ਇੰਦਰਜੀਤ ਨੰਦਨ - ਨਜ਼ਮ

ਦੋਸਤੋ! ਅੱਜ ਇਹ ਗੱਲ ਵੀ ਸਾਂਝੀ ਕਰਦਿਆਂ ਮੈਨੂੰ ਬੇਹੱਦ ਖ਼ੁਸ਼ੀ ਹੋ ਰਹੀ ਹੈ ਕਿ ਇੰਡੀਆ ਵਿੱਚ ਹਾਲ ਹੀ ਵਿੱਚ ਸੰਸਕ੍ਰਿਤੀ ਐਵਾਰਡ ਜੇਤੂ ਸਤਿਕਾਰਤ ਇੰਦਰਜੀਤ ਨੰਦਨ ਜੀ ਨੇ ਅੱਜ ਦੋ ਬੇਹੱਦ ਖ਼ੂਬਸੂਰਤ ਨਜ਼ਮਾਂ 'ਆਰਸੀ' ਲਈ ਭੇਜ ਕੇ ਪਹਿਲੀ ਹਾਜ਼ਰੀ ਲਵਾਈ ਹੈ।ਪਿਛਲੇ 29 ਸਾਲਾਂ ਦੇ ਐਵਾਰਡ ਇਤਿਹਾਸ ਵਿੱਚ ਪਹਿਲੀ ਵਾਰ ਇੱਕ ਐਵਾਰਡ ਪੰਜਾਬੀ ਸਾਹਿਤ ਦੀ ਝੋਲ਼ੀ ਪਿਆ ਹੈ...ਬਹੁਤ ਮਾਣ ਵਾਲ਼ੀ ਗੱਲ ਹੈ। ਇਹ ਐਵਾਰਡ ਇੰਦਰਜੀਤ ਜੀ ਨੂੰ ਉਹਨਾਂ ਦੀਆਂ ਸਾਹਿਤਕ ਲਿਖਤਾਂ ਜਿਨ੍ਹਾਂ ਵਿੱਚ...ਕਾਵਿ-ਸੰਗ੍ਰਹਿ 'ਦਿਸਹੱਦਿਆ ਤੋਂ ਪਾਰ', 'ਚੁੱਪ ਦੇ ਰੰਗ' 'ਜੋਗਿੰਦਰ ਬਾਹਰਲਾ ਜੀਵਨ ਗਾਥਾ' ਅਤੇ ਹਾਲ ਹੀ ਵਿੱਚ ਪ੍ਰਕਾਸ਼ਿਤ ਮਹਾਂ-ਕਾਵਿ 'ਸ਼ਹੀਦ ਭਗਤ ਸਿੰਘ ਅਣਥੱਕ ਜੀਵਨ ਗਾਥਾ' ਬਦਲੇ ਦਿੱਤਾ ਗਿਆ। ਇੰਦਰਜੀਤ ਜੀ...ਬਹੁਤ-ਬਹੁਤ ਮੁਬਾਰਕਾਂ!! 'ਆਰਸੀ' ਤੇ ਤੁਹਾਨੂੰ ਸਾਰੇ ਪਾਠਕ / ਲੇਖਕ ਵਰਗ ਵੱਲੋਂ ਜੀਅ ਆਇਆਂ ਨੂੰ !!

ਨਜ਼ਮਾਂ ਆਉਂਦੀਆਂ
ਨਜ਼ਮ

ਨਜ਼ਮਾਂ ਆਉਂਦੀਆਂ
ਪੰਛੀ ਬਣਦੀਆਂ
ਪੋਟਿਆਂ ’ਤੇ ਬਹਿੰਦੀਆਂ
ਕਲਮਾਂ ’ਚ ਲਹਿੰਦੀਆਂ
ਮਨ ਦੇ ਬਨੇਰੇ ਤੋਂ
ਕਦੇ ਫੁਰਰ ਉੱਡ ਜਾਂਦੀਆਂ...

ਨਜ਼ਮਾਂ ਆਉਂਦੀਆਂ
ਸਾਜ਼ ਬਣਦੀਆਂ
ਉਂਗਲਾਂ ਹਿੱਲਦੀਆਂ
ਤਾਰਾਂ ਛਿੜਦੀਆਂ
ਡੂੰਘੇ ਪਾਣੀ ਹਿੱਲਦੇ
ਤਰੰਗਾਂ ਬਣਦੀਆਂ
ਸਮੁੰਦਰਾਂ ਤੀਕ ਫੈਲ ਜਾਂਦੀਆਂ...

ਨਜ਼ਮਾਂ ਆਉਂਦੀਆਂ
ਹੋਠਾਂ ’ਤੇ ਨੱਚਦੀਆਂ
ਜ਼ਹਿਨ ’ਚ ਥਿੜਕਦੀਆਂ
ਧੜਕਣਾਂ ਰਿੜਕਦੀਆਂ
ਲੋਕ ਬੋਲ ਬਣਦੀਆਂ
ਮਨਾਂ ’ਚ ਲਹਿ ਜਾਂਦੀਆਂ
ਬੜਾ ਕੁਝ ਕਹਿ ਜਾਂਦੀਆਂ...

ਨਜ਼ਮਾਂ ਆਉਂਦੀਆਂ
ਸੁੱਚ ਦਿੰਦੀਆਂ
ਮੁਹੱਬਤਾਂ ਵੰਡਦੀਆਂ
ਮਹਿਕਾਂ ਖਿੰਡਦੀਆਂ
ਕੋਲੋਂ ਲੰਘਦੀਆਂ
ਕਾਇਨਾਤ ’ਚ ਸਮਾ ਜਾਂਦੀਆਂ
ਇਹ ਪੂਰੀ ਕੁਦਰਤ ਹੀ ਹੋ ਜਾਂਦੀਆਂ...
ਨਜ਼ਮਾਂ ਜਦ ਵੀ ਆਉਂਦੀਆਂ
ਇਹ ਜਿੰਦਗੀ ਬਣ ਜਾਂਦੀਆਂ
ਇਹ ਜਿੰਦਗੀ ਬਣ ਜਾਂਦੀਆਂ।
ਨਜ਼ਮਾਂ ਜਦ ਵੀ ਆਉਂਦੀਆਂ।
============
ਖੜਾਵਾਂ
ਨਜ਼ਮ

ਅਸੀਂ ਬੱਝੇ ਹਾਂ
ਆਪਣੇ ਹੀ ਦੁੱਖਾਂ ’ਚ
ਭਾਲਦੇ ਫਿਰਦੇ
ਸੁੱਖਾਂ ਦੇ ਸਿਰਨਾਵੇਂ
ਦੌੜਦੇ ਹਾਂ
ਮ੍ਰਿਗਤ੍ਰਿਸ਼ਨਾ ਦੇ ਛਲਾਵਿਆਂ ਮਗਰ
ਇਕ ਦੂਜੇ ਨੂੰ ਕੋਸਦੇ
ਦੁੱਖ ਦਾ ਕਾਰਨ ਆਖਦੇ
ਬੜੇ ਹੀ
ਅਜੀਬ ਫਲਸਫ਼ੇ ਰਚਦੇ
ਤੁਰ ਰਹੇ ਹਾਂ
ਇਸ਼ਕ ਨੂੰ ਸਜ਼ਾ ਦੱਸਦੇ...
ਹੇ ਬੁੱਧ!
ਕਿੰਨਾ ਨਾਜ਼ੁਕ, ਕਿੰਨਾ ਕੋਮਲ
ਕਿੰਨਾ ਸੂਖ਼ਮ ਹਿਰਦਾ ਤੇਰਾ
ਜੋ ਦੁੱਖ ਦੇਖ ਦੁਨੀਆ ਦਾ
ਕੁਰਲਾਅ ਉੱਠਿਆ
ਤੜਪਿਆ ਏਨਾ
ਕਿ ਮਹਿਲਾਂ ਦਾ ਸੁੱਖ ਵੀ
ਦੁੱਖ ਬਣ ਗਿਆ
ਤੁਰ ਪਿਆ ਘਰੋਂ ਦੂਰ
ਬਹੁਤ ਦੂਰ...
ਮੋਕਸ਼ ਦੀ ਤਲਾਸ਼ ’ਚ
ਸੱਚ ਦੀ ਖੋਜ ’ਚ
ਭਿਕਸ਼ੂ ਬੜ ਘੁੰਮਿਆ ਵਣ ਵਣ
ਤੇ ਕੀਤਾ ਆਤਮ ਮੰਥਨ...
….............................
ਤੇਰੇ ਮੌਨ ’ਚ
ਹੈ ਜੋ ਚਿੰਤਨ
ਫਲਸਫ਼ਾ, ਦਰਸ਼ਨ
ਉਹ ਕਈ ਵਾਰ
ਮੇਰੇ ਕੰਨਾਂ ’ਚ
ਇੰਝ ਗੂੰ...ਜ...ਦਾ
ਕਿ ਮੇਰੇ ਪੈਰ ਵੀ
ਖੜਾਵਾਂ ਪਾਉਣ ਨੂੰ ਕਰਦੇ ਨੇ
ਹੇ ਗੌਤਮ...!