ਗ਼ਜ਼ਲਦਿਲ ਦਿਆਂ ਜ਼ਖ਼ਮਾਂ ਤੋਂ ਫੇਹੇ ਵੀ ਉਠਾ ਕੇ ਲੈ ਗਈ।
ਪੁਛ ਨਾ ਮੇਰਾ ਹਵਾ ਕੀ-ਕੀ ਉਡਾ ਕੇ ਲੈ ਗਈ।
-----
ਤਿੜਕਿਓ ਰਿਸ਼ਤੇ ਦੇ ਟੁਕੜੇ ਸਾਂਭ ਕੇ ਬੈਠਾ ਹਾਂ ਮੈਂ,
ਜੋ ਵੀ ਕੁਝ ਉਸ ਦਾ ਸੀ, ਉਹ ਆਈ, ਗਿਣਾ ਕੇ ਲੈ ਗਈ।
-----
ਕੌਣ ਨਹੀ ਨ੍ਹੇਰੇ ਤੋਂ ਡਰਦਾ, ਨ੍ਹੇਰ ਆਖਰ ਨ੍ਹੇਰ ਹੈ,
ਸ਼ਾਮ ਨੂੰ ਕੀ, ਰਾਤ ਮੇਰਾ ਦਿਲ ਜਲ਼ਾ ਕੇ ਲੈ ਗਈ।
-----
ਹੱਕ਼ ਦੀ ਨਾ ਆਸ ਰਖ, ਇਨਸਾਫ਼ ਦੀ ਨਾ ਮੰਗ ਕਰੀਂ,
ਅੱਜ ਬੋਤਲ ਸਾਰੀਆਂ ਵੋਟਾਂ ਪੁਆ ਕੇ ਲੈ ਗਈ।
-----
ਜ਼ਿੰਦਗੀ ਮੇਰੀ ਦੇ ਪੰਨੇ ਕੁਝ ਅਜੇ ਸਨ ਅਣਪੜ੍ਹੇ,
ਜ਼ਿੰਦਗੀ ਮੇਰੀ ਬੜੇ ਸਦਮੇ ਲੁਕਾ ਕੇ ਲੈ ਗਈ।
-----
ਉਹ ਸੀ ਪਰਲੇ ਪਾਰ ਦੀ ਤੇ ਮੈਂ ਸਾਂ ਉਰਲੇ ਪਾਰ ਦਾ,
ਮੈਨੂੰ ਚਾਹਤ ਓਸ ਦੀ, ਹੱਦਾਂ ਟਪਾ ਕੇ ਲੈ ਗਈ।
-----
ਜ਼ਿੰਦਗੀ ਦੇ ਇਸ ਕਿਨਾਰੇ ਬੈਠ ਕੇ ਗਿਣਦਾ ਹਾਂ ਮੈਂ,
ਮੇਰਾ ਹੁਣ ਤਕ ਇਹ ਨਦੀ ਕੀ-ਕੀ ਵਹਾ ਕੇ ਲੈ ਗਈ।
