ਮੌਸਮ

ਆਰਸੀ ਤੇ ਨਵੀਆਂ ਰਚਨਾਵਾਂ

ਦੋਸਤੋ! ਜਿਵੇਂ ਕਿ ਤੁਸੀਂ ਜਾਣਦੇ ਹੀ ਹੋ ਕਿ ਆਰਸੀ ਨੂੰ Facebook ਅਤੇ Twitter ਨਾਲ਼ ਵੀ ਜੋੜ ਦਿੱਤਾ ਗਿਆ ਹੈ। ਜੇਕਰ ਤੁਹਾਡੇ ਕੋਲ਼ ਇਹਨਾਂ ਸਾਈਟਾਂ ਤੇ ਅਕਾਊਂਟ ਹਨ, ਤਾਂ ਤੁਸੀਂ ਆਰਸੀ ਬਲੌਗ ਨੂੰ ਓਥੋਂ ਵੀ join ਅਤੇ follow ਕਰ ਸਕਦੇ ਹੋ। ਲਿੰਕ ਹੇਠਾਂ ਦਿੱਤੇ ਜਾ ਰਹੇ ਹਨ। ਹੁਣ ਤੱਕ ਤੁਹਾਡੇ ਦਿੱਤੇ ਹਰ ਸਹਿਯੋਗ ਲਈ ਮਸ਼ਕੂਰ ਹਾਂ।
ਅਦਬ ਸਹਿਤ
ਤਨਦੀਪ ਤਮੰਨਾ



Thursday, January 21, 2010

ਅਜਾਇਬ ਚਿਤ੍ਰਕਾਰ - ਗ਼ਜ਼ਲ

ਗ਼ਜ਼ਲ

ਸ਼ਾਖ਼ੋਂ ਟੁੱਟੇ, ਉਡ-ਉਡ ਥੱਕੇ, ਥਕ-ਥਕ ਹਾਰੇ ਪੀਲ਼ੇ ਪੱਤ।

ਮਿਲ਼ਿਆ ਨਹੀਂ ਟਿਕਾਣਾ, ਭਟਕਣ ਬਿਨਾ ਸਹਾਰੇ ਪੀਲ਼ੇ ਪੱਤ।

-----

ਏਹੋ ਹੀ ਸਨ ਸੁਪਨ ਸੁਹਾਣੇ ਰੁੰਡ-ਮਰੁੰਡ ਹੋਈਆਂ ਸ਼ਾਖ਼ਾਂ ਦੇ,

ਇਹੋ ਬਹਾਰਾਂ ਦੀ ਕੁਖ ਵਿਚ ਸਨ ਪਲ਼ਦੇ ਪਿਆਰੇ ਪੀਲ਼ੇ ਪੱਤ।

-----

ਕੱਲ੍ਹ ਤੀਕਰ ਜੋ ਜਿੰਦ ਜਨ ਸਨ ਖਿੜੀਆਂ ਬਾਗ਼ ਬਹਾਰਾਂ ਦੀ,

ਥਾਂ-ਥਾਂ ਮਿੱਟੀ ਵਿਚ ਉਹ ਰੁਲ਼ ਗਏ ਕਿਸਮਤ ਮਾਰੇ, ਪੀਲ਼ੇ ਪੱਤ।

-----

ਸਾਵੀ ਗੰਦਲ਼, ਕੈਲ, ਕਰੁੰਬਲ਼, ਗੋਭ, ਲਗਰ ਨੂੰ ਹਰ ਪਿਆਰੇ,

ਕੋਈ ਦਿਲ ਕਿਧਰੇ ਨਾ ਲੱਭਾ ਜਿਸਨੇ ਪਿਅਰੇ ਪੀਲ਼ੇ ਪੱਤ।

-----

ਧਰਤੀ ਤੇ ਆਕਾਸ਼ ਨੂੰ ਇਕ ਦਿਨ ਮਿਲ਼ਕੇ ਏਹੀ ਮੱਲਣਗੇ,

ਝੱਖੜ ਦਾ ਰਾਹ ਦੇਖ ਰਹੇ ਨੇ ਹੁਣ ਤਾਂ ਸਾਰੇ ਪੀਲ਼ੇ ਪੱਤ।

-----

ਭਾਵੇਂ ਹਨ ਇਹ ਬਿਨਾ ਸਹਾਰੇ ਪਰ ਇਹ ਨਹੀਂ ਨਕਾਰੇ ਮੂਲ,

ਇਕ ਨਾ ਇਕ ਦਿਨ ਕਰਕੇ ਰਹਿਣਗੇ ਹੁਣ ਤਾਂ ਕਾਰੇ ਪੀਲ਼ੇ ਪੱਤ।

------

ਆਕੀ ਅੱਜ ਬਹਾਰਾਂ ਤੋਂ ਹਨ ਤੇ ਹਨ ਬਾਗ਼ੀ ਬਾਗ਼ਾਂ ਤੋਂ,

ਬਣ ਚੁੱਕੇ ਹਨ ਅੱਜ ਬਗ਼ਾਵਤ ਦੇ ਅੰਗਿਆਰੇ ਪੀਲ਼ੇ ਪੱਤ।

No comments: