ਹਰਜਿੰਦਰ ਕੰਗ - ਗ਼ਜ਼ਲ

ਦੋਸਤੋ ! ਮੈਂ ਬੇਹੱਦ ਖ਼ੁਸ਼ੀ ਨਾਲ਼ ਇਹ ਗੱਲ ਸਭ ਨਾਲ਼ ਸਾਂਝੀ ਕਰਨ ਜਾ ਰਹੀ ਹਾਂ ਕਿ ਸਾਹਿਤਕ ਗੀਤਾਂ ਨਾਲ਼ ਪੰਜਾਬੀ ਸਾਹਿਤ ਤੇ ਉੱਚ-ਪੱਧਰੀ ਗਾਇਕੀ ਨੂੰ ਮੁਹੱਬਤ ਕਰਨ ਵਾਲ਼ਿਆਂ ਦੇ ਦਿਲਾਂ ‘ਚ ਵੱਖਰੀ ਥਾਂ ਬਣਾਉਂਣ ਵਾਲ਼ੇ ਲੇਖਕ ਸਤਿਕਾਰਤ ਜਨਾਬ ਹਰਜਿੰਦਰ ਕੰਗ ਜੀ ਨੇ ਆਪਣੀ ਪਹਿਲੀ ਖ਼ੂਬਸੂਰਤ ਗ਼ਜ਼ਲ ਨਾਲ਼ 'ਆਰਸੀ’ ਨੂੰ ਨੂਰੋ-ਨੂਰ ਕਰਕੇ ਸਾਡਾ ਸਭ ਦਾ ਮਾਣ ਵਧਾਇਆ ਹੈ।ਕੰਗ ਸਾਹਿਬ ਦੇ ਹੁਣ ਤੱਕ ਕੁੱਲ ਦੋ ਗ਼ਜ਼ਲ ਸੰਗ੍ਰਹਿ ਅਤੇ ਇਕ ਕਾਵਿ-ਸੰਗ੍ਰਹਿ ਪ੍ਰਕਾਸ਼ਿਤ ਹੋ ਚੁੱਕੇ ਹਨ ! ਜਿਨ੍ਹਾਂ ਦਾ ਵੇਰਵਾ ਇਸ ਤਰ੍ਹਾਂ ਹੈ – ‘ਸਵਾਂਤੀ ਬੂੰਦ’ ( ਗਜ਼ਲ )’ਠੀਕਰੀ ਪਹਿਰਾ’ ( ਗਜ਼ਲ ) ‘ਚੁੱਪ ਦੇ ਟੁੱਕੜੇ’ ( ਕਵਿਤਾ ਅਤੇ ਗਜ਼ਲ ) ਇਸ ਤੋਂ ਇਲਾਵਾ ਉਹਨਾ ਦੇ ਬਹੁਤ ਸਾਰੇ ਗੀਤ ਵੱਖ-ਵੱਖ ਗਾਇਕਾਂ ਨੇ ਗਾਏ ਅਤੇ ਬੜੇ ਮਕਬੂਲ ਹੋਏ ਹਨ, ਜਿਵੇ ਕਿ ‘ ਆਪਾਂ ਦੋਵੇ ਰੁੱਸ ਬੈਠੇ ਤਾਂ ਮਨਾਊ ਕੌਣ ਵੇ ’ ( ਹੰਸ ਰਾਜ ਹੰਸ ਅਤੇ ਪਕਿਸਤਾਨ ਵਿੱਚ ਨਸੀਬੋ ਲਾਲ ਨੇ ਗਾਇਆ ) ‘ ਮੇਰੇ ਨਾਅ ਦਾ ਫੁੱਲ ਨਾ ਪਾਵੀਂ ਹੁਣ ਆਪਣੀ ਫੁਲਕਾਰੀ ‘ਤੇ ’ ! ( ਹੰਸ ਰਾਜ ਹੰਸ ) ' ਮੁੱਖੜਾ ਤੁਹਾਡਾ ਸਾਨੂੰ ਯਾਦ ਜਿਹਾ ਹੋ ਗਿਆ ' ( ਹੰਸ ਰਾਜ ਹੰਸ ) ' ਤੇਰੀ ਯਾਦ ਨੀ ਚੰਦਰੀਏ ਆਈ ਛੰਮ ਛੰਮ ਰੌਣ ਅੱਖੀਆਂ ’ ( ਹੰਸ ਰਾਜ ਹੰਸ )ਅਤੇ ਇਹ ਗੀਤ ਗੀਤ ਸਾਬਰ ਕੋਟੀ ਨੇ ਗਾਏ- ‘ ਵੇ ਵਣਜਾਰਿਆ ਸਾਡੀ ਗਲੀ ਵੀ ਗੇੜਾ ਮਾਰ ’, ‘ ਸਾਡੀ ਐਤਕੀਂ ਵਿਸਾਖੀ ਵਾਲੇ ਮੇਲੇ ਵਿਚ ਸੱਜਣਾਂ ਨਾ' ਗੱਲ ਹੋ ਗਈ ’ ‘ ਜੇ ਤੂੰ ਅੱਜ ਵੀ ਨੀ ਨੱਚਣਾ ਤਾਂ ਕਦੋਂ ਨੱਚਣਾ,’ ‘ ਨਿੱਤ ਚਿਹਰਿਆਂ ਦੀ ਭੀੜ ਨੂੰ ਫਰੋਲਦੇ ਰਹਾਂਗੇ , ਦੂਰ ਜਾਣ ਵਾਲਿਆ ਵੇ ਤੈਨੂੰ ਟੋਲ਼ਦੇ ਰਹਾਂਗੇ ' ‘,ਇਸ ਤੋਂ ਇਲਾਵਾ ਗਿੱਲ ਹਰਦੀਪ ਦੇ ਗਾਏ ਗੀਤਾਂ ‘ਚ- ‘ ਨਿੱਘੀ-ਨਿੱਘੀ ਯਾਦ ’, ‘ ਚਿਰ ਪਿਛੋਂ ਖ਼ਤ ਲਿਖਿਆ ਤੈਨੂੰ ’ ‘ ਵੇਖਿਓ ਪੰਜਾਬੀਓ ਪੰਜਾਬੀ ਨਾ ਭੁਲਾ ਦਿਓ '....‘ਆਰਸੀ’ ਦੇ ਸਮੂਹ ਸੂਝਵਾਨ ਲੇਖਕਾਂ ਤੇ ਪਾਠਕਾਂ ਵੱਲੋਂ ਮੈਂ ਹਰਜਿੰਦਰ ਕੰਗ ਜੀ ਨੂੰ ਖ਼ੁਸ਼ਆਮਦੀਦ ਆਖਦੀ ਹਾਂ। ਸ਼ਾਲਾ ! ਤੁਹਾਡੀ ਕਲਮ ‘ਚ ਹਰ ਰੋਜ਼ ਨਵੀਂ ਤੇ ਸੁਨਹਿਰੀ ਸਿਆਹੀ ਭਰਦੀ ਰਹੇ ਤੇ ਤੁਸੀਂ ਸਾਹਿਤਕ ਲਿਖਤਾਂ ਨਾਲ਼ ਨਵੀਆਂ ਪਿਰਤਾਂ ਪਾਉਂਦੇ ਰਹੋ...ਆਮੀਨ!!

ਗ਼ਜ਼ਲ

ਆਪਣੀ ਮਿੱਟੀ ਹੇਠ ਨਾ ਦੱਬ ਗੁਨਾਹਾਂ ਨੂੰ।

ਜ਼ਹਿਰ ਚੜ੍ਹੇਗੀ ਤੇਰੇ ਆਪਣੇ ਸਾਹਾਂ ਨੂੰ।

-----

ਟੁੱਟੇ ਸੁਪਨੇ ਦੀ ਸਿਸਕੀ ਨੂੰ ਕੌਣ ਸੁਣੇ,

ਲੋਕ ਤਾਂ ਅਣਸੁਣੀਆਂ ਕਰ ਦਿੰਦੇ ਧਾਹਾਂ ਨੂੰ।

------

ਮਿੱਟੀ ਹੇਠ ਦਬਾ ਚੱਲਿਆਂ, ਪਰ ਯਾਦ ਰਹੇ

ਉੱਗ ਪਵਾਂਗੇ ਰੁੱਖਾਂ ਵਾਂਗ ਉਤਾਹਾਂ ਨੂੰ।

------

ਸੋਚ ਰਿਹਾਂ ਕਿ ਕਿਸ਼ਤੀ ਪਾਰ ਮਲਾਹ ਲਾਉਂਦੇ,

ਜਾਂ ਕਿਸ਼ਤੀ ਲਾਉਂਦੀ ਹੈ ਪਾਰ ਮਲਾਹਾਂ ਨੂੰ।

------

ਬਾਹਾਂ ਬਿਨ ਬੇਅਰਥ ਛਣਕ ਹੈ ਵੰਗਾਂ ਦੀ,

ਵੰਗਾਂ ਬਿਨ ਆਵਾਜ਼ ਮਿਲ਼ੇ ਨਾ ਬਾਹਾਂ ਨੂੰ।

------

ਆਪੇ ਘਰ-ਘਰ ਪੂਜਣ ਲੋਕੀਂ ਮੂਰਤੀਆਂ,

ਅੱਗੇ ਝੁਕ-ਝੁਕ ਕੇ ਬਖ਼ਸ਼ਾਉਂਣ ਗੁਨਾਹਾਂ ਨੂੰ।