ਨਿਰਮਲ ਸਿੰਘ ਕੰਧਾਲਵੀ - ਨਜ਼ਮ

ਤੜਪ
ਨਜ਼ਮ

ਮਿਰੇ ਨਕਸ਼ਾਂ ਦੇ ਉੱਤੇ
ਨਕਸ਼ ਹੋਰ ਉਘੜਨ ਦਿਓ!
ਪੁਰਾਣੀਆਂ ਸ਼ਾਖ਼ਾਵਾਂ ਸੰਗ
ਨਵੀਆਂ ਨੂੰ ਪੁੰਗਰਨ ਦਿਓ!
----
ਸਮੇਂ ਦੀ ਤੋਰ ਨਾਲ ਤਾਂ
ਬਦਲਦੀ ਹੈ ਹਰ ਸ਼ੈਅ
ਤੇ ਤੁਸੀਂ ਮੈਨੂੰ ਹੀ ਕਿਉਂ
ਬਣਾਉਣਾ ਚਾਹੁੰਦੇ ਹੋ
ਸਿਲ-ਪੱਥਰ?
----
ਖੜੇ ਖੜੋਤੇ ਤਾਂ ਪਾਣੀ ਵੀ
ਤਰੱਕ ਜਾਂਦੇ ਹਨ ਦੋਸਤੋ
ਤੇ ਕੀ ਤੁਸੀਂ ਚਾਹੁੰਦੇ ਹੋ ਕਿ
ਮੈਂ ਇੰਜ ਖੜਾ ਖੜੋਤਾ
ਜ਼ਿੰਦਗੀ ਨਾਲ
ਵਸਾਹ-ਘਾਤ ਕਰ ਦਿਆਂ ?
----
ਮਿਰੇ ਮਿਹਰਬਾਨੋ!
ਤੁਸੀਂ ਹੀ ਦੱਸਦੇ ਹੋ ਕਿ
ਮਿਲਦਾ ਨਹੀਂ ਮਾਣਸ ਜਨਮ
ਵਾਰ ਵਾਰ
ਤੇ ਤੁਸੀਂ ਮੇਰਾ ਹੀ ਜਨਮ
ਕਿਉਂ ਗੁਆਉਣਾ ਚਾਹੁੰਦੇ ਹੋ
ਅਕਾਰਥ?
----
ਸੋ ਮਿਰੇ ਦਰਦੀਓ!
ਮਿਰੇ ਮਿਹਰਬਾਨੋ!
ਨਾ ਰੋਕੋ ਮੈਨੂੰ
ਖੁੱਲ੍ਹੀ ਫ਼ਿਜ਼ਾ ‘ਚ ਸਾਹ ਲੈਣ ਤੋਂ
ਨਾ ਰੋਕੋ ਮੈਨੂੰ
ਅੰਬਰਾਂ ‘ਚ ਝਾਤੀ ਮਾਰਨ ਤੋਂ
----
ਮਿਰੇ ਨਕਸ਼ਾਂ ਦੇ ਉੱਤੇ
ਨਕਸ਼ ਹੋਰ ਉਘੜਨ ਦਿਓ!
ਪੁਰਾਣੀਆਂ ਸ਼ਾਖ਼ਾਵਾਂ ਸੰਗ
ਨਵੀਆਂ ਨੂੰ ਪੁੰਗਰਨ ਦਿਓ!