ਗੁਰਤੇਜ ਕੋਹਾਰਵਾਲਾ - ਗ਼ਜ਼ਲ

ਗ਼ਜ਼ਲ
ਸ਼ਹੀਦੀ ਦੇ ਕੇ ਐਸੀ ਖ਼ੁਦ ਨੂੰ ਵੀ ਹੈਰਾਨ ਕਰਦਾ ਹਾਂ।

ਮੈਂ ਅਪਣੇ ਸੀਸ ਨੂੰ ਸਿਰ ਵਾਸਤੇ ਕੁਰਬਾਨ ਕਰਦਾ ਹਾਂ।

ਵਪਾਰੀ ਹੋਣ ਦਾ ਔਖਾ ਹੁਨਰ ਆਇਆ ਨਹੀਂ ਮੈਨੂੰ,

ਲਹੂ ਨੂੰ ਵੇਚ ਕੇ ਪਾਣੀ ਅਜੇ ਪਰਵਾਨ ਕਰਦਾ ਹਾਂ।

ਜਿਵੇਂ ਸ਼ੀਸ਼ੇ ਦੇ ਹੱਥਾਂ ਨਾਲ਼ ਕੋਈ ਤੋੜੇ ਦੀਵਾਰਾਂ,

ਮੈਂ ਖ਼ੁਦ ਨੂੰ ਲਭਦਿਆਂ ਅਪਣਾ ਬੜਾ ਨੁਕਸਾਨ ਕਰਦਾ ਹਾਂ।

ਬੁਝਾ ਕੇ ਆਤਮਾ ਦੀ ਲੋਅ ਝੁਕਾ ਲੈਂਦਾ ਹਾਂ ਨਜ਼ਰਾਂ ਵੀ,

ਮੈਂ ਰਾਤੀਂ ਤਾਰਿਆਂ ਦਾ ਟੁੱਟਣਾ ਆਸਾਨ ਕਰਦਾ ਹਾਂ।

ਮੇਰੀ ਹਉਮੈ ਨੇ ਕਿਸ ਥਾਂ ‘ਤੇ ਲਿਆ ਮੈਨੂੰ ਖੜ੍ਹਾ ਕੀਤਾ,

ਕਿ ਪੈਰਾਂ ਹੇਠਲੀ ਮਿੱਟੀ ‘ਤੇ ਵੀ ਅਹਿਸਾਨ ਕਰਦਾ ਹਾਂ।

ਜਿਨ੍ਹਾਂ ਸਮਿਆਂ ‘ਚ ਮੈਂ ਜ਼ਿੰਦਾ ਹਾਂ, ਕੀ ਬਚਿਆ ਹੈ ਵੇਖਣ ਨੂੰ,

ਸੋ ਅਗਲੀ ਨਸਲ ਨੂੰ ਮੈਂ ਦੋਵੇਂ ਅੱਖਾਂ ਦਾਨ ਕਰਦਾ ਹਾਂ।