ਗੀਤਵੱਜਦੇ ਸੀ ਢੋਲ ਜਦੋਂ ਆਉਂਦੀ ਸੀ ਵਿਸਾਖੀ,
ਕਰਦਾ ਸੀ ਕੌਣ ਓਦੋਂ ਫਸਲਾਂ ਦੀ ਰਾਖੀ,
ਅੱਜ ਵਾੜ ਹੀ ਖੇਤ ਨੂੰ ਖਾਂਦੀ.. ..
ਤੂੰ ਆ ਕੇ ਦੇਖ ਵਾਜਾਂ ਵਾਲ਼ਿਆ ,
ਤੇਰੀ ਕੌਮ ਹੈ ਕਿਧਰ ਨੂੰ ਜਾਂਦੀ....!
---
ਅੱਜ ਭਾਈ ਨਾ ਭਾਈ ਨੂੰ ਦੇਖ ਜਰਦਾ,
ਹੋਇਆ ਘਰ ਵਿੱਚ ਚੋਰ ਹੁਣ ਘਰਦਾ,
ਅੱਜ ਹੋਵੇ ਕਾਣੀ ਵੰਡ, ਰਲੀ ਚੋਰਾਂ ਨਾਲ ਪੰਡ,
ਜਾਵੇ ਸੱਗੀ ਨਾਲ ਰੁੜ੍ਹਦੀ ਪਰਾਂਦੀ.. .. ..
ਤੂੰ ਆ ਕੇ ਦੇਖ...................!
----
ਏਥੇ ਕੋਈ ਨਾ ਘਨ੍ਹਈਆ ਬਣੇ ਸਾਰੇ ਸ੍ਰਦਾਰ,
ਨਾ ਕੋਈ ਮੰਨੇ ਕਹਿਣਾ ਬਣੇ ਸਾਰੇ ਲਾਣੇਦਾਰ,
ਪਈ ਆਪੋ ਧਾਪੀ ਸਾਰੇ, ਸਾਰੇ ਹੋਣ ਪੁੱਠੇ ਕਾਰੇ,
ਦੇਖ ਸ਼ਾਨ ਕਿਵੇਂ ਪੈਂਦੀ ਜਾਂਦੀ ਮਾਂਦੀ.. .. ..
ਤੂੰ ਆ ਕੇ ਦੇਖ...................!
---
ਮੇਹਰ ਕਰ ਮੇਰੇ ਦਾਤਾ ਮਿੱਠਾ ਅੰਮ੍ਰਿਤ ਹੋਵੇ,
ਭਾਈ ਮਾਰ ਜੰਗ ਰੱਬ ਕਰਕੇ ਖੜੋਵੇ,
ਦੇਹ ਇਨ੍ਹਾਂ ਨੂੰ ਸੁਮੱਤ, ਤਾਂਹੀ ਬੱਚਦੀ ਐ ਪੱਤ,
ਜਿਹੜੀ ਅੱਜ ਰਾਣੀ ਬਣੂੰ ਕੱਲ੍ਹ ਬਾਂਦੀ.. ...
ਤੂੰ ਆ ਕੇ ਦੇਖ...................!
----
ਜੇ ਤੇਰੇ ਰਾਹ ਦੇ ਪਹਿਰੇਦਾਰ ਕਰੀਂ ਗਏ ਇੰਜ ਕਾਰੇ,
‘ਜਸਵੀਰ ਝੱਜ‘ ਜਿਹੇ ਰੁਲ਼ ਜਾਣਗੇ ਵਿਚਾਰੇ,
ਅਸੀਂ ਮਾਤ ਪਾਉਣੇ ਬਾਜ,ਹੋਵੇ ਚਿੜੀਆਂ ਦਾ ਰਾਜ,
ਨਾ ਲੈਣੇ ਹੀਰੇ, ਮੋਤੀ, ਸੋਨਾ,ਚਾਂਦੀ .. .. ..
ਤੂੰ ਆ ਕੇ ਦੇਖ...................!
