ਗੀਤਮਿੱਠੀ ਮਿੱਠੀ ਪੀੜ ਕਿਹੀ ਦਿੱਤੀ ਏ ਵੇ ਮਹਿਰਮਾ!
ਮਿੱਠੀ ਮਿੱਠੀ ਜਿੰਦ ਗਈ ਹੋ।
----
ਨਿੱਕੀ ਨਿੱਕੀ ਨੀਝ ਤੇਰਾ ਮੁੱਖੜਾ ਨਿਹਾਰਿਆ,
ਸੁੱਚੀ ਸੁੱਚੀ ਜਗੀ ਨੈਣੀਂ ਲੋਅ।
----
ਭਿੰਨੀ ਭਿੰਨੀ ਉੱਠੀ ਮੇਰੇ ਲੂੰਆਂ ‘ਚੋਂ ਸੁਗੰਧੜੀ,
ਨਿੱਕੀ ਨਿੱਕੀ ਦਿੱਤੀ ਕਿਹੀ ਛੋਹ।
----
ਭੋਰਾ ਭੋਰਾ ਜਿੰਦ ਅਸਾਂ ਮੁੱਲ ‘ਚ ਚੁਕਾਈ ਵੇ,
ਲੀਤਾ ਈ ਵਿਹਾਜ ਤੇਰਾ ਮੋਹ।
----
ਕੂਲ਼ਾ ਕੂਲ਼ਾ ਬੂਟਾ ਤੇਰੀ ਯਾਦ ਦਾ ਵੇ ਪਾਲ਼ਿਆ,
ਕੂਲ਼ਾ ਕੂਲ਼ਾ ਨੀਰ ਨੈਣੋਂ ਚੋ।
----
ਖੀਵੀ ਖੀਵੀ ਹੋਵੇ ਪਈ ਰੂਹ ਦੀ ਮੁਟਿਆਰ ਨੇ,
ਆਵੇ ਜਦੋਂ ਤੇਰੀ ਕਣਸੋਅ।
----
ਦੇਵੀਂ ਦੇਵੀਂ ਇੱਕੋ ਹੀ ਸੁਆਂਤ ਬੂੰਦ ਬੂੰਦ ਦੀ,
ਸਿੱਕਦੇ ਪਪੀਹੇ ਨੈਣ ਦੋ।
----
ਨੇੜੇ ਨੇੜੇ ਜਿੰਦੜੀ ਦੇ ਰਹੇਂ ਵੇ ਤੂੰ ਹਾਣੀਆਂ!
ਸਾਹਵਾਂ ਵਿੱਚ ਲਵਾਂ ਮੈਂ ਪਰੋ।
----
ਤਿੱਖੀ ਤਿੱਖੀ ਨਿਗ੍ਹਾ ਏਸ ਜੱਗ ਦੀ ਵੇ ਵੈਰੀਆ,
ਭੈੜੇ ਭੈੜੇ ਏਸ ਦੇ ਧਰੋਹ।
----
ਸੌੜਾ ਸੌੜਾ ਸਾਡਾ ਏਹੋ ਸੜਨਾ ਸਮਾਜ ਵੇ,
ਦਿੰਦਾ ਈ ਪ੍ਰੀਤੀਆਂ ਨੂੰ ਕੋਹ।
----
ਪੱਕੀ ਪੱਕੀ ਸਾਡੀ ਤਾਂ ਪਿਆਰ ਵਾਲ਼ੀ ਤੰਦ ਵੇ,
ਤੋੜ ਨਾ ਸਕੇਗਾ ਇਹਨੂੰ ਕੋ।
----
ਮਿੱਠੀ ਮਿੱਠੀ ਪੀੜ ਕਿਹੀ ਦਿੱਤੀ ਏ ਵੇ ਮਹਿਰਮਾ!
ਮਿੱਠੀ ਮਿੱਠੀ ਜਿੰਦ ਗਈ ਹੋ।
2 comments:
Very nice song.
ਨਿੱਕੀ ਨਿੱਕੀ ਨੀਝ ਤੇਰਾ ਮੁੱਖੜਾ ਨਿਹਾਰਿਆ,
ਸੁੱਚੀ ਸੁੱਚੀ ਜਗੀ ਨੈਣੀਂ ਲੋਅ।
ਭਿੰਨੀ ਭਿੰਨੀ ਉੱਠੀ ਮੇਰੇ ਲੂੰਆਂ ‘ਚੋਂ ਸੁਗੰਧੜੀ,
ਨਿੱਕੀ ਨਿੱਕੀ ਦਿੱਤੀ ਕਿਹੀ ਛੋਹ।
ਕੂਲ਼ਾ ਕੂਲ਼ਾ ਬੂਟਾ ਤੇਰੀ ਯਾਦ ਦਾ ਵੇ ਪਾਲ਼ਿਆ,
ਕੂਲ਼ਾ ਕੂਲ਼ਾ ਨੀਰ ਨੈਣੋਂ ਚੋ।
केसर सिंह नीर जी का बहुत सुन्दर गीत है। पढ़ते हुए इतना आनंद आया है तो गाते हुए को सुनकर तो कितना आनंद आएगा, इसका अंदाजा स्वयं ही लग जाता है।
Post a Comment