ਮੌਸਮ

ਆਰਸੀ ਤੇ ਨਵੀਆਂ ਰਚਨਾਵਾਂ

ਦੋਸਤੋ! ਜਿਵੇਂ ਕਿ ਤੁਸੀਂ ਜਾਣਦੇ ਹੀ ਹੋ ਕਿ ਆਰਸੀ ਨੂੰ Facebook ਅਤੇ Twitter ਨਾਲ਼ ਵੀ ਜੋੜ ਦਿੱਤਾ ਗਿਆ ਹੈ। ਜੇਕਰ ਤੁਹਾਡੇ ਕੋਲ਼ ਇਹਨਾਂ ਸਾਈਟਾਂ ਤੇ ਅਕਾਊਂਟ ਹਨ, ਤਾਂ ਤੁਸੀਂ ਆਰਸੀ ਬਲੌਗ ਨੂੰ ਓਥੋਂ ਵੀ join ਅਤੇ follow ਕਰ ਸਕਦੇ ਹੋ। ਲਿੰਕ ਹੇਠਾਂ ਦਿੱਤੇ ਜਾ ਰਹੇ ਹਨ। ਹੁਣ ਤੱਕ ਤੁਹਾਡੇ ਦਿੱਤੇ ਹਰ ਸਹਿਯੋਗ ਲਈ ਮਸ਼ਕੂਰ ਹਾਂ।
ਅਦਬ ਸਹਿਤ
ਤਨਦੀਪ ਤਮੰਨਾ



Tuesday, June 29, 2010

ਦਾਦਰ ਪੰਡੋਰਵੀ - ਗ਼ਜ਼ਲ

ਗ਼ਜ਼ਲ

ਸ਼ਿਕਨ ਮੱਥੇ ਤੇ ਰੱਤੀ ਭਰ ਵੀ ਦਿਲ ਵਿਚ ਡਰ ਨਹੀਂ ਲੱਭੇ

ਮੇਰੇ ਤੇ ਵਾਰ ਕਰਨੇ ਦੇ ਉਨੂੰ ਅਵਸਰ ਨਹੀਂ ਲੱਭੇ।

------

ਗੁਆਚੇ ਪੰਛੀਆਂ ਦਾ ਆਲ੍ਹਣੇ ਨੂੰ ਹੇਰਵਾ ਜਾਇਜ਼,

ਘਰਾਂ ਦੀ ਕੀ ਕਰੇ ਹੋਣੀ, ਜਿਦ੍ਹੇ ਟੱਬਰ ਨਹੀਂ ਲੱਭੇ।

-----

ਤੁਹਾਡੀ ਪਿਆਸ ਦੀ ਸ਼ਿੱਦਤ ਚ ਹੋਵੇਗੀ ਕਮੀ ਸ਼ਾਇਦ,

ਥਲਾਂ ਵਿਚ ਸੜਦਿਆਂ ਨੂੰ ਜੇ ਅਜੇ ਸਾਗਰ ਨਹੀਂ ਲੱਭੇ।

-----

ਸਫ਼ਰ ਵਿਚ ਕਾਫ਼ਿਲੇ ਦੇ ਨਾਲ ਇਹ ਵੀ ਤਾਂ ਤੁਰੀ ਗਈਆਂ,

ਮਗਰ ਧੁੱਪਾਂ ਤੇ ਛਾਵਾਂ ਨੂੰ ਕਦੇ ਬਿਸਤਰ ਨਹੀਂ ਲੱਭੇ।

-----

ਤੇਰੇ ਪੁੱਛੇ ਸਵਾਲਾਂ ਦਾ ਦਿਆਂ ਉੱਤਰ ਕੀ ਹੁਣ ਤਕ ਤਾਂ,

ਜੋ ਪੁੱਛੇ ਜ਼ਿੰਦਗੀ ਨੇ ਸਨ, ਉਹੀ ਉੱਤਰ ਨਹੀਂ ਲੱਭੇ।

-----

ਉਹ ਅੰਬਰ ਹੈ, ਮੈਂ ਧਰਤੀ ਹਾਂ, ਹੈ ਸਾਡੀ ਨੇੜਤਾ ਫਿਰ ਵੀ,

ਕਿਸੇ ਨੂੰ ਵੀ ਇਹ ਦੂਰੀ ਮਿਣਨ ਦੇ ਮੀਟਰ ਨਹੀਂ ਲੱਭੇ।

-----

ਤੇਰੀ ਤਫ਼ਤੀਸ਼ ਕੀਤੀ ਉੱਤੇ ਉੱਠਣ ਉਂਗਲਾਂ, ਤੈਨੂੰ

ਮਿਲੇ ਸ਼ੀਸ਼ੇ ਦੇ ਹੀ ਟੁਕੜੇ, ਕਿਉਂ ਪੱਥਰ ਨਹੀਂ ਲੱਭੇ।

-----

ਤੇਰਾ ਤਾਂ ਘਰ ਸੀ ਪੱਥਰ ਦਾ, ਸਮੁੰਦਰ ਲੈ ਗਿਆ ਕਿੱਧਰ?

ਕੀ ਹੋਇਆ ਜੇ ਅਸਾਡੇ ਰੇਤਿਆਂ ਦੇ ਘਰ ਨਹੀਂ ਲੱਭੇ।

-----

ਭਿਅੰਕਰ ਤੋਂ ਭਿਅੰਕਰ ਹਾਦਸਾ ਵੀ ਇਸ ਤੋਂ ਬੌਣਾ ਹੈ,

ਮਿਲ਼ੇ ਸਭ ਰਹਿਮ ਦੇ, ਵਿਸ਼ਵਾਸ ਦੇ ਪਾਤਰ ਨਹੀਂ ਲੱਭੇ।

1 comment:

Rajinderjeet said...

ਹਰ ਸ਼ਿਅਰ ਵਿਚ ਨਵਾਂਪਣ ਹੈ , ਬਹੁਤ ਸੁਹਣੀ ਹੈ ਗ਼ਜ਼ਲ !