ਦੋਸਤੋ! ਮੈਨੂੰ ਇਹ ਗੱਲ ਸਾਂਝੀ ਕਰਦਿਆਂ ਵੀ ਬੇਹੱਦ ਖ਼ੁਸ਼ੀ ਹੋ ਰਹੀ ਹੈ ਕਿ ਵੈਨਕੂਵਰ ਨਿਵਾਸੀ ਉੱਘੇ ਲੇਖਕ ਸਤਿਕਾਰਤ ਹਰਚੰਦ ਸਿੰਘ ਬਾਗੜੀ ਜੀ ਨੇ ਆਪਣੀਆਂ ਬੇਹੱਦ ਖ਼ੂਬਸੂਰਤ ਰਚਨਾਵਾਂ ‘ਆਰਸੀ’ ਲਈ ਭੇਜੀਆਂ ਹਨ। ਉਹਨਾਂ ਦੀਆਂ ਖ਼ੂਬਸੂਰਤ ਨਜ਼ਮਾਂ, ਦੋਹੇ, ਟੱਪੇ ਪੰਜਾਬੀ ਦੇ ਸਿਰਮੌਰ ਅਖ਼ਬਾਰਾਂ, ਰਸਾਲਿਆਂ ‘ਚ ਪੜ੍ਹਦੇ ਹੀ ਰਹਿੰਦੇ ਹਾਂ। ਸੰਗਰੂਰ ਜ਼ਿਲੇ ਦੇ ਪਿੰਡ ਫਰਵਾਹੀ (ਬਾਗੜੀ) ‘ਚ ਅਗਸਤ 20, 1945 ਨੂੰ ਜਨਮੇ ਬਾਗੜੀ ਸਾਹਿਬ 1971 ਤੋਂ ਕੈਨੇਡਾ ‘ਚ ਨਿਵਾਸ ਕਰ ਰਹੇ ਹਨ ਤੇ ਰਿਟਾਇਡ ਹੋ ਕੇ ਪਰਿਵਾਰ ਸਹਿਤ ਜ਼ਿੰਦਗੀ ਦਾ ਆਨੰਦ ਮਾਣ ਰਹੇ ਹਨ। ਉਹਨਾਂ ਦੁਆਰਾ ਰਚਿਤ ਪੁਸਤਕਾਂ ‘ਚ : ਕਾਵਿ ਸੰਗ੍ਰਹਿ: ਸੋਨੇ ਦਾ ਮਿਰਗ, ਸੱਜਰੇ ਫੁੱਲ, ਗਿੱਲੀ ਅੱਖ ਦਾ ਸੰਵਾਦ, ਪੈਂਤੀ ਅੱਖਰੀ, ਸੁਨਹਿਰੀ ਮਣਕੇ, ਸ਼ਲੋਕਾਂ ਭਰੀ ਚੰਗੇਰ, ਬੁੱਕ ਮਿੱਟੀ ਦੀ, ਸੁਨੇਹੇ, ਸਮੇਂ ਦਾ ਸੱਚ, ਤੇ ਕਹਾਣੀ ਸੰਗ੍ਰਹਿ: ਲਾਗੀ ਤੇ ਦੁੱਧ ਦਾ ਮੁੱਲ ਸ਼ਾਮਲ ਹਨ। ਦੋ ਪੁਸਤਕਾਂ ਛਪਾਈ ਅਧੀਨ ਹਨ।
ਸਾਹਿਤਕ ਤੌਰ ਤੇ ਸਰਗਰਮ ਬਾਗੜੀ ਸਾਹਿਬ ਬਹੁਤ ਸਾਹਿਤ ਸਭਾਵਾਂ ਨਾਲ਼ ਸਬੰਧਿਤ ਰਹੇ ਹਨ ਤੇ ਕਈ ਇਨਾਮਾਂ ਨਾਲ਼ ਸਨਮਾਨੇ ਜਾ ਚੁੱਕੇ ਹਨ।
ਕੱਲ੍ਹ ਉਹਨਾਂ ਘਰ ਆਕੇ ਕਿਤਾਬ ਅਤੇ ਆਰਸੀ ਲਈ ਇੱਛਾਵਾਂ ਦਿੱਤੀਆਂ ਤੇ ਬਹੁਤ ਹੌਸਲਾ-ਅਫ਼ਜ਼ਾਈ ਕੀਤੀ ਹੈ, ਮੈਂ ਉਹਨਾਂ ਦੀ ਤੇ ਆਂਟੀ ਜੀ ਸਰਦਾਰਨੀ ਪਰਮਿੰਦਰ ਕੌਰ ਬਾਗੜੀ ਜੀ ਦੀ ਤਹਿ-ਦਿਲੋਂ ਮਸ਼ਕੂਰ ਹਾਂ। ਮੈਂ ਸਾਰੇ ਪਾਠਕ/ ਲੇਖਕ ਦੋਸਤਾਂ ਵੱਲੋਂ ਉਹਨਾਂ ਨੂੰ ‘ਆਰਸੀ’ ਦੀ ਅਦਬੀ ਮਹਿਫ਼ਲ ‘ਚ ਆਪਣੀ ਹਾਜ਼ਰੀ ਲਾਉਂਣ ਲਈ ਸ਼ੁਕਰੀਆ ਤੇ ਖ਼ੁਸ਼ਆਮਦੀਦ ਆਖਦੀ ਹਾਂ। ਅੱਜ ਉਹਨਾਂ ਦੀਆਂ ਰਚਨਾਵਾਂ ‘ਚੋਂ ਇੱਕ ਨਜ਼ਮ ਤੇ ਕੁੱਝ ਖ਼ੂਬਸੂਰਤ ਟੱਪੇ ‘ਆਰਸੀ’ ‘ਚ ਸ਼ਾਮਿਲ ਕਰਨ ਦਾ ਮਾਣ ਹਾਸਲ ਕਰ ਰਹੀ ਹਾਂ।
ਰਾਖੀ
ਨਜ਼ਮ
ਗੰਦਲ਼ਾਂ ਦੀ ਰਾਖੀ ਭੇਜਿਆ
ਸਾਨੂੰ ਸੋਟੀ ਫੜਾ ਕੇ
ਖੇਤਾਂ ਦੇ ਬੰਨੇ ਖੜ੍ਹ ਗਏ
ਅਸੀਂ ਪਹਿਰਾ ਲਗਾ ਕੇ।
---
ਇਸ ਕਦਰ ਮਿੱਠਾ ਬੋਲੇ
ਮਿੱਠੀ ਜ਼ੁਬਾਨ ਵਾਲ਼ੇ
ਗੰਦਲ਼ਾਂ ਵੀ ਲੈ ਗਏ
ਉਹ ਸਾਥੋਂ ਤੁੜਵਾ ਕੇ।
----
ਨਾ ਕੰਮ ਆਈਆਂ ਸੋਟੀਆਂ
ਨਾ ਪਹਿਰੇਦਾਰੀਆਂ
ਸਾਨੂੰ ਉਹ ਵੀ ਗਿਆ ਭੁੱਲ
ਜੋ ਭੇਜਿਆ ਪੜ੍ਹਾ ਕੇ।
----
ਰਾਖੀਆਂ ‘ਚੋਂ ਔਖੀ ਰਾਖੀ
ਕੱਚੀਆਂ ਇਹ ਗੰਦਲ਼ਾਂ ਦੀ
ਹੁੰਦੀਆਂ ਜਵਾਨ ਜਦੋਂ
ਜੋਬਨਾਂ ‘ਤੇ ਆਕੇ।
----
ਜੋ ਮਨ੍ਹਾ ਕੀਤਾ ਸਾਨੂੰ,
ਸਾਥੋਂ ਖਾ ਹੋ ਗਿਆ,
ਦੇਣ ਵਾਲ਼ੇ ਦਿੱਤਾ ਮੋਹਰਾ
ਮਿਸ਼ਰੀ ਮਿਲ਼ਾ ਕੇ।
----
ਆਉਂਣ ਵੇਲ਼ੇ ਮਣਾਂ ਮੂੰਹੀਂ
ਮੁੱਖ ਉੱਤੇ ਹਾਸੇ
ਜਾਣ ਵੇਲ਼ੇ ਗਏ ਭੈੜੇ
ਨੱਕ ਨੂੰ ਚੜ੍ਹਾ ਕੇ।
----
ਸਾਡੇ ਨਾਲ਼ੋਂ ਪਹਿਲਾਂ ਗੱਲ
ਚਲੀ ਗਈ ਘਰ ਸਾਡੇ
ਕਹਿੰਦੇ ਵਾੜ ਮੁੜ ਆਈ
ਖੇਤ ਨੂੰ ਖਾ ਕੇ।
----
ਓਹੀ ਜਾਣੇ ਹਾਦਸੇ ਨੂੰ
ਜਿਸ ਨਾਲ਼ ਹੋਂਵਦਾ ਏ
ਬਾਕੀ ਤਾਂ ਦੇਖਦੇ ਨੇ
ਹਾਦਸੇ ਨੂੰ ਜਾ ਕੇ।
----
ਐਨ ਬਦਨਾਮ ਕੀਤਾ
'ਚੰਦ ਫਰਵਾਹੀ’ ਲੋਕਾਂ
ਜਿਵੇਂ ਅਸੀਂ ਦੇ ਦਿੱਤਾ
ਲੌਂਗ ਘੜਵਾ ਕੇ।
===========
ਕੁੱਝ ਟੱਪੇ
ਸੁਣੇ ਤਖ਼ਤਾ ਚੀਕਦਾ ਤੇਰਾ
ਪੈੜ-ਚਾਲ ਕਦੇ ਨਾ ਸੁਣੀ।
----
ਰੁੱਤ ਬਦਲੀ ਆ ਗਈਆਂ ਕੂੰਜਾਂ
ਤੈਨੂੰ ਕਾਹਤੋਂ ਰੁੱਤਾਂ ਭੁੱਲੀਆਂ।
----
ਪੇਚਾ ਕਦੇ ਨਾ ਕਿਸੇ ਨਾਲ਼ ਪਾਈਏ
ਜੇ ਨਾ ਹੋਵੇ ਹਵਾ ਵੱਲ ਦੀ।
----
ਕਾਲ਼ੇ ਰੰਗ ਵੀ ਪਿਆਰੇ ਲੱਗਦੇ
ਜਿਨ੍ਹਾਂ ਦੇ ਨੇ ਬੋਲ ਮਿੱਠੜੇ।
----
ਜੀਹਨੂੰ ਕਹਿ ਲਈਏ ਦਿਲਾਂ ਦਾ ਜਾਨੀ
ਦਿਲ਼ ਨਾਲ਼ ਲਾ ਕੇ ਰੱਖੀਏ।
----
ਛੜਾ ਆਖ ਲੀਂ ਭਾਵੇਂ ਸੌ ਵਾਰੀ
ਔਂਤਰਾ ਨਾ ਆਖੀਂ ਮੁੜ ਕੇ।
----
ਦੁੱਧ ਪੀ ਗਏ ਨਸੀਬਾਂ ਵਾਲ਼ੇ
ਅਸੀਂ ਰਹਿ ਗਏ ਵੱਗ ਚਾਰਦੇ।
----
ਤੂੰ ਤਾਂ ਲੰਘ ਗਈ ਹਨ੍ਹੇਰੀ ਬਣ ਕੇ
ਅਸੀਂ ਰਹਿ ਗਏ ਪਿੱਠ ਦੇਖਦੇ।
----
ਕੁੜੀ ਦੇਖ ਕੇ ਗਨੇਰੀ ਵਰਗੀ
ਭੁੱਲ ਗਿਆ ਗੰਨਾ ਚੂਪਣਾ।
----
ਚੀਜ਼ਾਂ ਚੰਗੀਆਂ ਦੇ ਚੋਰ ਚੁਫ਼ੇਰੇ
ਸੁੰਨੀਆਂ ਨਾ ਕਦੇ ਛੱਡੀਏ।
----
3 comments:
ਪਿਆਰੇ ਬਾਗੜੀ ਜੀ, ਸਵਾਗਤ ਹੈ ਜਨਾਬ! ਮੁਸ਼ਾਇਰਿਆਂ 'ਚ ਤੁਹਾਡੇ ਕੋਲ਼ੋਂ ਫੁਰਮਾਇਸ਼ ਕਰਕੇ ਇਹ ਮਜ਼ਾਹੀਆ ਨਜ਼ਮ ਸੁਣੀਦੀ ਸੀ, ਆਹ ਸਤਰਾਂ ਤਾਂ ਕਮਾਲ ਦੀਆਂ ਨੇ...
ਗੰਦਲ਼ਾਂ ਦੀ ਰਾਖੀ ਭੇਜਿਆ
ਸਾਨੂੰ ਸੋਟੀ ਫੜਾ ਕੇ
ਖੇਤਾਂ ਦੇ ਬੰਨੇ ਖੜ੍ਹ ਗਏ
ਅਸੀਂ ਪਹਿਰਾ ਲਗਾ ਕੇ।
---
ਇਸ ਕਦਰ ਮਿੱਠਾ ਬੋਲੇ
ਮਿੱਠੀ ਜ਼ੁਬਾਨ ਵਾਲ਼ੇ
ਗੰਦਲ਼ਾਂ ਵੀ ਲੈ ਗਏ
ਉਹ ਸਾਥੋਂ ਤੁੜਵਾ ਕੇ।
ਕਿਆ ਬਾਤ ਹੈ! ਕੋਈ ਜਵਾਬ ਨਹੀਂ ਇਹਨਾਂ ਸਤਰਾਂ ਦਾ! ਮੁਬਾਰਕਬਾਦ ਕਬੂਲ ਕਰੋ!
ਤੁਹਾਡਾ
ਗੁਰਦਰਸ਼ਨ 'ਬਾਦਲ'
ਕੈਨੇਡਾ
Respected Uncle Bagri saheb...tuhadiaan likhtan di parents ton bahut tareef sunni si, par ehna nu parhan d amera eh pehla mauka si..nazam te tappey bahut ziada pasand aaye..
ਗੰਦਲ਼ਾਂ ਦੀ ਰਾਖੀ ਭੇਜਿਆ
ਸਾਨੂੰ ਸੋਟੀ ਫੜਾ ਕੇ
ਖੇਤਾਂ ਦੇ ਬੰਨੇ ਖੜ੍ਹ ਗਏ
ਅਸੀਂ ਪਹਿਰਾ ਲਗਾ ਕੇ।
---
ਇਸ ਕਦਰ ਮਿੱਠਾ ਬੋਲੇ
ਮਿੱਠੀ ਜ਼ੁਬਾਨ ਵਾਲ਼ੇ
ਗੰਦਲ਼ਾਂ ਵੀ ਲੈ ਗਏ
ਉਹ ਸਾਥੋਂ ਤੁੜਵਾ ਕੇ।
Bahut khoob!
ਐਨ ਬਦਨਾਮ ਕੀਤਾ
'ਚੰਦ ਫਰਵਾਹੀ’ ਲੋਕਾਂ
ਜਿਵੇਂ ਅਸੀਂ ਦੇ ਦਿੱਤਾ
ਲੌਂਗ ਘੜਵਾ ਕੇ।
Made me smile!
======
ਰੁੱਤ ਬਦਲੀ ਆ ਗਈਆਂ ਕੂੰਜਾਂ
ਤੈਨੂੰ ਕਾਹਤੋਂ ਰੁੱਤਾਂ ਭੁੱਲੀਆਂ।
======
ਛੜਾ ਆਖ ਲੀਂ ਭਾਵੇਂ ਸੌ ਵਾਰੀ
ਔਂਤਰਾ ਨਾ ਆਖੀਂ ਮੁੜ ਕੇ।
Excellent! wao! Bahut bahut mubarakan enni khobsurat nazam te tappey likhan te.
Tamanna
ਬਾਗੜੀ ਸਾਹਿਬ ਦੇ ਟੱਪੇ ਬਹੁਤ ਵਧੀਆ ਲੱਗੇ। ਉਹਨਾਂ ਨੂੰ ਮੁਬਾਰਕਾਂ!
ਇੰਦਰਜੀਤ ਸਿੰਘ
ਕੈਨੇਡਾ
======
ਸ਼ੁਕਰੀਆ ਅੰਕਲ ਜੀ!
ਤਮੰਨਾ
Post a Comment