ਇਹ ਨਜ਼ਮ ਸਤਿਕਾਰਯੋਗ ਤਾਇਆ ਜੀ ਮਰਹੂਮ ਸ: ਬਖ਼ਤਾਵਰ ਸਿੰਘ 'ਦਿਓਲ' ਜੀ ਦੀ ਯਾਦ ਨੂੰ ਸਮਰਪਿਤ ਹੈ। ਡੈਡੀ ਜੀ ਨੇ 'ਦਿਓਲ' ਸਾਹਿਬ ਦੀ ਇਹ ਕਿਤਾਬ ਖ਼ਜ਼ਾਨੇ ਵਾਂਗ ਸਾਂਭੀ ਹੋਈ ਹੈ।
ਅਧੂਰੀ ਕਥਾ
ਨਜ਼ਮ
ਬੁੱਕਲ਼ ਦੇ ਵਿੱਚ ਗ਼ਮ ਦਾ ਦੀਵਾ
ਚਾਦਰ ਅੱਧੋਰਾਣੀ।
ਨਾ ਤੂੰ ਸਾਡੀ ਪੀੜ ਪਛਾਣੀ
ਨਾ ਹੁਣ ਦੱਸੀ ਜਾਣੀ।
ਪੌਣਾਂ ਹੱਥ ਸੁਨੇਹੇ ਘੱਲੇ
ਪੌਣਾਂ ਜੋਗੇ ਰਹਿ ਗਏ,
ਨਿਹੁੰ ਦਾ ਬੂਟਾ ਕੀਕਣ ਉੱਗੇ
ਨਾ ਮਿੱਟੀ ਨਾ ਪਾਣੀ?
ਕਿੱਥੇ ਤੇਰੇ ਮੋਹ ਦੀਆਂ ਨਦੀਆਂ
ਕਿੱਥੇ ਮਮਤਾ-ਜਲ ਮਿੱਠਾ?
ਵਿਲਕੇ, ਰਸ ਦਾ ਪਿਆਲਾ ਮੰਗੇ
ਧਰਤੀ ਧੀ ਧਿਆਣੀ।
ਜਦ ਵੀ ਕੋਈ ਗੱਲ ਛਿੜੀ ਹੈ
ਮੈਥੋਂ ਗੱਲ ਛਿੜੀ ਹੈ,
ਤੈਂ ਤਾਂ ਆਪਣੇ ਹੋਠਾਂ ਉੱਤੇ
ਰੱਖੀ ਸਿੱਲ ਪਾਸ਼ਾਣੀ।
ਮੈਂ ਬੇ-ਜ਼ਰ ਨੂੰ ਤੇਰੇ ਜ਼ਰ ਨੇ
ਬੂੰਦ-ਬੂੰਦ ਪੀ ਲੀਤਾ,
ਮਿਹਨਤ ਸਦਾ ਕਹਾਵੇ ਮੂਰਖ
ਗੋਲਕ ਸਦਾ ਸਿਆਣੀ।
ਤੂੰ ਨਾ ਮਿਲ਼ਿਆ ਮੈਂ ਨਾ ਤੁਰਿਆ
ਇੰਤਜ਼ਾਰ ਵਿੱਚ ਬੀਤੀ,
ਬਹੁਤ ਲੰਮੇਰਾ ਪੰਧ ਮਾਰ ਗਏ
ਤੇਰੇ ਮੇਰੇ ਹਾਣੀ।
ਮਨ ਦੀ ਧੂਣੀ ਹੋਰ ਮਘੀ ਹੈ
ਚਿੰਤਨ-ਬੱਤੀ ਚਿਲਕੀ,
ਜਦ ਵੀ ਕੋਈ ਹੌਂਕਾ ਲੰਘਿਆ
ਮੇਰੇ ਹੱਡਾਂ ਥਾਣੀਂ।
ਮੈਂ ਤੇ ਤੂੰ ਪਾਤਰ ਸਾਂ ਦੋਵੇਂ
ਹੋਂਦ ਮੇਰੀ ਤਾਂ ਵਿੰਨਸੀ,
ਤੇਰਾ ਮੂੰਹ ਵੀ ਕਿਤੇ ਨਾ ਦਿਸਦਾ
ਸਿਰਜਾਂ ਕਿਵੇਂ ਕਹਾਣੀ।
4 comments:
Dad ne ajj bahut saalan baad sahit khazana kholeya tan mainu Deol saheb di kitaab de darshan hoye..Thanks Dad..:)
Bachpan ch jadon kadey Taya ji Deol saheb aundey hundey si tan ohna de kol ikk briefcase ch koi na koi kitaab zaroor hundi si..raat nu Dad ne te Deol saheb ne kaav mehfil saja laini...Mainu odon samjh ghatt si..par mainu yaad hai ke mera interest dekh ke Taya ji ne bahut vaar aakheya si ke ..Beta tu ikk din zaroor likheingi...
ਮਨ ਦੀ ਧੂਣੀ ਹੋਰ ਮਘੀ ਹੈ
ਚਿੰਤਨ-ਬੱਤੀ ਚਿਲਕੀ,
ਜਦ ਵੀ ਕੋਈ ਹੌਂਕਾ ਲੰਘਿਆ
ਮੇਰੇ ਹੱਡਾਂ ਥਾਣੀਂ।
Taya ji nu yaad kardeyaan...
Tamanna
Bakhtavar Singh Deol sahib di Nazam be-haad khoobsoorat hea, kine sade shabdan vich ohna ne aapni rooh di gaal kiti hea... vaah
"baddal de vich gam da deeva,
chadar adhorani,
na tu saadi peer pashani,
na hun dassi jaani"
is nu hi tan kehnde ne rooh chon hoi shairi.... ihna dian hor v rachnavan 'Arsi' de paathkan lai zarur pesh karo ji..........
ਤਨਦੀਪ ਜੀ
ਸਾਹਿਤ ਪ੍ਰਤੀ ਤੁਹਾਡਾ ਅਥਾਹ ਸ਼ੌਂਕ, ਲਗਨ ਤੇ ਮਿਹਨਤ ਦੇਖ ਕੇ ਮੈਨੂੰ ਬੜੀ ਖ਼ੁਸ਼ੀ ਹੋਈ ਹੈ। ਦਿਓਲ ਸਾਹਿਬ ਦੀ ਕਵਿਤਾ ਪੜ੍ਹ ਕੇ ਆਨੰਦ ਆ ਗਿਆ; ਸ਼ਾਇਰੀ ਤੁਹਾਨੂੰ ਵਿਰਸੇ 'ਚ ਮਿਲ਼ੀ ਜਾਪਦੀ ਹੈ।
ਗੁਰਨਾਮ ਗਿੱਲ
ਯੂ.ਕੇ.
Post a Comment