ਗੁਰਮੇਲ ਬਦੇਸ਼ਾ - ਗੀਤ

ਕੁਝ ਗ਼ਮ ਤੇਰੇ ਕੁਝ ਗ਼ਮ ਮੇਰੇ...

ਗੀਤ

ਅੱਜ ਆਣ ਬੈਠੇ ਇਹ ਦਿਲ ਦੇ ਵਿਹੜੇ

ਕੁਝ ਗ਼ਮ ਤੇਰੇ ਸੱਜਣਾ ਕੁਝ ਗ਼ਮ ਮੇਰੇ।

ਇੱਕ - ਦੂਜੇ ਦੀ ਹੋਂਦ ਬਾਰੇ ਸੋਚਣ

ਇੱਕ ਦੂਜੇ ਦੇ ਵਾਕਿਫ਼ ਹੋਣਾ ਲੋਚਣ।

ਕਿਉਂ ਮਾਰੂਥਲ ਜਿਹੀ ਜੂਨ ਹੰਢਾਈਏ

ਚੱਲ ਆਪਾਂ ਵੀ ਦਰਿਆ ਬਣ ਜਾਈਏ।

ਹੁਣ ਆਪਸ ਵਿੱਚ ਕਰਨ ਸਲਾਹਵਾਂ

ਸੱਜਣਾ ! ਦੋ ਹੰਝੂ ਤੇਰੇ ਦੋ ਹੰਝੂ ਮੇਰੇ[

ਅੱਜ ਆਣ ਬੈਠੇ ਇਹ ਦਿਲ ਦੇ ਵਿਹੜੇ

ਕੁਝ ਗ਼ਮ ਤੇਰੇ ਮਹਿਰਮ..................

----

ਚੱਲ ਉੱਡ ਪੌਣਾਂ ਸੰਗ ਪ੍ਰਦੇਸੀ ਹੋਈਏ

ਬੱਦਲਾਂ ਦੇ ਕੋਲੇ ਮੀਂਹ ਵਾਂਗੂੰ ਰੋਈਏ।

ਕਿਤੇ ਤਪਸ਼ਾਂ ਵੱਲ ਇੱਕ ਸੁਨੇਹਾ ਘੱਲੀਏ

ਜਾਂ ਫਿਰ ਕੋਈ ਆਪਣਾ ਸਾਗਰ ਮੱਲੀਏ।

ਜਿਸ ਸਤਾਹ ‘ਤੇ ਸਾਡੀ ਜਾਤ ਨਾ ਪੁੱਛੇ

ਮਨਚਾਹੀਆਂ ਲਹਿਰਾਂ ‘ਤੇ ਲਾਈਏ ਡੇਰੇ।

ਅੱਜ ਆਣ ਬੈਠੇ ਨੇ ਦਿਲ ਦੇ ਵਿਹੜੇ

ਕੁਝ ਗ਼ਮ ਤੇਰੇ ਮਹਿਰਮ..................

----

ਹੁਣ ਤੱਕ ਦੋ ਪੁੜਾਂ ‘ਚ ਪੁੜਨਾ ਸਿਖਿਆ

ਖਰਾਸ ਘਰਾਂ ‘ਚ ਰੁੜਨਾ ਤੁਰਨਾ ਸਿਖਿਆ।

ਵੇਖ ਰੁੱਖ ਹਵਾ ਦਾ ਸੀ ਮੁੜਨਾ ਸਿਖਿਆ

ਉੱਖਲੀ ‘ਚ ਸਿਰ ਦੇ ਕੇ ਝੁਰਨਾ ਸਿਖਿਆ।

ਜਦ ਇਹ ਮੌਸਮ ਨੇ ਮੋਹਲੇ ਗੱਡ ਦਿੱਤੇ ਸੀ

ਤੇਰੀ ਮੇਰੀ ਜਿਉਂਦੀ ਲਾਸ਼ ਦੇ ਚਾਰ ਚੁਫੇਰੇ।

ਅੱਜ ਆਣ ਬੈਠੇ ਨੇ ਦਿਲ ਦੇ ਵਿਹੜੇ

ਕੁਝ ਗ਼ਮ ਤੇਰੇ ਮਹਿਰਮ..................

----

ਰੂਹਾਂ ਦੀ ਗੱਲ ਕਰ ਬੈਠੇ ਜਦ ਜਿਸਮਾਂ ਕੋਲੇ

ਮਰਜ਼ ਮਿਲੀ ਨਾ ਬੜੇ ਸੀ ਹੱਡ ਮਾਸ ਫਰੋਲੇ।

ਕੌਣ ਪਹਿਚਾਣੇ ਫੁੱਲ ਤਰੇਲ ਜੈਸਾ ਰਿਸ਼ਤਾ

ਨਾ ਰੂਹ ਦੀ ਜਾਣੇ ਗੁਰਮੇਲ ਕੈਸਾ ਰਿਸ਼ਤਾ।

ਜਿਸਮਾਂ ਨੂੰ ਲੁੱਟਣ ਲੁਟਾਵਣ ਵਾਲੇ ,ਉਂਝ

ਤਾਂ ਮਿਲ ਗਏ ਸੀ ਸਾਨੂੰ ਵੀ ਯਾਰ ਬਥੇਰੇ।

ਅੱਜ ਆਣ ਬੈਠੇ ਨੇ ਦਿਲ ਦੇ ਵਿਹੜੇ

ਕੁਝ ਗ਼ਮ ਤੇਰੇ ਮਹਿਰਮ..................