ਸੁਖਮਿੰਦਰ ਰਾਮਪੁਰੀ - ਗ਼ਜ਼ਲ

ਗ਼ਜ਼ਲ

ਆਥਣ ਦੀ ਦਹਿਲੀਜ਼ 'ਤੇ ਦੀਵਾ ਧਰਿਆ ਕਰ।
ਐਵੇਂ ਨਾ ਅਨਹੋਣੀ ਕਹਿ ਕਹਿ ਡਰਿਆ ਕਰ।
ਅਨਹੋਣੀ 'ਚੋਂ ਹੋਣੀ ਕੱਢ, ਅਸੰਭਵ 'ਚੋਂ,
ਸੰਭਵ ਨੂੰ ਕੱਢਣ ਦਾ ਜੇਰਾ ਕਰਿਆ ਕਰ।
ਡਰ ਜਾਵਣ ਦਾ ਦੂਜਾ ਨਾਂ ਏ ਮਰ ਜਾਣਾ,
ਮਰ ਜਾਵਣ ਤੋਂ ਪਹਿਲਾਂ ਹੀ ਨਾ ਮਰਿਆ ਕਰ।
ਅਪਣੇ ਹਿੱਸੇ ਦਾ ਨਿੱਤ ਮੋਹਰਾ ਪੀਆ ਕਰ।
ਅਪਣੇ ਹਿੱਸੇ ਦੀ ਵੈਤਰਣੀ ਤਰਿਆ ਕਰ।
ਦਿਲ ਦਰਿਆ ਪੱਲੇ ਹੁੰਦਿਆਂ ਐਵੇਂ ਨਾ,
ਕੰਧੀ ਵਾਂਗੂੰ ਪਲ-ਪਲ ਛਿਣ-ਛਿਣ ਖਰਿਆ ਕਰ।
ਰੰਗ ਵਿਹੂਣੇ ਜੀਵਨ ਤੈਥੋਂ ਚਾਹੁੰਦੇ ਨੇ,
ਸੁਪਨੇ ਦੇ ਰੰਗ ਉਨਾਂ ਦੇ ਵਿੱਚ ਭਰਿਆ ਕਰ।
ਵਰਤਮਾਨ 'ਚੋਂ ਸਦਾ ਭਵਿੱਖ ਦੇ ਸੁਪਨੇ ਖਿੜਨੇ,
ਭੂਤਕਾਲ ਤੋਂ ਅੱਜ ਨੂੰ ਵੱਖ ਨਾ ਕਰਿਆ ਕਰ।