ਰਾਜਿੰਦਰਜੀਤ - ਗ਼ਜ਼ਲ

ਦੋਸਤੋ! ਰਾਜਿੰਦਰਜੀਤ ਜੀ ਦੀ ਇਹ ਗ਼ਜ਼ਲ ਉਹਨਾਂ ਗ਼ਜ਼ਲਾਂ 'ਚੋਂ ਹੈ, ਜਿਸਨੂੰ ਮੈਂ ਵਾਰ-ਵਾਰ ਪੜ੍ਹਿਆ ਹੈ ਤੇ ਹਰ ਵਾਰ ਮਾਣਿਆ ਹੈ। ਉਹਨਾਂ ਦੀ ਇਹ ਕਿਤਾਬ 'ਸਾਵੇ ਅਕਸ' ਮੈਂ ਖ਼ੁਦ ਚਾਰ ਵਾਰ ਪੜ੍ਹ ਚੁੱਕੀ ਹਾਂ, ਅਤੇ ਕਈ ਗ਼ਜ਼ਲਾਂ ਅਨੇਕਾਂ ਵਾਰ। ਇਹ ਰਾਜਿੰਦਰਜੀਤ ਦੀ ਖ਼ੂਬਸੂਰਤ ਸ਼ਾਇਰੀ ਤੇ ਗ਼ਜ਼ਲਗੋਈ ਦੇ ਖੇਤਰ 'ਚ ਕੀਤੀ ਮਿਹਨਤ ਦੀ ਪ੍ਰਾਪਤੀ ਹੈ। ਸੋਚਿਆ ਅੱਜ ਕਿਉਂ ਨਾ ਤੁਹਾਡੇ ਸਭ ਨਾਲ਼ ਇਹ ਖ਼ੂਬਸੂਰਤ ਗ਼ਜ਼ਲ ਸਾਂਝੀ ਕੀਤੀ ਜਾਵੇ! ਆਸ ਹੈ ਕਿ ਗ਼ਜ਼ਲ ਵਿਚਲੇ ਖ਼ਿਆਲ ਰੂਹ ਦੀ ਸਾਰੰਗੀ ਦੇ ਰਾਗ 'ਤੇ ਜ਼ਰੂਰ ਹਾਵੀ ਹੋ ਜਾਣਗੇ। ਰਾਜਿੰਦਰਜੀਤ ਨੂੰ ਇੱਕ ਵਾਰ ਫੇਰ ਮੁਬਾਰਕਾਂ!

ਗ਼ਜ਼ਲ

ਹਰੇਕ ਪਲ ਨੂੰ ਮੈਂ ਗਿਣ ਰਿਹਾ ਹਾਂ,

ਉਡੀਕ ਤੇਰੀ ਹਿਸਾਬ ਮੇਰਾ।

ਨਵਾਜ਼ ਮੈਨੂੰ ਤੂੰ ਆ ਕੇ ਜਲਦੀ,

ਹੈ ਤੇਰੀ ਆਮਦ ਖ਼ਿਤਾਬ ਮੇਰਾ।

----

ਨਾ ਦਿਨ ਚੜ੍ਹੇ ਦੀ ਨਾ ਦਿਨ ਲਹੇ ਦੀ,

ਨਾ ਕੁਝ ਸੁਣੇ ਦੀ ਨਾ ਕੁਝ ਕਹੇ ਦੀ,

ਹਮੇਸ਼ ਰਹਿੰਦੇ ਨੇ ਹੋ ਕੇ ਇਕਮਿਕ,

ਖ਼ਿਆਲ ਤੇਰਾ ਤੇ ਖ਼ਾਬ ਮੇਰਾ।

----

ਸਜੀਵ ਯਾਦਾਂ, ਸਜੀਵ ਕਿੱਸੇ,

ਜੋ ਆਏ ਅਕਸਰ ਹੀ ਸਾਡੇ ਹਿੱਸੇ,

ਅਸੀਮ ਚੇਤੇ ‘ਚ ਹੁਣ ਵੀ ਮਹਿਕਣ

ਕਿਤਾਬ ਤੇਰੀ ਗੁਲਾਬ ਮੇਰਾ।

----

ਜੇ ਤੇਰਾ ਸ਼ੰਕਾ ਹੈ ਬੇਵਫ਼ਾਈ,

ਤਾਂ ਮੇਰਾ ਡੰਕਾ ਇਮਾਨਦਾਰੀ,

ਜੇ ਫੇਰ ਵੀ ਤੂੰ ਨਿਚੋੜ ਚਾਹਵੇਂ,

ਸਵਾਲ ਤੇਰਾ ਜਵਾਬ ਮੇਰਾ।

----

ਆ ਇੱਕੋ ਪਿੰਡੇ ‘ਤੇ ਝੱਲ ਲਈਏ,

ਜੋ ਪੀੜ ਤੇਰੀ ਸੋ ਪੀੜ ਮੇਰੀ,

ਆ ਇਕੋ ਨੇਤਰ ‘ਚੋਂ ਦੇਖ ਲਈਏ,

ਜੋ ਖ਼ਾਬ ਤੇਰਾ ਸੋ ਖ਼ਾਬ ਮੇਰਾ।

----

ਵਜੂਦ ਅਪਣੇ ਨੂੰ ਵੰਡਣੇ ਲਈ,

ਨਾ ਤੂੰ ਸੀ ਰਾਜ਼ੀ ਨਾ ਮੈਂ ਸੀ ਰਾਜ਼ੀ,

ਨਾ ਤੂੰ ਕਿਹਾ ਸੀ ਨਾ ਮੈਂ ਕਿਹਾ ਸੀ,

ਬਿਆਸ ਤੇਰਾ ਚਨਾਬ ਮੇਰਾ।