ਡਾ: ਸੁਖਪਾਲ - ਨਜ਼ਮ

ਉਹ ਆਉਂਦੀ ਹੈ...

ਨਜ਼ਮ

ਉਹ ਆਉਂਦੀ ਹੈ

ਮੇਰੇ ਘਰ

ਜਦ ਜੀਅ ਚਾਹੇ

ਆਪਣੇ ਮਾਂ-ਬਾਪ

ਭਰਾ-ਪਤੀ-ਪੁੱਤਰ ਦੇ

ਘਰ ਵਾਂਗ ਨਹੀਂ-

ਆਪਣੇ ਘਰ ਵਾਂਗ

ਬਿਨ ਪੁੱਛਿਆਂ

ਬਿਨ ਦਰ ਖੜਕਾਇਆਂ

ਜਿਵੇਂ ਥੱਕਿਆ ਹੋਇਆ ਪੱਤਾ-

ਹੁਣੇ ਜਨਮਿਆ ਬੀਅ-

ਪਰਤਦੇ ਨੇ ਧਰਤੀ ਵੱਲ

ਅਗਲੀ ਯਾਤਰਾ ਲਈ

ਉਹ ਆਉਂਦੀ ਹੈ

ਜਦੋਂ ਘਰ ਚਾਨਣ-ਚਾਨਣ ਹੋਵੇ

ਆਖਦੀ ਹੈ-

“ਲੋਅ ਲੈਣ ਆਈ ਹਾਂ!”

ਆਉਂਦੀ ਹੈ

ਜਦ ਘਰ ਹਨੇਰਾ ਹਨੇਰਾ ਹੋਵੇ

ਆਖਦੀ ਹੈ-

“ਦੀਵਾ ਬੁਝ ਗਿਆ ਸੀ

ਆਪਣੀ ਲੋਅ ਦੇਣ ਆਈ ਹਾਂ!”

ਕਿਸੇ ਦਿਨ ਆਵੇ .....

ਤੇ ਆਖੇ-

“ਚੱਲ! ਰਲ਼ ਕੇ ਲੋਅ ਕਰਨ ਚੱਲੀਏ...”