ਜਸਵੀਰ ਹੁਸੈਨ - ਗ਼ਜ਼ਲ

ਮਾਡਰਨ ਗ਼ਜ਼ਲ

ਵਾਂਗ ਬੁਲਬੁਲੇ ਸੁਪਨੇ ਟੁੱਟ ਕੇ ਪਾਣੀ ਬਣ ਜਦ ਵਹਿੰਦੇ ਨੇ।
ਕੋਸ਼ਿਸ਼ ਕੀਤਿਆਂ ਬੰਨ੍ਹ ਸਬਰਾਂ ਦੇ ਕਿੰਨਾ ਚਿਰ ਫਿਰ ਰਹਿੰਦੇ ਨੇ।
-------
ਟੀ. ਵੀ. ਚੈਨਲ, ਲੈਪਟੌਪ, ਮੋਬਾਈਲ, ਫਿਲਮਾਂ ਤੇ ਫੈਸ਼ਨ,
ਫੁੱਲਾਂ ਦੀ ਹੁਣ ਗੱਲ ਨ੍ਹੀਂ ਕਰਦੇ ਲੋਕ ਜਦੋਂ ਜੁੜ ਬਹਿੰਦੇ ਨੇ।
-------
ਘਰ ਵਰਗਾ ਅਹਿਸਾਸ ਕਿਤੋਂ ਵੀ ਲੱਭਿਆਂ ਹੁਣ ਤਾਂ ਲਭਦਾ ਨਈਂ,
ਬੰਗਲੇ, ਕੋਠੀ, ਵਿੱਚ ਫਲੈਟਾਂ ਅੱਜਕਲ ਲੋਕੀਂ ਰਹਿੰਦੇ ਨੇ।
-------
ਘਰ ਦੀ ਟੈਂਸ਼ਨ, ਬੌਸ ਦੀ ਝਿਕ-ਝਿਕ, ਵਧਦੀ ਜਾਂਦੀ ਮਹਿੰਗਾਈ,
ਦਫਤਰ ਦੇ ਵਿੱਚ ਬੈਠੇ ਲੋਕੀ ਕੀ-ਕੀ ਖ਼ੌਰੇ ਸਹਿੰਦੇ ਨੇ।
-------
ਪਿਆਰ ਦੀ ਹੁਣ ਤਾਂ ਇੰਟਰਨੈੱਟ ’ਤੇ ਸਰਚਿੰਗ ਕੀਤੀ ਜਾਂਦੀ ਏ,
‘ਪਿਆਰ ਅਵੇਲੇਵਲ ਸਭ ਲਈ’ ਵੈਬਸਾਈਟਾਂ ਵਾਲੇ ਕਹਿੰਦੇ ਨੇ।
-------
ਵੱਡੀ ਕੋਠੀ, ਵੱਡੀ ਗੱਡੀ, ਪਰ ਕਿਰਦਾਰ ਬਹੁਤ ਛੋਟੇ,
ਐਸੇ ਲੋਕਾਂ ਦੀ ਬਸਤੀ ਨੂੰ ਪੌਸ਼ ਏਰੀਆ ਕਹਿੰਦੇ ਨੇ।
-------
ਗੇਂਦੇ ਅਤੇ ਗੁਲਾਬ ਦੇ ਮੁਰਝਾਵਣ ਦਾ ਦੁੱਖ ਹੁਣ ਕੌਣ ਜਰੇ,
ਏਸੇ ਲਈ ਤਾਂ ਲੋਕੀਂ ਅੱਜਕਲ੍ਹ ਕਾਗ਼ਜ਼ ਦੇ ਫੁੱਲ ਲੈਂਦੇ ਨੇ।