ਧੀ ਦੀ ਪੁਕਾਰ
ਨਜ਼ਮ
ਨਾ ਜੰਮਣ ਤੋਂ ਪਹਿਲਾਂ ਮਾਰ ਨੀ ਮਾਏ,
ਬਣਿਆ ਧੀ ਤੋਂ ਕੁੱਲ ਸੰਸਾਰ ਨੀ ਮਾਏ ।
----
ਗੁਰੂਆਂ ਪੀਰਾਂ ਭਗਤਾਂ ਦੀ ਜਨਣੀ,
ਨਹੀਂ ਮਿਲਿਆ ਸਤਿਕਾਰ ਨੀ ਮਾਏ ।
ਪੁੱਤਰ ਜੰਮੇਂ ਤਾਂ ਤੂੰ ਖੁਸ਼ੀਆਂ ਕਰਦੀ,
ਮੇਰੀ ਵਾਰ ਲਈ ਚੁੱਪ ਧਾਰ ਨੀ ਮਾਏ ।
ਨਾ ਜੰਮਣ ਤੋਂ ਪਹਿਲਾਂ ਮਾਰ ਨੀ ਮਾਏ,
ਬਣਿਆ ਧੀ ਤੋਂ ਕੁੱਲ……………
----
ਮਾਂ ਧੀ ਮਿਲਦੀ ਤਾਂ ਕੰਧਾਂ ਕੰਬਣ,
ਤੂੰ ਦਿੱਤੀ ਗੱਲ ਵਿਸਾਰ ਨੀ ਮਾਏ ।
ਖੁਸ਼ੀ-ਖੁਸ਼ੀ ਤੂੰ ਮੇਰਾ ਕਾਜ ਰਚਾਵੀਂ,
ਦੇਣੀ ਦੂਰ ਉਡਾਰੀ ਮਾਰ ਨੀ ਮਾਏ ।
ਨਾ ਜੰਮਣ ਤੋਂ ਪਹਿਲਾਂ ਮਾਰ ਨੀ ਮਾਏ,
ਬਣਿਆ ਧੀ ਤੋਂ ਕੁੱਲ……………
----
ਵਡਭਾਗੀ ਮਾਂ ਦੀ ਕੁੱਖੋਂ ਜਨਮੇ,
ਭਗਤ, ਸਰਾਭਾ, ਕਰਤਾਰ ਨੀ ਮਾਏ ।
ਬਾਬੇ ਨਾਨਕ ਨਾਰੀ ਨੂੰ ਮਾਣ ਬਖਸ਼ਿਆ ,
ਜਿਸ ਕੁੱਖੋਂ ਜਨਮੇ ਰਜਾਨ ਨੀ ਮਾਏ।
ਨਾ ਜੰਮਣ ਤੋਂ ਪਹਿਲਾਂ ਮਾਰ ਨੀ ਮਾਏ,
ਬਣਿਆ ਧੀ ਤੋਂ ਕੁੱਲ……………
----
ਕਹਿੰਦੇ ਘਰ ਦੀ ਵੇਲ ਵਧਾਵੇ ਪੁੱਤਰ,
ਧੀ ਬਾਬਲ ਦੀ ਦਸਤਾਰ ਨੀ ਮਾਏ ।
ਪੁੱਤਰ ਜੰਮੇ ਪਰ ਜੇ ਹੋਵੇ ਕੁਲੱਛਣਾ,
ਸਭ ਵੇਚ ਦੇਵੇ ਘਰ ਬਾਰ ਨੀ ਮਾਏ ।
ਨਾ ਜੰਮਣ ਤੋਂ ਪਹਿਲਾਂ ਮਾਰ ਨੀ ਮਾਏ,
ਬਣਿਆ ਧੀ ਤੋਂ ਕੁੱਲ……………
----
ਖ਼ੁਦ ਔਰਤ ਕਿਉਂ ਔਰਤ ਨੂੰ ਮਾਰੇ,
ਕਰ ਔਰਤ ਦਾ ਸਤਿਕਾਰ ਨੀ ਮਾਏ ।
ਤਰਲੇ ਕਰਦੀ ਤੇਰੇ ਵਾਸਤੇ ਪਾਵਾਂ,
ਮੈਂ ਵੀ ਦੇਖ ਲਵਾਂ ਸੰਸਾਰ ਨੀ ਮਾਏ ।
ਨਾ ਜੰਮਣ ਤੋਂ ਪਹਿਲਾਂ ਮਾਰ ਨੀ ਮਾਏ,
ਬਣਿਆ ਧੀ ਤੋਂ ਕੁੱਲ……………
----
ਕੁੜੀਆਂ ਚਿੜੀਆਂ ਨਾਲ ਤ੍ਰਿੰਝਣ ਸੋਂਹਦੇ,
ਵਿੱਚ ਗਿੱਧਿਆਂ ਖਿੜੇ ਬਹਾਰ ਨੀ ਮਾਏ ।
ਤਰੱਕੀਆਂ ਕਰਕੇ ਨਵ-ਯੁੱਗ ਦੇ ਵਿੱਚ,
ਗਈਆਂ ਧੀਆਂ ਬਾਜੀ ਮਾਰ ਨੀ ਮਾਏ ।
ਨਾ ਜੰਮਣ ਤੋਂ ਪਹਿਲਾਂ ਮਾਰ ਨੀ ਮਾਏ,
ਬਣਿਆ ਧੀ ਤੋਂ ਕੁੱਲ ……………
----
ਤੇਰੇ ਘਰ ਨਾ ਸਾਰੀ ਉਮਰ ਬਿਤਾਉਂਣੀ,
ਦੇ ਜ਼ਿੰਦਗੀ ਦੇ ਦਿਨ ਉਧਾਰ ਨੀ ਮਾਏ ।
ਜੇ ਆਖੇਂ ਨਹੀਂ ਮੁੜ ਫੇਰਾ ਪਾਉਂਦੀ,
ਕਦੇ ਬਾਬਲ ਘਰ-ਦਵਾਰ ਨੀ ਮਾਏ ।
ਨਾ ਜੰਮਣ ਤੋਂ ਪਹਿਲਾਂ ਮਾਰ ਨੀ ਮਾਏ,
ਬਣਿਆ ਧੀ ਤੋਂ ਕੁੱਲ………………
----
ਗਰੀਬ ਘਰ ਜੰਮਾਂ ਮੈਂ ਭਾਰ ਹਾਂ ਮੰਨਦੀ,
ਪਰ ਕਿਉਂ ਮਾਰੇ ਸ਼ਾਹੂਕਾਰ ਨੀ ਮਾਏ ।
ਪੈਸੇ ਨਾਲ ਅੱਜ ਕਾਨੂੰਨ ਹੈ ਵਿੱਕਦਾ,
ਹੁਣ ਕਿੱਥੋਂ ਲੱਭਾਂ ਇਨਸਾਫ਼ ਨੀ ਮਾਏ ।
ਨਾ ਜੰਮਣ ਤੋਂ ਪਹਿਲਾਂ ਮਾਰ ਨੀ ਮਾਏ,
ਬਣਿਆ ਧੀ ਤੋਂ ਕੁੱਲ………………
----
ਕੁੜੀਆਂ ਦੀ ਹੁਣ ਗਿਣਤੀ ਘਟ ਗਈ,
ਹੋਣੀ ਛੜਿਆਂ ਦੀ ਭਰਮਾਰ ਨੀ ਮਾਏ ।
ਜ਼ਬਰ ਜਿਨਾਹ ਤੇ ਬਲਾਤਕਾਰ ਦੀਆਂ,
ਨਿੱਤ ਖਬਰਾਂ ਵਿੱਚ ਅਖ਼ਬਾਰ ਨੀ ਮਾਏ ।
ਨਾ ਜੰਮਣ ਤੋਂ ਪਹਿਲਾਂ ਮਾਰ ਨੀ ਮਾਏ,
ਬਣਿਆ ਧੀ ਤੋਂ ਕੁੱਲ………………
----
ਸਾਇੰਸ ਯੁੱਗ ਬਣਿਆ ਧੀ ਦਾ ਕਾਤਲ,
ਰੱਬ ਦੀ ਵੀ ਨਾ ਸੁਣੇ ਪੁਕਾਰ ਨੀ ਮਾਏ ।
‘ਘੁੰਮਣ’ ਰੱਬ ਵੀ ਹੁਣ ਲੁੱਕ ਕੇ ਬੈਠਾ,
ਜੇ ਵੱਸ ਹੋਵੇ ਤਾਂ ਦੇਵਣ ਮਾਰ ਨੀ ਮਾਏ ।
ਨਾ ਜੰਮਣ ਤੋਂ ਪਹਿਲਾਂ ਮਾਰ ਨੀ ਮਾਏ,
ਬਣਿਆ ਧੀ ਤੋਂ ਕੁੱਲ ਸੰਸਾਰ ਨੀ ਮਾਏ ।
No comments:
Post a Comment