ਗ਼ਜ਼ਲਚਾਨਣ ਬਣ ਕੇ ਰਾਹਾਂ ਦੇ ਵਿਚ ਜੁੜਿਆ ਕਰ।
ਕੰਡਾ ਬਣ ਕੇ ਪੈਰਾਂ ਵਿਚ ਨਾ ਪੁੜ੍ਹਿਆ ਕਰ।
-----
ਕਿਸ ਨੂੰ ਏਥੇ ਖੰਭ ਜੁੜੇ ਪਰਵਾਜ਼ ਲਈ,
ਪੈਰਾਂ ਵਾਲ਼ੇ, ਸੋਚਾਂ ਵਿਚ ਹੀ ਉੜਿਆ ਕਰ।
-----
ਨਵੇਂ ਜ਼ਖ਼ਮ ਲਈ ਦਿਲ ਵਿਚ ਜਗ੍ਹਾ ਬਣਾਇਆ ਕਰ।
ਬੀਤੇ ਵਕ਼ਤ ਦੇ ਵਹਿਣਾਂ ਵਿਚ ਨਾ ਰੁੜ੍ਹਿਆ ਕਰ।
-----
ਬਹੁਤ ਪਈ ਏ ਮਾਰ ਬਥੇਰੀ ਪੈਣੀ ਏਂ,
ਕਿਉਂ ਪਈ ਏ ਮਾਰ, ਤੂੰ ਉਸਨੂੰ ਗੁੜ੍ਹਿਆ ਕਰ।
-----
ਚੰਗੇ ਬੰਦੇ ਈ, ਚੰਗੇ ਚੰਗੇ ਲਗਦੇ ਨੇ,
ਨਫ਼ਰਤ, ਨਿੰਦਿਆ, ਚੁਗਲੀ ਕੋਲ਼ੋਂ ਥੁੜਿਆ ਕਰ।
-----
ਦੂਜੇ ਪਾਸੇ ਕੌਣ ਆ ਰਿਹਾ, ਦਿਸਦਾ ਨਹੀਂ,
ਮੋੜਾਂ ਉੱਤੋਂ ਸੰਭਲ਼ ਸੰਭਲ਼ ਕੇ ਮੁੜਿਆ ਕਰ।
-----
ਬੇਸ਼ੱਕ ਦਿਲ ਵਿਚ ਗ਼ਮ ਨੇ ਫਿਰ ਵੀ ਹੱਸਿਆ ਕਰ।
ਥੁੜਿਆ ਹੋਇਆ, ਐਵੇਂ ਹੋਰ ਨਾ ਕੁੜ੍ਹਿਆ ਕਰ।
