ਪਿੰਡ ਦਿਓ ਆਜੜੀਓ!ਨਜ਼ਮ
ਪਿੰਡ ਦਿਓ ਆਜੜੀਓ!
ਹੁਣ ਰੰਗੀਆਂ ਭੇਡਾਂ
ਤੋਰ ਲਿਆਵੋ
ਸੱਤ ਸਮੁੰਦਰੋਂ ਪਾਰ!!
ਨਾਲ਼ੇ ਸਾਨੂੰ ਆਣ ਮਿਲ਼ਾਵੋ
ਆਲੇ-ਭੋਲੇ ਲੇਲੇ ਸਾਡੇ ਯਾਰ!!!
----
ਰੌਸ਼ਨੀਆਂ ਤੱਕ ਅਸੀਂ ਮੁਸਾਫ਼ਿਰ
ਪੱਥਰ-ਸ਼ਹਿਰ ‘ਚ ਆਏ।
ਮਹਾਂ-ਨਗਰ ਦੀ ਮਿੱਠੀ ਕ਼ੈਦ ‘ਚ
ਹੁਣ ਜਿੰਦ ਘਟਦੀ ਜਾਏ।
ਕਦੇ ਕਦੇ ਤਾਂ ਲੱਗਦਾ ਆਪਾ
ਚਿਣ ਬੈਠੇ ਦੀਵਾਰ!
ਆ ਕੇ ਪਿੰਡ ਦੀ ਬਾਤ ਸੁਣਾਇਓ
ਕਰਿਓ ਆਣ ਪਿਆਰ!!
ਪਿੰਡ ਦਿਓ.....!!!
----
ਮਹਾਂ-ਨਗਰ ਦੀਆਂ ਬੱਜਰ-ਸੜਕਾਂ
ਲੋਹੇ ਲੋਹਾ ਠਣਕੇ।
ਮਨ ਰੋਵੇ ਤਨ ਜੂਝੇ ਸਾਡਾ
ਗਲ਼ ਮੁੜ੍ਹਕੇ ਦੇ ਮਣਕੇ।
ਪੈਰਾਂ ਦੇ ਵਿਚ ਬੇੜੀ ਸਾਡੇ
ਸਿਰ ਅਣ ਤੁਲਵੇਂ ਭਾਰ!
ਸਹੁੰ ਲੱਗੇ ਜੇ ਲੰਘਦੇ-ਤੁਰਦੇ
ਲਵੋਂ ਨਾ ਆ ਕੇ ਸਾਰ!!
ਪਿੰਡ ਦਿਓ.....!!!
----
ਮਹਾਂ-ਨਗਰ ਦਾ ਇਕ ਨੰਗਾ ਥਲ ਜੁ
ਤਪਦਾ ਭੱਠ ਦੇ ਹਾਰ।
ਰੂਹ ਕੁਮਲਾਵੇ ਤੇ ਕੁਰਲਾਵੇ
ਲੁੱਛਦਾ ਇਹ ਆਕਾਰ।
ਕੀਕਰ ਤੁਰੀਏ ਮੁੜੀਏ ਕੀਕਰ?
ਪੈਰਾਂ ਹੇਠ ਅੰਗਾਰ!
ਢਾਂਗੀ ਦੇ ਨਾਲ਼ ਸੂਰਜ ਲਾਹ ਕੇ
ਥਲ ਨੂੰ ਜਾਵੋ ਠਾਰ!!
ਪਿੰਡ ਦਿਓ.....!!!
----
ਐਧਰ ਦੁੱਖ ਤੇ ਔਧਰ ਗ਼ਮ ਹਨ
ਜੁ ਹੱਡਾਂ ਨੂੰ ਖਾਂਦੇ।
ਦੋ ਪਲ ਸਾਡੀ ਦਰਦ ਕਹਾਣੀ
ਸੁਣਿਓ ਜਾਂਦੇ ਜਾਂਦੇ।
ਇਕ ਸ਼ਸਕਾਰਾ ਮਾਰੋ ਐਸਾ
ਦੋਵੇਂ ਗ਼ਮ ਸ਼ਸ਼ਕਾਰ!
ਹਾਸੇ ਠੱਠੇ ਮਸ਼ਕਰੀਆਂ ਦੀ
ਪਾਵੋ ਆਣ ਫ਼ੁਹਾਰ!!
ਪਿੰਡ ਦਿਓ.....!!!
----
ਪਿੰਡ ਦਿਓ ਆਜੜੀਓ!
ਹੁਣ ਰੰਗੀਆਂ ਭੇਡਾਂ
ਤੋਰ ਲਿਆਵੋ
ਸੱਤ ਸਮੁੰਦਰੋਂ ਪਾਰ!!
ਨਾਲ਼ੇ ਸਾਨੂੰ ਆਣ ਮਿਲ਼ਾਵੋ
ਆਲੇ-ਭੋਲੇ ਲੇਲੇ ਸਾਡੇ ਯਾਰ!!!
1 comment:
Rangiyan Bhedan kiya bimb vartiya sher sahib ,hakikat varga.pehla paragraph he poori nazam keh giya se.
Post a Comment