ਗ਼ਜ਼ਲ ਰੋਹ ‘ਚ ਆ ਕੇ ਨਾਅਰਾ ਲਾਇਆ ਚਿੜੀਆਂ ਨੇ ।
ਬਾਜ਼ਾਂ ਨੂੰ ਸੋਚਾਂ ਵਿਚ ਪਾਇਆ ਚਿੜੀਆਂ ਨੇ ।
-----
ਬਾਬਲ ਦਾ ਘਰ ਹੋਵੇ ਜਾਂ ਘਰ ਮਾਹੀ ਦਾ,
ਐਧਰ ਓਧਰ ਸਵਰਗ ਬਣਾਇਆ ਚਿੜੀਆਂ ਨੇ ।
-----
ਇਹਨਾਂ ਨੂੰ ਕਿਉਂ ਕੁੱਖ ਵਿਚ ਮਾਰੀ ਜਾਂਦੇ ਹੋ,
ਯਾਦ ਕਰੋ, ਸੰਸਾਰ ਵਸਾਇਆ ਚਿੜੀਆਂ ਨੇ ।
-----
ਰਾਜ ਇਨ੍ਹਾਂ ਦਾ ਆਵੇ ਦਿਲ ਵਿਚ ਰੀਝ ਬੜੀ,
ਲੋਭ ਕਦੇ ਨਾ ਭਾਵੇਂ ਲਾਇਆ ਚਿੜੀਆਂ ਨੇ ।
-----
ਦਿਲ ਨੂੰ ਇਕ ਚੈਨ ਜਿਹਾ ਤਦ ਆ ਜਾਂਦਾ,
ਜਦ ਵੀ ਮਿੱਠਾ ਗੀਤ ਸੁਣਾਇਆ ਚਿੜੀਆਂ ਨੇ ।
-----
ਲੈਂਟਰ ਤਕ ਤਕ ਬੇਟੀ ਅਕਸਰ ਪੁਛਦੀ ਏ,
ਅਜ ਕਲ੍ਹ ਕਿੱਥੇ ਡੇਰਾ ਲਾਇਆ ਚਿੜੀਆਂ ਨੇ ।
-----
ਆਲੇ ਭੋਲੇ ਰਹਿ ਕੇ ਵਕ਼ਤ ਗੁਜ਼ਾਰੀ ਦਾ,
ਮਾਨਵਤਾ ਨੂੰ ਇੰਜ ਸਮਝਾਇਆ ਚਿੜੀਆਂ ਨੇ ।
-----
ਚੋਗ ‘ਦਬੁਰਜੀ’ ਜੋ ਇਹਨਾਂ ਦਾ ਖਾ ਜਾਂਦਾ,
ਨੇਤਾ ਓਹੀ ਫੇਰ ਬਣਾਇਆ ਚਿੜੀਆਂ ਨੇ ।
No comments:
Post a Comment