ਅਜ਼ੀਮ ਸ਼ੇਖਰ - ਗ਼ਜ਼ਲ

ਗ਼ਜ਼ਲ

ਖਲੋਤੇ ਪਾਣੀਆਂ ਅੰਦਰ, ਕੋਈ ਪੱਥਰ ਵਗਾਹ ਦੇਵੇ ।
ਜੋ ਸੁੱਤੀਆਂ ਦੇਰ ਤੋਂ ਲਹਿਰਾਂ, ਕਿਨਾਰੇ ਲਈ ਜਗਾ ਦੇਵੇ।
----
ਸਮੰਦਰ ਹੈ ਕਿਉਂ ਖ਼ਾਰਾ, ਅਸੀਂ ਇਹ ਫੇਰ ਦੱਸਾਂਗੇ,
ਪਹਿਲਾਂ ਗੁਜ਼ਰੇ ਤੂਫ਼ਾਨਾਂ ਨੂੰ, ਕੋਈ ਬਣਦੀ ਸਜ਼ਾ ਦੇਵੇ।
----
ਥਲਾਂ 'ਚੋਂ ਰੇਤ ਦਾ ਕਿਣਕਾ, ਹਵਾ ਨੂੰ ਜੋਦੜੀ ਕਰਦੈ,
ਸਮੁੰਦਰ 'ਤੇ ਲਿਜਾ ਉਸਨੂੰ, ਕਦੇ ਸਿੱਪੀਆਂ 'ਚ ਪਾ ਦੇਵੇ।
----
ਰਹੇ ਹਾਂ ਉਮਰ ਭਰ ਜਲ਼ਦੇ, ਨਾ ਧਰਿਓ ਦੀਪ ਸਿਵਿਆਂ 'ਤੇ,
ਕਰੇ ਅਹਿਸਾਨ ਜੇ ਕੋਈ, ਕਿਤੇ ਮਰੂਆ ਉਗਾ ਦੇਵੇ।
----
ਮੇਰੇ ਪਿੰਡ ਦੀਵਿਆਂ ਵੇਲੇ, ਜੋ 'ਸ਼ੇਖਰ'! ਧੂੜ ਉਡਦੀ ਹੈ,
ਸੁਬਾਹ ਤੀਕਰ ਹਨੇਰੇ ਨੂੰ, ਸਦਾ ਸਰਘੀ ਬਣਾ ਦੇਵੇ।