ਆਸੀ - ਨਜ਼ਮ

ਪਾਰਦਰਸ਼ੀ

ਨਜ਼ਮ

ਚੱਲ

ਕੁਝ ਨਾਮ ਰੱਖੀਏ

ਉਨ੍ਹਾਂ ਬੱਚਿਆਂ ਦੇ

ਜੋ ਸਾਡੇ ਨਹੀਂ

ਸਾਡੇ ਹੀ ਨੇ ਪਰ

.............

ਚੱਲ

ਕੁਝ ਮਹਿਕ ਵੰਡੀਏ

ਜੋ ਸਾਡੇ ਪਾਸ ਨਹੀਂ

ਪਰ

ਹੈ ਤਾਂ ਸਹੀ ਸਾਡੇ ਕੋਲ਼ ਕਿਤੇ

............

ਚੱਲ

ਆਸ਼ਰਮ ਦੇ ਪਰਿੰਦਿਆਂ ਵਾਂਗੂੰ

ਬ੍ਰਹਿਮੰਡ ਦੀ ਸੀਮਾ ਤੋਂ ਵੱਧ ਉੱਡੀਏ

ਜੋ ਸਾਡੀ ਸਮਰੱਥਾ ਨਹੀਂ

ਉੱਡ ਹੀ ਲਵਾਂਗੇ ਪਰ ਫਿਰ ਵੀ

..............

ਚੱਲ

ਕੁਝ ਰੰਗਾਂ ਦਾ ਅਨੁਵਾਦ ਕਰੀਏ

ਕਿਏ ਬੇਬਸ ਦਰਿਆ ‘ਚ

ਕੁਝ ਧੁੱਪ ਦੀ ਕਿਸ਼ਤੀ ਠੇਲ੍ਹੀਏ

ਕਿਸੇ ਧੁਖਦੇ ਘਰ ‘ਚ

ਕੋਈ ਸੁਪਨਾ ਬੀਜੀਏ

............

ਚੱਲ

ਪਿਘਲ਼ਦੀਆਂ ਹਸਰਤਾਂ ਦਾ ਇਤਿਹਾਸ

ਅਣ-ਲਿਖਿਆ ਛੱਡ

ਹੱਸ ਪਈਏ

ਤੇ ਪੀੜ ਨੂੰ

ਫੁੱਲਾਂ ਦੀ ਮਹਿਕ ਵਾਂਗੂੰ ਮਾਣੀਏ

ਇੱਕ ਦੂਜੇ ਨੂੰ

ਜਿਸਮਾਂ ਤੋਂ ਅੱਗੇ ਜਾਣੀਏ!