ਲਹਿਰਾਂ
ਗੀਤ
ਲਹਿਰਾਂ, ਉਛਲ ਉਛਲ ਕੇ ਆਣ।
ਲਹਿਰਾਂ, ਮਚਲ ਮਚਲ ਕੇ ਆਣ।
-----
ਨੀਲੇ ਜਲ ਦੇ ਸੀਨੇ ਉੱਤੇ
ਇਕ ਦੂਜੀ ਦੀਆਂ ਬਾਹਾਂ ਫੜਕੇ
ਝੁੰਮਰ ਕੋਈ ਪਾਣ।
ਲਹਿਰਾਂ, ਮਚਲ ਮਚਲ ਕੇ....
-----
ਨਚ ਨਚ ਪਾਗਲ ਹੋਈਆਂ ਹੀਰਾਂ
ਵੰਝਲੀ ਦੀ ਮਿਠੜੀ ਲੈ ਸੁਣ ਕੇ
ਝੂੰਮ ਝੂੰਮ ਲਹਿਰਾਣ।
ਲਹਿਰਾਂ, ਮਚਲ ਮਚਲ ਕੇ...
-----
ਥਕ ਥਕ ਜਾਵਣ ਪੈਰ ਇਨ੍ਹਾਂ ਦੇ
ਕੰਢੇ ਦੀਆਂ ਬਾਹਾਂ ਵਿਚ ਸੌਂ ਕੇ
ਹਿੱਕੜੀ ਨੂੰ ਗਰਮਾਣ।
ਲਹਿਰਾਂ, ਮਚਲ ਮਚਲ ਕੇ...
-----
ਰਾਤੀਂ ਇਹਨਾਂ ਦੇ ਵਿਹੜੇ ਅੰਦਰ
ਚੰਨ-ਚਾਨਣੀ, ਤਾਰੇ ਦੀ ਲੋਅ
ਮਿੱਠਾ-ਮਿੱਠਾ ਮੁਸਕਾਣ।
ਲਹਿਰਾਂ, ਮਚਲ ਮਚਲ ਕੇ...
-----
ਚਿੱਟੀਆਂ ਚਿੱਟੀਆਂ ਚੰਨ ਦੀਆਂ ਰਿਸ਼ਮਾਂ
ਲਹਿਰਾਂ ਦੇ ਸੀਨੇ ਨੂੰ ਚੁੰਮ ਕੇ
ਪਰਛਾਵੀਂ ਲੁਕ ਜਾਣ।
ਲਹਿਰਾਂ, ਮਚਲ ਮਚਲ ਕੇ...
-----
ਜਦ ਸਮੀਰ ਦਾ ਬੁੱਲਾ ਆਵੇ
ਜਾਗ ਪੈਣ ਅੰਗੜਾਈ ਲੈ ਕੇ
ਅੱਧ-ਸੁੱਤੇ ਅਰਮਾਨ।
ਲਹਿਰਾਂ, ਮਚਲ ਮਚਲ ਕੇ...
-----
ਸੂਹੀਆਂ ਸੂਹੀਆਂ ਸੂਰਜ-ਕਿਰਨਾਂ
ਲਹਿਰਾਂ ਦੇ ਕੋਮਲ ਹੋਠਾਂ ਨੂੰ
ਰੰਗਲੀ ਸੁਰਖ਼ੀ ਲਾਣ।
ਲਹਿਰਾਂ, ਮਚਲ ਮਚਲ ਕੇ...
-----
ਆ ਵੇ ਮਾਹੀ! ਹਾਂ ਨੀ ਚੰਨੀਏ!
ਲਹਿਰਾਂ ਤੇ ਕੰਢਿਆਂ ਦੇ ਵਾਂਗੂੰ
ਪਾ ਲਈਏ ਪਹਿਚਾਣ।
ਲਹਿਰਾਂ, ਮਚਲ ਮਚਲ ਕੇ...
No comments:
Post a Comment