇ, ਨਾਮੁਮਕਿਨ ਪਰ, ਲੁਕਾ ਲੈਣਾ।
----
ਅਸੀਂ ਚਿਰਾਂ ਤੀਕਰਾਂ ਅੰਦਰ, ਮੁਹੱਬਤ ਸਾਂਭ ਰੱਖਦੇ ਹਾਂ,
ਅਸਾਡਾ ਮਸ਼ਗਲੈ ਨਫ਼ਰਤ ਦੀ, ਫ਼ਿਤਰਤ ਦਾ ਮਜ਼ਾ ਲੈਣਾ।
----
ਤੁਸੀਂ ਯਾਦਾਂ ਨੂੰ ਸੁਣਿਐ, ਦੇ ਰਹੇ ਹੋ ਦਿਲ ਕਿਰਾਏ ਤੇ,
ਮਿਰੀ ਖ਼ਾਤਰ ਵੀ ਆਪਣੇ, ਦਿਲ ਦੀ ਇਕ ਨੁੱਕਰ ਬਚਾ ਲੈਣਾ।
----
ਮਿਰਾ ਜੇ ਸਾਹ ਅੰਦਰ ਜਾ ਕੇ, ਛੇਤੀ ਬਾਹਰ ਨੂੰ ਆਉਂਦੈ,
ਤਿਰਾ ਜਿਗਰੈ ਮਿਰੀ ਖ਼ੁਸ਼ੀਆਂ ਦਾ, ਸਾਹ ਪੀ ਕੇ ਪਚਾ ਲੈਣਾ।
----
ਅਸਾਡੇ ਹੋਸ਼ ਅੰਦਰ ਵਲਵਲਾ, ਤੇ ਜੋਸ਼ ਐਨਾ ਏਂ,
ਅਸਾਂ ਮੰਜ਼ਲ ਦੀਆਂ ਰਾਹਾਂ, ਨੂੰ ਨਾਲ਼ ਆਪਣੇ ਦੁੜਾ ਲੈਣਾ।
----
ਭਵਾ ਕੇ ਧੌਣ ਜਦ ਤੱਕਦੇ ਨੇ, ਲੰਘਦੇ ਲੋਕ, ਲਗਦਾ ਏ,
ਗ਼ਰੀਬਾਂ ਝੋਂਪੜਾ ਹਰ ਇਕ, ਚੁਬਾਰੇ ਵਿਚ ਬਣਾ ਲੈਣਾ।
----
ਬਣਾਈ ਸੀ ਜਦੋਂ ਕੁੱਲੀ, ਸੀ ਮਹਿੰਗਾਈ ਤੇ ਓਦੋਂ ਵੀ,
ਕਿਸੇ ਦਿਨ ਜਾਪਦੈ ਹੁਣ ਵੇਚ ਕੋਠਾ,ਢਿੱਡ ‘ਚ ਲਾ ਲੈਣਾ।
----
ਤੇਰੇ ਖ਼ਾਬਾਂ ਨੂੰ ਵਾਧੂ ਨੀਂਦਰਾਂ ਦੀ, ਲੋੜ ਪੈਣੀਂ ਏਂ,
ਮੇਰੇ ਖ਼ਾਬਾਂ ਦੇ ਵਿਚ ਆ ਕੇ, ਮੇਰੀ ਨੀਂਦਰ ਚੁਰਾ ਲੈਣਾ।
----
ਵਧਾਓ ਵੈਰ ‘ਅਸ਼ਰਫ਼’ਨਾਲ਼, ਭਾਵੇਂ ਗ਼ੈਰ ਵੀ ਸਮਝੋ,
ਕਿਸੇ ਦਿਨ ਵੇਖਣਾ ਉਹਨੂੰ, ਕਿਸੇ ਅਪਣਾ ਬਣਾ ਲੈਣਾ।
No comments:
Post a Comment