ਗੁਰਦਰਸ਼ਨ 'ਬਾਦਲ' - ਗ਼ਜ਼ਲ

ਗ਼ਜ਼ਲ

ਅੰਗ-ਅੰਗ ਦੇ ਵਿਚ ਦੁਖੜੇ ਭਰਦੀ ਜਾਂਦੀ ਹੈ।
ਰੇਤੇ ਦੇ ਵਿਚ ਕਿਸ਼ਤੀ ਤਰਦੀ ਜਾਂਦੀ ਹੈ।
----
ਐਨ ਬਸੰਤ ‘ਚ ਜਿਸ ਨਾਲ਼ ਸਰਦੀ ਜਾਂਦੀ ਹੈ।
ਮਨ ਦੇ ਨਿੱਘ ‘ਚ ਕਾਇਆ ਠਰਦੀ ਜਾਂਦੀ ਹੈ।
----
ਇਕ-ਇਕ ਕਰਕੇ ਵਸਤੂ ਘਰ ਦੀ ਜਾਂਦੀ ਹੈ।
ਹਿੰਮਤ ਪਿੱਛੋਂ ਅਹੁ ਹਮਦਰਦੀ ਜਾਂਦੀ ਹੈ।
----
ਪੈੜਾਂ ਦੇ ਵਿਚ ਪੈੜਾਂ ਧਰਦੀ ਜਾਂਦੀ ਹੈ।
ਫਿਰ ਵੀ ਆਫ਼ਤ ਨਵੀਆਂ ਕਰਦੀ ਜਾਂਦੀ ਹੈ।
----
ਉਲਫ਼ਤ ਵਾਲ਼ੀ ਤੰਦ ਬਿਖਰਦੀ ਜਾਂਦੀ ਹੈ।
ਜਿੰਦ ਗ਼ਮਾਂ ਨੂੰ ਹਸ-ਹਸ ਜਰਦੀ ਜਾਂਦੀ ਹੈ।
----
ਵੇਖ-ਵੇਖ ਕੇ ਬਾਗ ਦੀ ਵਾਅ ਵੀ ਵਿਗੜ ਗਈ,
ਤਿਤਲੀ ਵੀ ਹੁਣ ਡਰਦੀ-ਡਰਦੀ ਜਾਂਦੀ ਹੈ।
----
ਚੰਨ ਦੀ ਆਮਦ ਤੀਕ ਉਡੀਕਾਂ ਨਾ ਰੁਕੀਆਂ,
ਹਸਰਤ ਵੀ ਹੁਣ ਬਾਦਲ'! ਮਰਦੀ ਜਾਂਦੀ ਹੈ।