ਮਨਦੀਪ ਖੁਰਮੀ ਹਿੰਮਤਪੁਰਾ - ਨਜ਼ਮ

ਇਹ ਵਾਅਦਾ ਰਿਹਾ......!!
ਨਜ਼ਮ

ਤੂੰ ਮਿਲ਼ਣਾ ਨਹੀਂ
ਜਿਉਂ ਮਿਲ਼ਣ ਨਾ
ਪਾਸੇ ਸਿੱਕੇ ਦੇ
ਤੇਰੇ ਹਾਸੇ ਲਈ
ਫਿਰ ਵੀ ਗਲ਼ੀਏਂ
ਵਿਕਦਾ ਰਹਾਂਗਾ।
----
ਤੂੰ ਬਣਕੇ ‘ਕਿਰਨ’ ਸੁਨਹਿਰੀ
ਬਹੁੜੇਂ ਯਾਦਾਂ ਵਿੱਚ,
ਤੇਰੇ ਨ੍ਹੇਰੇ ਰਾਹੀਂ
ਬਣਕੇ ‘ਦੀਪ’ ਮੈਂ....
ਟਿਕਦਾ ਰਹਾਂਗਾ।
----
ਖ਼ੁਦ ਹੀ ਲਿਆ ਫ਼ੈਸਲਾ
ਦੋ ਕਿਰਦਾਰ ਨਿਭਾਉਣੇ ਦਾ,
ਦੱਸ ਭਲਾ ਫਿਰ
ਦੋਸ਼ ਇਹਦੇ ਵਿੱਚ
ਕਿਸਦਾ ਕਹਾਂਗਾ?
----
ਦੁਸ਼ਮਣ ਵੀ ਜੇ ਆਵੇ
ਤੇਰੇ ਗਰਾਂ ਵੱਲੋਂ
ਫੁੱਲਾਂ ਵਾਂਗਰ
ਓਹਦੇ ਪੈਰੀਂ ਵੀ
ਵਿਛਦਾ ਰਹਾਂਗਾ।
----
ਕਿਸੇ ਦੀ ਯਾਦ 'ਚ
ਮਰਨਾ ਵੀ ਤਾਂ
ਬਿਹਤਰ ਜ਼ਿੰਦਗੀ ਤੋਂ,
ਮੱਲ੍ਹਮ ਦੀ ਨਾ ਲੋੜ
ਨਾਸੂਰ ਜਿਉਂ
ਰਿਸਦਾ ਰਹਾਂਗਾ।
----
ਜਦ ਬਣ ਹੀ ਗਈ ਹੈ
ਜ਼ਿੰਦਗੀ ਦੋ ਪੁੜ ਚੱਕੀ ਦੇ
ਤੇਰੀ ਖ਼ਾਤਰ ਤਾਂ
ਫਿਰ ਵੀ ਹੱਸਕੇ
ਪਿਸਦਾ ਰਹਾਂਗਾ।
----
ਦਿਲ ਦੀ ਨੁੱਕਰੇ
ਪਈ ਰਹਿਣ ਦੇਈਂ ਯਾਦ ਮੇਰੀ,
ਏਸੇ ਇਵਜ਼ 'ਚ
ਦਰ-ਦਰ ਤੇਰੇ ਲਈ
ਲਿਫ਼ਦਾ ਰਹਾਂਗਾ।
----
ਤੇਰਾ ਨਾਂ ਮੇਰੇ ਨਾਂ ਵਿੱਚ
ਰਹਿਣਾ ਯੁਗਾਂ ਤਾਈਂ,
ਕਦੇ ਦੇਖੀਂ------------
ਟੁਟਦੇ ਤਾਰਿਆਂ 'ਚੋਂ ਵੀ
ਦਿਸਦਾ ਰਹਾਂਗਾ।
----
ਤੂੰ ਪਛਤਾਵੇਂ ਨਾ
ਸਗੋਂ ਮਾਣ ਕਰੇਂ
ਬੀਤਿਆਂ ਪਲਾਂ ਤੇ,
ਇਹ ਵਾਅਦਾ ਰਿਹਾ-------
ਐਹੋ ਜਿਹੀ ਇਬਾਰਤ,
'ਕਮਲੀਏ'! ਲਿਖਦਾ ਰਹਾਂਗਾ।