ਸ਼ਬਦੋ ਤੁਸੀਂ ਆਉਣਾਨਜ਼ਮ
ਸ਼ਬਦੋ ਤੁਸੀਂ ਆਉਣਾ
ਚੁੱਪ-ਚਾਪ, ਸਹਿਜ-ਸਹਿਜ
ਬਨੇਰੇ ‘ਤੇ ਆ ਬੈਠੇ ਤੇ ਫ਼ਿਰ ਉੱਡ ਗਏ ਕਬੂਤਰਾਂ ਵਾਂਗ
ਨਿੱਕੀ-ਨਿੱਕੀ ਗੁਟਰ-ਗੂੰ ਕਰਦੇ...
..............
ਹਨੇਰੀ ਵਾਂਗ ਨਾ ਆਉਣਾ
ਕਿ ਮੈਨੂੰ ਕਿਸੇ ਵਾਦ ਦੀ ਛੱਤ ਹੇਠ ਲੁਕਣਾ ਪਵੇ
ਜਾਂ ਕਿਸੇ ਵਿਵਾਦ ਦਾ ਟਾਹਣ ਫੜਨਾ ਪਵੇ...
............
ਤੁਸੀਂ ਆਉਣਾ ਰੁਮਕਦੀ ਵਾਅ ਵਾਂਗ
ਜਿਹੜੀ ਪਿੰਡੇ ਨੂੰ ਲੱਗੇ ਤੇ ਅੱਖਾਂ ਬੰਦ ਹੋ ਹੋ ਜਾਣ
ਮਨ ਦੀਆਂ ਬਾਰੀਆਂ ਖੁੱਲ੍ਹ ਖੁੱਲ੍ਹ ਜਾਣ
ਫੁੱਲਾਂ ਦੀ ਮਹਿਕ ਨੂੰ
ਮੇਰੇ ਅੰਦਰ ਆਉਣ ਲਈ ਰਾਹ ਮਿਲ਼ੇ...
...........
ਤੁਸੀਂ ਆਉਣਾ ਉਸ ਸਰੂਰ ਵਾਂਗ
ਜਿਸ ਤੋਂ ਮਗਰੋਂ ਜਿਉਣ ਦਾ ਡਰ ਨਹੀਂ ਰਹਿੰਦਾ
ਜਿਸ ਮਗਰੋਂ ਸਹਿਜ ਹੋ ਜਾਂਦਾ ਏ
ਹਰ ਸ਼ਾਮੀਂ – ਵਾਲ਼ਾਂ ਨੂੰ ਫੁੱਲਾਂ ਨਾਲ਼ ਗੁੰਦ ਲੈਣਾ
ਪਰ ਫੁੱਲਾਂ ਨੂੰ ਅਜਾਈਂ ਤੋੜਨ ਵਾਲ਼ੀ
ਕਲਾਈ ਫੜ ਕੇ ਰੋਕ ਲੈਣਾ....
............
ਸ਼ਬਦੋ ਸੋਹਣਿਓ!
ਤੁਸੀਂ ਲਗਾਂ-ਮਾਤਰਾਂ ਦੀਆਂ ਤਣੀਆਂ ਨਾਲ਼ ਬੱਝੇ
ਮਜ਼ਦੂਰਾਂ ਵਾਂਗ ਨਾ ਆਉਣਾ
ਤੁਸੀਂ ‘ਗਗਨ ਮੈ ਥਾਲ’ ਗਾਉਂਦੇ ਹੋਏ ਆਉਣਾ
ਜਾਂ ਆਉਣਾ ਕਿਸੇ ਪਰਮ ਪੁਰਖ਼ ਦੇ ਤੀਰ ਵਾਂਗ...
.............
ਤੁਸੀਂ ਆਉਣਾ ਉਸ ਟਾਹਣੀ ਵਾਂਗ
ਜਿਹੜੀ ਲਾਸਾਂ ਨਹੀਂ-
ਫੁੱਲ ਪਿੱਛੇ ਛੱਡ ਜਾਂਦੀ ਏ....
................
ਮੇਰੇ ਆਪਣਿਓ!
ਤੁਸੀਂ ਇਉਂ ਆਉਣਾ
ਕਿ ਤੁਹਾਨੂੰ ਗਾਉਂਦਿਆਂ
ਮੈਂ ਆਪਣੇ ਆਪ ਤੀਕ ਅੱਪੜ ਜਾਵਾਂ....
3 comments:
Wah bai ji dil ander uutar gayi nazam, Ehsaas di shidatt nu khoob pehchaneya hai tusi........darshan Darvesh
बहुत सुन्दर कविता ! मैं इसका हिंदी अनुवाद अपने किसी ब्लॉग में लगाऊँगा। कवि का सम्पर्क सूत्र मिल जाए अथवा परिचय तो बहुत अच्छा हो।
सुभाष नीरव
09810534373
www.setusahitya.blogspot.com
www.kathapunjab.blogspot.com
www.srijanyatra.blogspot.com
ਡਾ. ਸਾਹਿਬ ਤੁਸੀਂ ਹਰ ਵਾਰ ਚੌਕਾ-ਛੱਕਾ ਮਾਰ ਜਾਂਦੇ ਹੋ। ਤੁਸੀਂ ਮੇਰੇ ਮਨਪਸੰਦ ਕਵੀਆਂ ਦੀ ਲਿਸਟ ਵਿਚ ਸ਼ਾਮਲ ਹੋ ਗਏ ਹੋ। ਤੁਹਾਡੀਆਂ ਕਵਿਤਾਵਾਂ ਦੀ ਹਮੇਸ਼ਾ ਉਡੀਕ ਰਹੇਗੀ .....।
Post a Comment