ਗ਼ਜ਼ਲ
ਕੁਰਸੀ ਦੌੜ 'ਚ ਜਦ ਵੀ ਹੋਊ ਓਹੀ ਸ਼ਾਮਿਲ ਹੋਵੇਗਾ।
ਜੋ ਲੋਕਾਂ ਨੂੰ ਝੂਠੇ ਲਾਰੇ ਲਾਉਣ ਦੇ ਕਾਬਿਲ ਹੋਵੇਗਾ।
-----
ਕੋਸ਼ਿਸ਼ ਕਰਕੇ ਦੇਖ ਜ਼ਰਾ ਤੂੰ, ਅਪਣੀ ਮੰਜ਼ਿਲ ਪਾਉਣੀ ਜੇ,
ਜਿੱਤ ਨਹੀਂ ਤਾਂ 'ਹਾਰ ਦਾ ਕਾਰਨ', ਕੁਝ ਤਾਂ ਹਾਸਿਲ ਹੋਵੇਗਾ।
-----
ਉਸਨੇ ਅਪਣੀ ਰਾਖੀ ਖ਼ਾਤਿਰ, ਐਨੀ ਗਾਰਦ ਰੱਖੀ ਹੈ,
ਸੋਚ ਲਵੋ ਲੋਕਾਂ ਦਾ ਨੇਤਾ, ਕਿੰਨਾ ਬੁਜ਼ਦਿਲ ਹੋਵੇਗਾ।
-----
ਫਿਰ ਤਾਂ ਕਿਸੇ ਬੇਦੋਸ਼ੇ ਨੂੰ ਹੀ, ਟੰਗਿਆ ਜਾਊ ਫਾਂਸੀ 'ਤੇ,
ਜੱਜਾਂ ਦੀ ਟੋਲੀ ਵਿੱਚ ਹੀ ਜੇ, ਬੈਠਾ ਕ਼ਾਤਿਲ ਹੋਵੇਗਾ।
-----
ਤੇਰੀ ਮੰਜ਼ਿਲ ਪੂਰਬ ਹੈ ਤੇ ਮੇਰੀ ਮੰਜ਼ਿਲ ਪੱਛਮ ਹੈ,
ਫੇਰ ਕਿਵੇਂ ਦੱਸ ਤੇਰਾ ਮੇਰਾ ਇਕ ਹੀ ਸਾਹਿਲ ਹੋਵੇਗਾ।
-----
ਪਲ ਵਿਚ ਮੁੱਖੜਾ ਮੋੜ ਗਿਆ ਏ, ' ਭੁੱਲ ਜਾ ਮੈਨੂੰ ' ਕਹਿ ਕੇ ਜੋ,
ਉਹ ਕੀ ਜਾਣੇ ਉਸਨੂੰ ਭੁੱਲਣਾ, ਕਿੰਨਾ ਮੁਸ਼ਕਿਲ ਹੋਵੇਗਾ।
-----
ਕੁੱਖ ਵਿੱਚ ਕਤਲ ਕਰਾ ਕੇ ਧੀ ਨੂੰ, ਪੁੱਤ ਦੇ ਸੁਪਨੇ ਲੈਂਦੀ ਜੋ,
ਐਸੀ ਮਾਂ ਦੇ ਸੀਨੇ ਵਿਚ ਤਾਂ, ਪੱਥਰ ਦਾ ਦਿਲ ਹੋਵੇਗਾ।
-----
ਅਪਣੇ ਆਪ ਤਾਂ ਕੁਝ ਨਈ ਆਉਂਦੈ, ਸਭ ਕੁਝ ਸਿਖਣਾ ਪੈਂਦਾ ਹੈ,
ਉਸਨੂੰ ਮੰਜ਼ਿਲ ਮਿਲਣੀ, ਜਿਸਦਾ ਮੁਰਸ਼ਦ ਕਾਮਿਲ ਹੋਵੇਗਾ।
-----
ਟੇਢੇ-ਮੇਢੇ ਰਾਹਾਂ 'ਤੇ ਵੀ, ਤੁਰਨਾ ਪੈਂਦੈ ਜੀਵਨ ਵਿਚ ,
ਕਦਮ-ਕਦਮ 'ਤੇ ਠੋਕਰ ਖਾਊ, ਜੋ ਵੀ ਗਾਫ਼ਿਲ ਹੋਵੇਗਾ।
-----
ਰਹਿਬਰ ਤਾਂ ਸਮਝਾਉਂਦੇ ਆਏ, ਬੰਦਾ ‘ਬੰਦਾ' ਬਣਿਆ ਨਈ ,
ਆਸ ਨਹੀਂ ਸੀ 'ਮਹਿਰਮ', ਬੰਦਾ ਏਨਾ ਜਾਹਿਲ ਹੋਵੇਗਾ ।
No comments:
Post a Comment