ਚੰਬੇ ਦੀ ਖ਼ੁਸ਼ਬੋ ਗੀਤ
ਸੱਜਣ ਜੀ,
ਮੈਂ ਚੰਬੇ ਦੀ ਖ਼ੁਸ਼ਬੋ
ਇਕ ਦੋ ਚੁੰਮਣ ਹੋਰ ਹੰਢਾ
ਅਸਾਂ ਉੱਡ-ਪੁੱਡ ਜਾਣਾ ਹੋ...
ਸੱਜਣ ਜੀ,
ਮੈਂ ਚੰਬੇ ਦੀ...
-----
ਧੀ ਬੇਗਾਨੀ ਮੈਂ ਪਰਦੇਸਣ
ਟੁਰ ਤੈਂਡੇ ਦਰ ਆਈ
ਸੈਆਂ ਕੋਹਾਂ ਮੇਰੇ ਪੈਰੀਂ ਪੈਂਡਾ
ਭੁੱਖੀ ਤੇ ਤਿਰਹਾਈ
ਟੁਰਦੇ ਟੁਰਦੇ ਸੱਜਣ ਜੀ
ਸਾਨੂੰ ਗਿਆ ਕੁਵੇਲ਼ਾ ਹੋ...
ਸੱਜਣ ਜੀ,
ਮੈਂ ਚੰਬੇ ਦੀ...
-----
ਸੱਜਣ ਜੀ,
ਅਸਾਂ ਮੰਨਿਆ, ਕਿ
ਹਰ ਸਾਹ ਹੁੰਦਾ ਕੋਸਾ
ਪਰ ਹਰ ਸਾਹ ਨਾ ਚੁੰਮਣ ਬਣਦਾ
ਨਾ ਹਰ ਚੁੰਮਣ ਹੌਕਾ
ਨਾ ਹਰ ਤੂਤ ਦਾ ਪੱਤਰ ਬਣਦਾ
ਰੇਸ਼ਮ ਦੀ ਤੰਦ ਹੋ....
ਸੱਜਣ ਜੀ,
ਮੈਂ ਚੰਬੇ ਦੀ...
-----
ਸੱਜਣ ਜੀ,
ਅਸੀਂ ਚੁੰਮਣ ਦੇ ਗਲ਼
ਕਿਤ ਬਿਧ ਬਾਹੀਂ ਪਾਈਏ
ਜੇ ਪਾਈਏ ਤਾਂ ਫ਼ਜਰੋਂ ਪਹਿਲਾਂ
ਦੋਵੇਂ ਹੀ ਮਰ ਜਾਈਏ
ਸਮਝ ਨਾ ਆਵੇ
ਚੁੰਮਣ ਮਹਿੰਗਾ-
ਜਾਂ ਜਿੰਦ ਮਹਿੰਗੀ ਹੋ...
ਸੱਜਣ ਜੀ,
ਮੈਂ ਚੰਬੇ ਦੀ...
No comments:
Post a Comment