ਹਰਿਭਜਨ ਸਿੱਧੂ ਮਾਨਸਾ - ਨਜ਼ਮ

ਸਾਹਿਤਕ ਨਾਮ: ਹਰਿਭਜਨ ਸਿੱਧੂ ਮਾਨਸਾ, ਪੰਜਾਬ, ਇੰਡੀਆ
ਅਜੋਕਾ ਨਿਵਾਸ: ਮਾਨਸਾ, ਪੰਜਾਬ
ਕਿੱਤਾ: ਇੰਡੀਅਨ ਆਰਮੀ ‘ਚੋਂ ਸੇਵਾ ਮੁਕਤ
ਕਿਤਾਬਾਂ: (ਵਾਰਤਕ) ਚੜ੍ਹਦੇ ਸੂਰਜ ਦਾ ਭਾਈ (2006), ਸਰਵਰ ਦੇ ਹੰਸ (2007), ਮਿੱਠੜੀ ਅੰਮੀ ਨੂੰ ਨਮਸਕਾਰ(2008) ਅਤੇ (ਬਾਲ ਸਾਹਿਤ) ਨਿੱਕੜੇ ਤਾਰੇ , ਵਿਹੜੇ ਵਸਣ ਸਭਨਾਂ ਦੇ (ਅਨੁਵਾਦ) ਭੂਪੇਂਦਰ ਕੀ ਸ਼ਰੇਸ਼ਠ ਕਵਿਤਾਏਂ (1993) ਛਪ ਚੁੱਕੀਆਂ ਹਨ।
---
ਦੋਸਤੋ! ਰਾਜਸਥਾਨ ਨਿਵਾਸੀ, ਲੇਖਕ ਗੁਰਮੀਤ ਬਰਾੜ ਜੀ ਨੇ ਹਰਿਭਜਨ ਸਿੱਧੂ ਜੀ ਦੀ ਇੱਕ ਬੇਹੱਦ ਖ਼ੂਬਸੂਰਤ ਨਜ਼ਮ ਆਰਸੀ ਲਈ ਭੇਜੀ ਹੈ। ਮੈਂ ਉਹਨਾਂ ਦੀ ਤਹਿ-ਦਿਲੋਂ ਮਸ਼ਕੂਰ ਹਾਂ। ਮੈਂ ਸਾਰੇ ਪਾਠਕ/ ਲੇਖਕ ਦੋਸਤਾਂ ਵੱਲੋਂ ਸਿੱਧੂ ਸਾਹਿਬ ਨੂੰ ‘ਆਰਸੀ’ ਦੀ ਅਦਬੀ ਮਹਿਫ਼ਲ ‘ਚ ਖ਼ੁਸ਼ਆਮਦੀਦ ਆਖਦੀ ਹੋਈ ਅੱਜ ਉਹਨਾਂ ਦੀ ਨਜ਼ਮ ਨੂੰ ‘ਆਰਸੀ’ ਤੇ ਪੋਸਟ ਕਰਨ ਦਾ ਮਾਣ ਹਾਸਲ ਕਰ ਰਹੀ ਹਾਂ। ਬਹੁਤ-ਬਹੁਤ ਸ਼ੁਕਰੀਆ!

-------

ਮਾਂ ਦੀ ਟਿਉਸ਼ਨ

ਨਜ਼ਮ

ਮਾਂ ਕਿਹਾ ਕਰਦੀ ਸੀ

ਧੀਏ !

ਰਾਤ ਨੂੰ ਸਾਰੇ ਜੂਠੇ ਭਾਂਡੇ

ਮਾਂਜ ਸੰਵਾਰ ਕੇ

ਪੈਂਦੀਆਂ ਨੇ ਸਚਿਆਰੀਆਂ !

ਕਹਿੰਦੇ ਨੇ , ਰਾਤ ਨੂੰ ਬਰਤਨ ਭਾਂਡੇ

ਗੰਗਾ-ਸ਼ਨਾਨ ਨੂੰ ਜਾਂਦੇ ਨੇ !

-ਤੇ

ਪਾਕ ਪਵਿੱਤਰ ਹੋ ਕੇ

ਰਸੋਈਆਂ ‘ਚ ਆਣ ਟਿਕਦੇ ਨੇ !

ਜੇ ਕੋਈ ਬਰਤਨ ,

ਕਿਸੇ ਕੁੱਢਰ ਦੀ

ਘੌਲ਼ ਕਾਰਣ ਕਿਤੇ

ਮਾਂਜਣ ਖੁਣੋਂ ਰਹਿ ਜਾਵੇ

ਉਹ ਗੰਗਾ ਸ਼ਨਾਨ ਤੋਂ

ਵਾਂਝਾ ਰਹਿ ਜਾਂਦੈ

ਸਰਾਪ ਪਿਆ ਦਿੰਦਾ ਹੈ ਸਾਰੀ ਰਾਤ

ਉਸ ਕੁੱਢਰ ਨੂੰ !

ਤੇ ਮੈਂ ਮਾਂ ਦੀ ਇਸ ਟਿਉਸ਼ਨ ‘ਚੋਂ

ਹਮੇਸ਼ਾ ਉਸ ਦੀ ਲੁਪਤ ਦਾਰਸ਼ਨਿਕਤਾ ਨੂੰ

ਲਭਦੀ,ਹੈਰਾਨ ਹੋਈ ਹੋਈ ਹੀ

ਸਾਰੇ ਜੂਠੇ ਭਾਂਡੇ

ਮਾਂਜ ਧਰਦੀ ਹਾਂ!