ਗ਼ਜ਼ਲ ਬਹਾਰਾਂ ਵਿਚ ਅਦਾ ਹੋਇਆ ਜਦੋਂ ਗੁਲਜ਼ਾਰ ਦਾ ਮੌਸਮ।
ਘਟਾ ਸਾਵਣ ਦੀ ਲੈ ਕੇ ਆ ਗਈ ਹੈ ਪਿਆਰ ਦਾ ਮੌਸਮ।
-----
ਰਹੇ ਅਹਿਸਾਸ ਤੇਰੀ ਮਹਿਕ ਦਾ ਦਿਲ ਵਿਚ ਸਦਾ ਮੇਰੇ,
ਫ਼ਜ਼ਾ ਸਾਰੀ ‘ਚ ਛਾਇਆ ਹੈ ਜਿਵੇਂ ਇਕ਼ਰਾਰ ਦਾ ਮੌਸਮ।
-----
ਉਹ ਅਪਣੇ ਨਾਂ ਨੂੰ ਮੇਰੇ ਦਿਲ ਤੇ ਲਿਖ ਕੇ ਮੁਸਕਰਾਈ ਜਦ,
ਮੇਰੀ ਰਗ ਰਗ ‘ਚ ਜੋਗੀ ਹੋ ਗਿਆ ਇਤਬਾਰ ਦਾ ਮੌਸਮ।
-----
ਮੁਹੱਬਤ ਤਾਂ ਸਦਾ ਹੈ ਜ਼ਿੰਦਗੀ ਦੀ, ਨਾ ਦਬਾ ਇਸ ਨੂੰ,
ਗੁਜ਼ਰ ਨਾ ਜਾਏ ਸੋਚਾਂ ਵਿਚ ਕਿਤੇ ਗੁਲਜ਼ਾਰ ਦਾ ਮੌਸਮ।
-----
ਬੜਾ ਖ਼ੁਸ਼ਰੰਗ ਹੋਵੇਗਾ ਮਿਲ਼ਨ ਦੇ ਰੰਗ ਦਾ ਜਲਵਾ,
ਜੇ ਕਰ ਐਨਾ ਸੁਹਾਵਾ ਹੈ ਉਹਦੇ ਇਨਕਾਰ ਦਾ ਮੌਸਮ।
-----
ਉਤਰ ਜਾਂਦਾ ਹੈ ਫਿਰ ਅਹਿਸਾਸ ਮੇਰਾ ਬੇਖ਼ੁਦੀ ਅੰਦਰ,
ਜਦੋਂ ਸੀਨੇ ‘ਚ ਮਚਲੇ ਯਾਰ ਦੇ ਇਜ਼ਹਾਰ ਦਾ ਮੌਸਮ।
-----
ਛਿੜੀ ਹੈ ਰੂਹ ਵਿਚ ਐਸੀ ਮਿਲ਼ਨ ਦੇ ਲੁਤਫ਼ ਦੀ ਸਰਗਮ,
ਬੜਾ ਦਿਲਸ਼ਾਦ ਹੈ ਨਜ਼ਰਾਂ ‘ਚ ਹੁਣ ਦੀਦਾਰ ਦਾ ਮੌਸਮ।
No comments:
Post a Comment