ਸੁਰਜੀਤ - ਨਜ਼ਮ

ਦੋਸਤੋ! ਜਿਵੇਂ ਕਿ ਕੁਝ ਦਿਨ ਪਹਿਲਾਂ ਮੈਂ ਆਰਸੀ ਤੇ ਇਹ ਸੂਚਨਾ ਪੋਸਟ ਕੀਤੀ ਸੀ ਕਿ ਬਰੈਪਟਨ, ਕੈਨੇਡਾ ਵਸਦੀ ਲੇਖਿਕਾ ਸੁਰਜੀਤ ਜੀ ਨੂੰ ਬ੍ਰੇਨ ਹੈਮਰੇਜ ਹੋਣ ਕਰਕੇ, ਅਗਸਤ ਦੇ ਮਹੀਨੇ ਵਿਚ ਇਕ ਕਠਿਨ ਸਰਜਰੀ ‘ਚੋਂ ਗੁਜ਼ਰਨਾ ਪਿਆ ਸੀ। ਅੱਜ ਉਹਨਾਂ ਨੇ ਸਰਜਰੀ ਤੋਂ ਬਾਅਦ ਪਹਿਲੀ ਵਾਰ ਇਕ ਨਜ਼ਮ ਲਿਖ ਕੇ ਆਰਸੀ ਪਰਿਵਾਰ ਨਾਲ਼ ਸਾਂਝੀ ਕਰਨ ਲਈ ਭੇਜੀ ਹੈ, ਇਸ ਨਜ਼ਮ ਨੂੰ ਸ਼ਾਮਿਲ ਕਰਦਿਆਂ, ਅਸੀਂ ਉਹਨਾਂ ਦੀ ਜਲਦ ਸਿਹਤਯਾਬੀ ਦੀ ਦੁਆ ਕਰਦੇ ਹਾਂ... ਆਮੀਨ! ਸੁਰਜੀਤ ਜੀ ਦਾ ਬੇਹੱਦ ਸ਼ੁਕਰੀਆ।

ਅਦਬ ਸਹਿਤ

ਤਨਦੀਪ ‘ਤਮੰਨਾ’

**********

‘ਜੀਤ’ ਫ਼ਿਰ ਉਗਮੀ ਹੈ !

ਨਜ਼ਮ

ਉਂਝ ਤਾਂ ਹਰ ਪਲ

ਤਨ ਅੰਦਰ

ਕਈ ਸੈੱਲ ਜੰਮਦੇ

ਤੇ ਮਰ ਜਾਂਦੇ !

ਮਨ ‘ਚ

ਕਈ ਖ਼ਿਆਲ ਉਗਮਦੇ

ਤੇ ਹੌਲੀ ਹੌਲੀ ਠਰ ਜਾਂਦੇ !

ਕਈ ਮੌਸਮ ਆਉਂਦੇ

ਤੇ ਨਿਕਲ ਜਾਂਦੇ

ਕਈ ਲੋਕ ਮਿਲਦੇ

ਤੇ ਵਿਛੜ ਜਾਂਦੇ

ਹਾਦਸੇ ਹੁੰਦੇ ਫ਼ਿਰ

ਵਿਸਰ ਜਾਂਦੇ !

ਕੁਛ ਇਸੇ ਤਰ੍ਹਾਂ

ਚਲਦੀ ਹੈ ਜ਼ਿੰਦਗੀ

ਹਾਸਿਆਂ ਤੇ ਹਾਵਿਆਂ ‘ਚ

ਪਲ਼ਦੀ ਹੈ ਜ਼ਿੰਦਗੀ !

.................

ਪਰ ਕੁਛ ਹਾਦਸੇ ਹੁੰਦੇ

ਅੱਗ ਦੇ ਦਰਿਆਵਾਂ ਵਰਗੇ

ਪੀੜਾਂ ਦੀਆਂ ਝਨਾਵਾਂ ਵਰਗੇ

ਅਣਗੌਲ਼ੇ ਪਥਰੀਲੇ ਰਾਹਾਂ ਵਰਗੇ

ਆਉਂਦੇ ਤੇ ਬਸ

ਜ਼ਿੰਦਗੀ ਨਿਗਲ਼ ਜਾਂਦੇ !

ਸੋਚ ਨੂੰ ਨਿਚੋੜ ਦਿੰਦੇ ਨੇ

ਹੋਸ਼ ਨੂੰ ਕਰ ਬੇਹੋਸ਼ ਦਿੰਦੇ ਨੇ

ਹਸਤੀ ਤੁਹਾਡੀ ਬਦਲ ਜਾਂਦੇ ਨੇ

ਤੇ ਜ਼ਿੰਦਗੀ ਰੂਪੀ ਬੋਝ

ਤੁਹਾਡੇ ਲਈ ਛੱਡ ਜਾਂਦੇ !

..........

ਇੰਜ ਹੀ ਇਕ ਦਿਨ

ਕਿਸੇ ਵੀਰਾਨੇ ਰਾਹ ‘ਚ

ਡਿਗ ਪਈ ਸੀ ‘ਜੀਤ’

ਸੱਟ ਇੰਨੀ ਲਗੀ ਕਿ

ਮਿਟ ਗਈ ਸੀ ‘ਜੀਤ’ !

.............

ਤਨ ਵੀ ਸੀ

ਮਨ ਵੀ ਸੀ

ਪਰ ਚੇਤਨਾ ਵਿਸਰ ਗਈ ਸੀ

ਸਾਰੇ ਕੋਲ ਸਨ

ਪਰ ਕੋਲ ਕੋਈ ਨਹੀਂ ਸੀ !

ਤੇ ਫ਼ੇਰ

ਇਕ ਦਿਨ ਅਚਾਨਕ

ਅਕਾਸ਼ੋਂ ਜਿਵੇਂ

ਕੋਈ ਸੁਨੇਹਾ ਆਉਂਦੈ

ਕੰਨ ਵਿਚ ‘ਉਸ ਸੁਹਣੇ’ ਦੀ

ਆਵਾਜ਼ ਸੁਣ

ਉਠ ਪਈ ਸੀ ‘ਜੀਤ’ !

ਸਾਹ ਤਾਂ ਮਿਲੇ ਸਨ

ਪਰ ਬਦਲ ਗਈ ਸੀ ‘ਜੀਤ’ !

...........

ਪੀੜ ਦਾ ਉਹ ਆਲਮ ਸੀ ਕਿ

ਜ਼ਿੰਦਗੀ ਵਿਸਰ ਗਈ ਸੀ

ਪੈਰ ਤਾਂ ਸਨ

ਪਰ ਤੁਰਨਾ ਭੁਲ ਗਈ ਸੀ !

ਹੱਥ ਸਨ

ਪਰ ਲਗਦੇ ਸਨ ਬੇਗਾਨੇ

ਸਮਝ ਆਉਂਦੇ ਸਨ ਹੁਣ -

“ਅਜ ਫ਼ਰੀਦੈ ਕੁਜੜਾ ਸੈ ਕੋਹਾਂ ਥੀਓਮ ”-

ਦੇ ਮਾਇਨੇ !

ਲਗਦੇ ਸੀ ਉਸਨੂੰ

ਜ਼ਿੰਦਗੀ ਦੇ ਹਾਲਾਤ ਬਦਲੇ ਬਦਲੇ

ਸਾਰੇ ਕੰਮ ਲਗਦੇ ਸੀ ਫ਼ਜ਼ੂਲ

ਤੇ ਦੁਨੀਆ ਦੇ ਅਰਥ ਬਦਲੇ ਬਦਲੇ !

..............

ਉਹ ਜੋ ਕਦੇ

ਘਰ ਦਾ ਧੁਰਾ ਹੁੰਦੀ ਸੀ

ਅੱਜ ਬੇਕਾਰ

ਬਿਸਤਰ ਤੇ ਪੈ ਗਈ ਸੀ !

ਜ਼ਮਾਨਾ ਚਲ ਰਿਹਾ ਸੀ

-ਉਸੇ ਤਰ੍ਹਾਂ-

ਬਸ ਉਸ ਦੀ ਹਸਤੀ

ਢਹਿ ਗਈ ਸੀ !

..........

ਸਮਝ ਆਈ ਹੁਣ ਉਸਨੂੰ

ਕਿ ‘ਇਕ ਦਮੀ’ ਹੋਣਾ ਕੀ ਹੁੰਦੈ !

ਦੁਨੀਆ ਧੋਖਾ ਕਿਵੇਂ ਹੈ !

ਸਭ ਕੁਛ ਝੂਠ ਕਿਵੇਂ ਹੈ !

ਆਦਮੀ ਕੁਦਰਤ ਹੱਥੋਂ

ਮਜਬੂਰ ਕਿਵੇਂ ਹੈ !

..........

ਹੌਲੀ ਹੌਲੀ

ਆਹਿਸਤਾ ਆਹਿਸਤਾ

ਫ਼ਿਰ ਉਗਮੀ ਹੈ ‘ਜੀਤ’ !

ਕੋਈ ਨਵੀਂ ਸੋਚ ਲੈਕੇ

ਨਵੇਂ ਰਾਹਾਂ ਤੇ ਤੁਰਨ ਲਈ !