ਮੌਸਮ

ਆਰਸੀ ਤੇ ਨਵੀਆਂ ਰਚਨਾਵਾਂ

ਦੋਸਤੋ! ਜਿਵੇਂ ਕਿ ਤੁਸੀਂ ਜਾਣਦੇ ਹੀ ਹੋ ਕਿ ਆਰਸੀ ਨੂੰ Facebook ਅਤੇ Twitter ਨਾਲ਼ ਵੀ ਜੋੜ ਦਿੱਤਾ ਗਿਆ ਹੈ। ਜੇਕਰ ਤੁਹਾਡੇ ਕੋਲ਼ ਇਹਨਾਂ ਸਾਈਟਾਂ ਤੇ ਅਕਾਊਂਟ ਹਨ, ਤਾਂ ਤੁਸੀਂ ਆਰਸੀ ਬਲੌਗ ਨੂੰ ਓਥੋਂ ਵੀ join ਅਤੇ follow ਕਰ ਸਕਦੇ ਹੋ। ਲਿੰਕ ਹੇਠਾਂ ਦਿੱਤੇ ਜਾ ਰਹੇ ਹਨ। ਹੁਣ ਤੱਕ ਤੁਹਾਡੇ ਦਿੱਤੇ ਹਰ ਸਹਿਯੋਗ ਲਈ ਮਸ਼ਕੂਰ ਹਾਂ।
ਅਦਬ ਸਹਿਤ
ਤਨਦੀਪ ਤਮੰਨਾ



Thursday, December 24, 2009

ਪ੍ਰੋ: ਜਸਪਾਲ ਘਈ - ਗ਼ਜ਼ਲ

ਗ਼ਜ਼ਲ

ਸਿਰਾਂ ਦੇ ਬੋਝ ਨੇ ਰੂਹਾਂ ਨੂੰ ਬੇਖ਼ਮ ਹੋਣ ਨਾ ਦਿੱਤਾ।

ਸਿਧਾਰਥ ਹੋਣ ਦੀ ਕੋਸ਼ਿਸ਼ ਨੇ ਗੌਤਮ ਹੋਣ ਨਾ ਦਿੱਤਾ।

-----

ਜ਼ਿਰ੍ਹਾ ਅੰਦਰ ਦੀ ਨੇ ਰੱਖਿਆ ਕਟਹਿਰੇ ਵਿਚ ਹਮੇਸ਼ਾ ਹੀ,

ਜ਼ਿਰ੍ਹਾ ਬਾਹਰ ਦੀ ਨੇ ਮੰਨਿਆਂ ਕਿ ਮੁਜਰਮ ਹੋਣ ਨਾ ਦਿੱਤਾ।

-----

ਨ ਬੇਲਾ ਸੀ, ਨ ਕੱਚਾ ਸੀ, ਨ ਥਲ ਭਖਦਾ, ਨ ਜੰਡ ਕੋਈ,

ਨਜ਼ਰ ਆਪਣੀ ਨੇ ਹੀ ਮਹਿਰਮ ਨੂੰ ਮਹਿਰਮ ਹੋਣ ਨਾ ਦਿੱਤਾ।

-----

ਜਹੰਨਮ ਵਿਚ ਅਸਾਂ ਜੰਨਤ ਦੇ ਕੁਝ ਸੁਪਨੇ ਬਿਖੇਰੇ ਸਨ,

ਇਨ੍ਹਾਂ ਨੇ ਹੀ ਜਹੰਨਮ ਨੂੰ ਜਹੰਨਮ ਹੋਣ ਨਾ ਦਿੱਤਾ।

-----

ਵਿਦਾਈ ਤੇ ਨ ਬਦਸ਼ਗਨੀ ਕੋਈ ਹੋਵੇ, ਇਸੇ ਡਰ ਤੋਂ,

ਦਿਲੋਂ ਰੋਏ ਬੜਾ, ਪਰ ਅੱਖ ਨੂੰ ਨਮ ਹੋਣ ਨਾ ਦਿੱਤਾ।

No comments: