ਮੌਸਮ

ਆਰਸੀ ਤੇ ਨਵੀਆਂ ਰਚਨਾਵਾਂ

ਦੋਸਤੋ! ਜਿਵੇਂ ਕਿ ਤੁਸੀਂ ਜਾਣਦੇ ਹੀ ਹੋ ਕਿ ਆਰਸੀ ਨੂੰ Facebook ਅਤੇ Twitter ਨਾਲ਼ ਵੀ ਜੋੜ ਦਿੱਤਾ ਗਿਆ ਹੈ। ਜੇਕਰ ਤੁਹਾਡੇ ਕੋਲ਼ ਇਹਨਾਂ ਸਾਈਟਾਂ ਤੇ ਅਕਾਊਂਟ ਹਨ, ਤਾਂ ਤੁਸੀਂ ਆਰਸੀ ਬਲੌਗ ਨੂੰ ਓਥੋਂ ਵੀ join ਅਤੇ follow ਕਰ ਸਕਦੇ ਹੋ। ਲਿੰਕ ਹੇਠਾਂ ਦਿੱਤੇ ਜਾ ਰਹੇ ਹਨ। ਹੁਣ ਤੱਕ ਤੁਹਾਡੇ ਦਿੱਤੇ ਹਰ ਸਹਿਯੋਗ ਲਈ ਮਸ਼ਕੂਰ ਹਾਂ।
ਅਦਬ ਸਹਿਤ
ਤਨਦੀਪ ਤਮੰਨਾ



Tuesday, August 31, 2010

ਹਰਬੰਸ ਮਾਛੀਵਾੜਾ - ਗ਼ਜ਼ਲ

ਗ਼ਜ਼ਲ

ਇਸ ਦਿਆਂ ਰਾਹਾਂ ਚ ਭਾਵੇਂ ਲੱਖ ਪੱਥਰ ਹੋਣਗੇ।

ਜ਼ਿੰਦਗੀ ਦੇ ਮਰਹਲੇ ਹਰ ਹਾਲ ਵਿਚ ਸਰ ਹੋਣਗੇ।

-----

ਇੱਕ ਨਾ ਇਕ ਦਿਨ ਸਕਾਰਥ ਹੋਣਗੇ ਅਪਣੇ ਯਤਨ,

ਇੱਕ ਨਾ ਇਕ ਦਿਨ ਤਾਂ ਇਹ ਹਾਲਾਤ ਬਿਹਤਰ ਹੋਣਗੇ।

-----

-----

ਐ ਨਜੂਮੀ! ਹੱਥ ਮੇਰਾ ਹੋਰ ਗੌਹ ਦੇ ਨਾਲ਼ ਵੇਖ,

ਕੁਝ ਕੁ ਤਾਂ ਇਸ ਤੇ ਸਜੀਲੇ ਸ਼ੋਖ਼ ਅੱਖਰ ਹੋਣਗੇ।

-----

ਕੀ ਪਤਾ ਸੀ ਖਾਣ-ਖੇਡਣ ਦੀ ਨਸ਼ੀਲੀ ਰੁੱਤ ਵਿਚ,

ਮੇਰੇ ਸਾਹਵੇਂ ਹੀ ਮਿਰੇ ਚਾਵਾਂ ਦੇ ਸੱਥਰ ਹੋਣਗੇ।

-----

ਤਾਂ ਹੀ ਮੇਲ੍ਹੇਗੀ ਗ਼ਜ਼ਲ ਦੀ ਲਹਿਰ ਇਹਨਾਂ ਤੇ ਕੁਈ,

ਮਨ ਦੇ ਕੁੱਜੇ ਵਿੱਚ ਜੇ ਸੋਚਾਂ ਦੇ ਸਾਗਰ ਹੋਣਗੇ।

-----

ਜ਼ਿੰਦਗੀ ਗੁਜ਼ਰੇਗੀ ਛੱਲਾਂ ਦੀ ਦਯਾ ਦੇ ਆਸਰੇ,

ਜੇ ਸਮੁੰਦਰ ਦੇ ਕਿਨਾਰੇ ਰੇਤ ਦੇ ਘਰ ਹੋਣਗੇ।

-----

ਫੇਰ ਹੀ ਸਜਣੀ, ਸੰਵਰਨੀ, ਮੌਲਣੀ ਹੈ ਜ਼ਿੰਦਗੀ

ਆਪਣੇ ਹੱਥਾਂ ਚ ਜਦ ਅਪਣੇ ਮੁਕ਼ੱਦਰ ਹੋਣਗੇ।

=====

ਗ਼ਜ਼ਲ

ਫੇਰ ਕੀ ਜੇਕਰ ਤਿਰੀ ਮਹਿਫ਼ਿਲ ਚ ਮੇਰੀ ਥਾਂ ਨਹੀਂ।

ਅਪਣਾ ਹਸਤਾਖ਼ਰ ਹਾਂ ਮੈਂ ਵੀ, ਹੋਰਨਾਂ ਦੀ ਛਾਂ ਨਹੀਂ।

-----

ਨਜ਼ਰ ਕੀਤੇ ਨੇ ਬਥੇਰੇ ਛਾਂ ਦੇ ਤੋਹਫ਼ੇ ਧਰਤ ਨੂੰ,

ਫੇਰ ਕੀ ਜੇ ਹੁਣ ਮਿਰੇ ਪੱਤੇ ਨਹੀਂ, ਸ਼ਾਖ਼ਾਂ ਨਹੀਂ।

-----

ਆਖ ਉਸ ਥਾਂ ਨੂੰ ਕਿਵੇਂ ਗੁਲਸ਼ਨ ਕਹਾਂ ਮੈਂ ਜਿਸ ਜਗ੍ਹਾ,

ਫੁਲ ਨਹੀਂ, ਭੌਰੇ ਨਹੀਂ, ਕੋਇਲ ਨਹੀਂ, ਕਲੀਆਂ ਨਹੀਂ।

-----

ਐ ਸਿਆਸਤ! ਹੋਰ ਕੀ ਨੇ ਹੋਛੇ ਹਥਕੰਡੇ ਤਿਰੇ,

ਸਭਿਅਤਾ ਦੇ ਸੋਹਲ ਪਿੰਡੇ ਤੇ ਅਗਰ ਲਾਸਾਂ ਨਹੀਂ।

-----

ਵਾ ਵਗੀ ਜਾਪੇ ਮਸ਼ੀਨੀ ਦੌਰ ਦੀ ਪਿੰਡਾਂ ਚ ਵੀ,

ਮੋਹ ਨਹੀਂ, ਤਾਂਘਾਂ ਨਹੀਂ, ਸੱਥਾਂ ਨਹੀਂ, ਸਾਂਝਾਂ ਨਹੀਂ।

-----

ਮੰਨਿਆ ਮਜਬੂਰੀਆਂ ਨੇ ਹੋਂਠ ਸੀਤੇ ਨੇ ਮਿਰੇ,

ਇਸ ਦਾ ਮਤਲਬ ਇਹ ਨਹੀਂ ਮਨ ਵਿਚ ਮਿਰੇ ਰੀਝਾਂ ਨਹੀਂ।

No comments: