ਗੁਰਿੰਦਰਜੀਤ - ਨਜ਼ਮ

ਤਰੱਕੀ
ਨਜ਼ਮ

ਤਿੰਨ ਦੋਸਤ
'ਅਸੀਂ', 'ਸਾਡਾ', 'ਸਾਨੂੰ'
ਘਰੋਂ ਰਿਜ਼ਕ ਲਈ ਨਿੱਕਲੇ
ਵਿਦੇਸ਼ੀ ਸਿਟੀਜ਼ਨਸ਼ਿੱਪ ਲੈ ਕੇ
ਬਣ ਗਏ
'ਮੈਂ', 'ਮੇਰਾ', 'ਮੈਨੂੰ'।
ਫਿਰ ਇੱਕਲੀ ਰਹਿ ਗਈ
ਵਿਚਾਰੀ 'ਦੋਸਤੀ'
ਉਸ ਨੇ ਵੀ ਮੇਮਾਂ ਵਾਂਗ
ਡਾਈਵੋਰਸ ਮੰਗ ਲਿਆ।
ਹੁਣ ਉਹ 'ਮਿਸਟਰ ਬਿਜ਼ਨਸ' ਨਾਲ
ਡਾਊਨਟਾਊਨ 'ਚ
'ਅਪਾਰਟਮੈਂਟ' ਸ਼ੇਅਰ ਕਰਦੀ ਹੈ।

=========

ਚਮਕਦਾ ਭਵਿੱਖ
ਨਜ਼ਮ
ਉੱਲੂ ਵਾਂਗ
ਰਾਤ ਦੀ ਸ਼ਿਫਟ 'ਚ
ਕੰਮ ਕਰਦਾ ਹਾਂ
ਚਾਮਚੜਿੱਕ ਵਾਂਗ
ਜਿੱਥੇ ਵੀ ਡਾਲਰ ਮਿਲ਼ੇ
ਜੁੜ ਜਾਂਦਾ ਹਾਂ
ਬਗਲੇ ਵਾਂਗ
ਮਚਲਾ ਹੋ ਹੋ ਮੱਛੀਆਂ ਲਪਕਦਾ ਹਾਂ
ਸੱਪ ਬਣ ਬਣ
ਦੁਧ ਦੇ ਦਰਿਆ ਪੀ ਜਾਂਦਾ ਹਾਂ
ਮੈ' ਲੂੰਬੜ, ਇੱਲ੍ਹ, ਕਾਂ
ਜਾਣੀ ਬੰਦੇ ਨੂੰ ਛੱਡ ਕੇ
ਸਭ ਕੁਝ ਹੀ ਹਾਂ।
ਕਿਉਂ ਕੇ ਕੰਪਨੀ ਨੂੰ ਹੁਣ
ਬੰਦਿਆਂ ਦੀ ਲੋੜ ਨਹੀਂ
ਇਸੇ ਕਰਕੇ
ਆਫ਼ਿਸ ਵਿੱਚ
ਮੇਰੀ ਬਹੁਤ ਡੀਮਾਂਡ ਹੈ
ਮੈਂ ਹਰ ਰੋਲ 'ਚ ਹੀ
ਨਿਪੁੰਨ ਹਾਂ
ਕੰਪਨੀ ਦਾ ਸਟਾਕ
ਤੇ ਮੇਰਾ ਭਵਿੱਖ
ਦੋਂਵੇ 'ਬਰਾਈਟ' ਨੇ॥