ਗ਼ਜ਼ਲ
ਆਥਣ ਦੀ ਦਹਿਲੀਜ਼ 'ਤੇ ਦੀਵਾ ਧਰਿਆ ਕਰ।
ਐਵੇਂ ਨਾ ਅਨਹੋਣੀ ਕਹਿ ਕਹਿ ਡਰਿਆ ਕਰ।
ਅਨਹੋਣੀ 'ਚੋਂ ਹੋਣੀ ਕੱਢ, ਅਸੰਭਵ 'ਚੋਂ,
ਸੰਭਵ ਨੂੰ ਕੱਢਣ ਦਾ ਜੇਰਾ ਕਰਿਆ ਕਰ।
ਡਰ ਜਾਵਣ ਦਾ ਦੂਜਾ ਨਾਂ ਏ ਮਰ ਜਾਣਾ,
ਮਰ ਜਾਵਣ ਤੋਂ ਪਹਿਲਾਂ ਹੀ ਨਾ ਮਰਿਆ ਕਰ।
ਅਪਣੇ ਹਿੱਸੇ ਦਾ ਨਿੱਤ ਮੋਹਰਾ ਪੀਆ ਕਰ।
ਅਪਣੇ ਹਿੱਸੇ ਦੀ ਵੈਤਰਣੀ ਤਰਿਆ ਕਰ।
ਦਿਲ ਦਰਿਆ ਪੱਲੇ ਹੁੰਦਿਆਂ ਐਵੇਂ ਨਾ,
ਕੰਧੀ ਵਾਂਗੂੰ ਪਲ-ਪਲ ਛਿਣ-ਛਿਣ ਖਰਿਆ ਕਰ।
ਰੰਗ ਵਿਹੂਣੇ ਜੀਵਨ ਤੈਥੋਂ ਚਾਹੁੰਦੇ ਨੇ,
ਸੁਪਨੇ ਦੇ ਰੰਗ ਉਨਾਂ ਦੇ ਵਿੱਚ ਭਰਿਆ ਕਰ।
ਵਰਤਮਾਨ 'ਚੋਂ ਸਦਾ ਭਵਿੱਖ ਦੇ ਸੁਪਨੇ ਖਿੜਨੇ,
ਭੂਤਕਾਲ ਤੋਂ ਅੱਜ ਨੂੰ ਵੱਖ ਨਾ ਕਰਿਆ ਕਰ।
1 comment:
Respected Uncleji...iss ghazal chon mainu aah sheyer sabh ton ziada changa laggeya...
ਆਥਣ ਦੀ ਦਹਿਲੀਜ਼ 'ਤੇ ਦੀਵਾ ਧਰਿਆ ਕਰ।
ਐਵੇਂ ਨਾ ਅਨਹੋਣੀ ਕਹਿ ਕਹਿ ਡਰਿਆ ਕਰ।
It is so true. Fearing death...we never atually live our life properly and to the fullest.
Tamanna
Post a Comment