ਮੌਸਮ

ਆਰਸੀ ਤੇ ਨਵੀਆਂ ਰਚਨਾਵਾਂ

ਦੋਸਤੋ! ਜਿਵੇਂ ਕਿ ਤੁਸੀਂ ਜਾਣਦੇ ਹੀ ਹੋ ਕਿ ਆਰਸੀ ਨੂੰ Facebook ਅਤੇ Twitter ਨਾਲ਼ ਵੀ ਜੋੜ ਦਿੱਤਾ ਗਿਆ ਹੈ। ਜੇਕਰ ਤੁਹਾਡੇ ਕੋਲ਼ ਇਹਨਾਂ ਸਾਈਟਾਂ ਤੇ ਅਕਾਊਂਟ ਹਨ, ਤਾਂ ਤੁਸੀਂ ਆਰਸੀ ਬਲੌਗ ਨੂੰ ਓਥੋਂ ਵੀ join ਅਤੇ follow ਕਰ ਸਕਦੇ ਹੋ। ਲਿੰਕ ਹੇਠਾਂ ਦਿੱਤੇ ਜਾ ਰਹੇ ਹਨ। ਹੁਣ ਤੱਕ ਤੁਹਾਡੇ ਦਿੱਤੇ ਹਰ ਸਹਿਯੋਗ ਲਈ ਮਸ਼ਕੂਰ ਹਾਂ।
ਅਦਬ ਸਹਿਤ
ਤਨਦੀਪ ਤਮੰਨਾ



Saturday, October 2, 2010

ਗੁਰਚਰਨ ਰਾਮਪੁਰੀ - ਦੋਹੇ

ਦੋਹੇ

ਸਿਰ ਦੀ ਮੰਨਦੈਂ ਤੂੰ ਸਦਾ, ਮਾੜੀ ਨਹੀਂ ਇਹ ਗੱਲ।

ਜਿੱਧਰ ਨੂੰ ਦਿਲ ਤੋਰਦਾ, ਕਦੇ ਤਾਂ ਓਧਰ ਵੱਲ।

-----

ਦੇਖੇ ਦੁੱਖ ਬੇਗਾਨੜੇ, ਮੱਤਾਂ ਦਿੱਤੀਆਂ ਢੇਰ।

ਜਦ ਅਪਣੇ ਤੇ ਆ ਪਈ, ਮੱਤ ਮਾਰੀ ਗਈ ਫੇਰ।

-----

-----

ਪਰਖਹੀਣ ਵਿਸ਼ਵਾਸ ਹੈ, ਪਰਖੋਂ ਡਰੇ ਫ਼ਰੇਬ।

ਪਰਖ ਨਾ ਕਰਦਾ ਲਾਈ-ਲੱਗ, ਨੂਰੋਂ ਖ਼ਾਲੀ ਜੇਬ।

-----

ਸਿਆਣੇ ਸੱਜਣ ਸਾਹਮਣੇ ਅਪਣਾ ਸੀਸ ਝੁਕਾ।

ਕਰਕੇ ਖੁਣਸੀ ਈਰਖਾ, ਹਿਰਦਾ ਨਾ ਤੜਪਾ।

-----

ਅਪਣਾ ਆਪ ਪਛਾਣ ਕੇ, ਅੱਧੀ ਜੰਗ ਤਾਂ ਜਿੱਤ।

ਮਿਥ ਕੇ ਟੀਚਾ ਫ਼ਤਿਹ ਦਾ, ਫੇਰ ਟਿਕਾ ਲੈ ਚਿੱਤ।

-----

ਗ਼ਰਜ਼ ਸੁਰੀਲਾ ਬੋਲਦੀ, ਧਰ ਨ ਉਸ ਤੇ ਕੰਨ।

ਅੰਤਕਹਨ ਪੁਕਾਰਦਾ, ਉਸਦਾ ਕਹਿਣਾ ਮੰਨ।

-----

ਹਾਜ਼ਰ ਨਾਜ਼ਰ ਸੁੰਦਰਤਾ, ਦਰਸ਼ਨ ਹੁੰਦੇ ਝੱਬ।

ਸਾਥ, ਸ਼ਾਂਤੀ, ਸਿਹਤ, ਸੁਖ, ਮਿਲ਼ਦੇ ਨਾਲ਼ ਸਬੱਬ।

-----

ਸੁਪਨੇ ਨੂੰ ਨਾ ਬੁਝਣ ਦੇ, ਮੱਸਿਆ ਵਕ਼ਤੀ ਹਾਰ।

ਤਾਰਾ-ਮੰਡਲ ਟਿਮਕਦਾ, ਕੋਈ ਨਾ ਅੰਤ ਸ਼ੁਮਾਰ।

-----

ਸਾਹ ਬੀਤੇ ਸੱਜਣ ਗਏ, ਪਰਛਾਵੇਂ ਭਰਮਾਉਣ।

ਮੇਰੇ ਮਨ ਦੀਆਂ ਉਲਝਣਾਂ, ਸੁਪਨੇ ਬਣ ਕੇ ਆਉਣ।

-----

ਨੀਂਦਰ, ਮਾਇਆ, ਮਾਣ, ਮੋਹ, ਕੁਝ ਨਾ ਸੁਪਨੇ ਤੁੱਲ।

ਸੁਪਨਾ ਅਸੀਂ ਖ਼ਰੀਦਿਆ, ਡਾਢੇ ਮਹਿੰਗੇ ਮੁੱਲ।

-----

ਹਸ ਨਾ ਪਹਿਲਾਂ ਸਮੇਂ ਤੋਂ, ਮੁੱਕਣ ਤਾਂ ਦੇ ਗੱਲ।

ਸ਼ਾਇਦ ਹੁੰਝੂ ਵਹਿ ਤੁਰਨ, ਡੂੰਘਾ ਅੰਤੇ ਸੱਲ।

-----

ਸ਼ਾਇਰ ਨਾ ਪੜ੍ਹ, ਸ਼ੇਅਰ ਪੜ੍ਹ, ਭੁੱਲ ਕਰਤਾ ਦੀ ਜ਼ਾਤ।

ਪਰਖਣ ਪਾਠਕ ਪੁਰਖ ਜਦ, ਹੁਨਰੀ ਬਾਜ਼ੀ ਮਾਤ।

-----

ਤਾਰੇ ਜੁਗਨੂੰ ਸ਼ਾਸਤਰ, ਤੇਰੇ ਆਲ਼ ਦੁਆਲ਼।

ਜੇ ਚਾਹੇਂ ਮਨ ਚਾਨਣਾ, ਅਪਣਾ ਦੀਵਾ ਬਾਲ਼।

------

ਗ਼ੁੱਸਾ ਪਾਪ ਗਿਆਨ ਲਈ, ਝੂਠਾ ਗ਼ੁੱਸੇ-ਖ਼ੋਰ।

ਲੱਭੇ ਜਦੋਂ ਦਲੀਲ ਨਾ, ਸਿੱਧੜ ਭੜਕੇ ਹੋਰ।

-----

ਮਨ ਕਪਟੀ ਮਿਥਿਆ ਕਥਨ, ਸਿੱਧੀ ਅੱਖ ਵੀ ਕਾਣ।

ਸਾਹਵੇਂ ਤੱਕ ਵੀ ਮੁੱਕਰੇ, ਨੀਤੀ ਖੋਟੀ ਬਾਣ।

1 comment:

rup said...

ਗੁਰਚਰਨ ਰਾਮਪੁਰੀ ਜੀ ਦੋਹੇ ਸੱਚ ਬਿਆਨਣ 'ਚ ਕਾਮਜਾਬ ਰਹੇ ਨੇ -ਰੂਪ ਦਬੁਰਜੀ