ਕੁੜੀਆਂ ਕਦੋਂ ਹੱਸਦੀਆਂ ਨੇ... ਨਜ਼ਮ
ਹਤਿਆਰਿਆਂ ਵਾਂਗ ਜ਼ਿੱਦ ਨਾ ਕਰੋ
ਚਿੜੀਆਂ ਨੂੰ ਕਮਰਿਆਂ ਵਿੱਚ ਕੈਦ ਕਰੋਗੇ
ਤੜਫ਼ ਤੜਫ਼
ਉਹ ਮਰ ਜਾਣਗੀਆਂ-
........................
ਉਹ ਉੱਡਣਾ ਚਾਹੁੰਦੀਆਂ ਨੇ
ਖੁੱਲ੍ਹੇ ਅਸਮਾਨਾਂ ਵਿੱਚ
ਉਹ ਵੱਡੇ ਘੁੱਟ ਭਰਨੇ ਚਾਹੁੰਦੀਆਂ ਨੇ
ਤਾਜ਼ਗੀ ਭਰੀ ਹਵਾ ਦੇ
.................
ਉਹ ਚਹਿਕਣਾ ਚਾਹੁੰਦੀਆਂ ਨੇ
ਮਹਿਕਾਂ ਭਰੇ ਮੌਸਮਾਂ ਵਿੱਚ
ਉਹ ਟਹਿਕਣਾ ਚਾਹੁੰਦੀਆਂ ਨੇ
ਖੁਸ਼ਬੋ ਭਰੇ ਫੁੱਲਾਂ ਵਾਂਗ
..................
ਹੁੰਮਸ ਭਰੀ ਜ਼ਿੰਦਗੀ ‘ਚ
ਲੰਬੀ ਔੜ ਬਾਅਦ,
ਜਦ
ਬਰਖਾ ਰੁੱਤ ਆਉਂਦੀ ਹੈ
ਵਰ੍ਹਿਆਂ ਤੋਂ ਬੁੱਲ੍ਹਾਂ ‘ਤੇ ਲੱਗੇ ਜੰਦਰੇ
ਜਦ
ਅਚਾਨਕ ਟੁੱਟਣ ਲੱਗਦੇ ਹਨ
ਮਨ ਦੇ ਦਰਪਣ ‘ਚ ਤੱਕਿਆਂ
ਆਪਣਾ ਹੀ ਚਿਹਰਾ
ਗੁਲਾਬ ਦੇ ਫੁੱਲ ਵਾਂਗ
ਜਦ
ਖਿੜ ਉੱਠਦਾ ਹੈ
ਕੁੜੀਆਂ.....
ਉਦੋਂ ਹੱਸਦੀਆਂ ਨੇ...!
1 comment:
सुखिंदर जी दी इह कविता वी मन नूँ छोहदीं है।
Post a Comment