ਡਾ: ਸੁਖਪਾਲ - ਨਜ਼ਮ

ਰੌਲ਼ੇ

ਨਜ਼ਮ

ਸੰਤਾਲ਼ੀ ਦੇ ਰੌਲ਼ਿਆਂ ਵਿਚ

ਉਸਦੀ ਭੈਣ ਚੁੱਕੀ ਗਈ

ਹਵੇਲੀ ਲੁੱਟੀ ਗਈ

.........

ਉਹ ਦੂਜੇ ਮੁਲਕ ਆ ਗਿਆ

ਮੁੱਢ ਤੋਂ ਘਰ ਵਸਾ ਲਿਆ

ਕਾਰੋਬਾਰ ਜਮਾ ਲਿਆ

...........

ਚੁਰਾਸੀ ਦੇ ਰੌਲ਼ਿਆਂ ਵਿਚ

ਉਸਦੀ ਧੀ ਚੁੱਕੀ ਗਈ

ਕੋਠੀ ਲੁੱਟੀ ਗਈ

..........

ਉਹ ਦੂਜੇ ਸੂਬੇ ਆ ਗਿਆ

ਮੁੜ ਮਕਾਨ ਬਣਾ ਲਿਆ

ਬੁਢਾਪੇ ਲਈ ਪ੍ਰਬੰਧ ਕਰ ਲਿਆ

ਸਭ ਕੁਝ ਮੁੜ ‘ਠੀਕ-ਠਾਕ’ ਹੋ ਗਿਆ

............

ਹੁਣ ਉਹ ਛੱਡ ਗਿਆ ਹੈ

ਸੱਥ ਵਿਚ ਬਹਿ ਕੇ ਬੋਲਣਾ ਚਾਲਣਾ

ਅਖ਼ਬਾਰ ਪੜ੍ਹਨਾ ਰੇਡਿਓ ਸੁਣਨਾ

ਜੇ ਕਦੇ ਉਹ ਸੁਣ ਲਵੇ

ਕੋਈ ਕੁੜੀ ਜੰਮਣੋਂ ਪਹਿਲਾਂ

ਜਾਂ ਮਰਨੋਂ ਪਹਿਲਾਂ

ਮਾਰੀ ਗਈ ਹੈ....

.................

ਉਸ ਅੰਦਰ 'ਰੌਲ਼ੇ' ਪੈਣ ਲੱਗ ਜਾਂਦੇ ਹਨ