ਗ਼ਜ਼ਲਭੇਤ ਵਿਚੋਂ ਭੇਤ ਕੋਈ ਟੋਲ਼ਦਾ ਫਿਰਦਾ ਹਾਂ ਮੈਂ।
ਇੰਝ ਛਾਤੀ ਤਾਰਿਆਂ ਦੀ ਫੋਲ਼ਦਾ ਫਿਰਦਾ ਹਾਂ ਮੈਂ।
-----
ਮੈਂ ਖ਼ੁਦਾ ਹਾਂ, ਮੈਂ ਖ਼ੁਦਾ ਹਾਂ, ਬੋਲਦਾ ਫਿਰਦਾ ਹਾਂ ਮੈਂ।
ਕੁਦਰਤਾਂ ਦੇ ਭੇਤ ਸੈਆਂ ਖੋਲ੍ਹਦਾ ਫਿਰਦਾ ਹਾਂ ਮੈਂ।
-----
ਜਾਗ ਕੇ ਰਾਤਾਂ ਨੂੰ ਰਿੜਕਾਂ ਚਾਨਣੀ ਦੇ ਦੁੱਧ ਨੂੰ,
ਇੰਝ ਮੋਤੀ ਸੋਚ ਵਾਲ਼ੇ ਰੋਲ਼ਦਾ ਫਿਰਦਾ ਹਾਂ ਮੈਂ।
-----
ਮੈਂ ਬੜਾ ਆਕਲ, ਬਹਾਦਰ, ਸੂਰਮਾ, ਗੁਣਵਾਨ ਹਾਂ,
ਫੇਰ ਵੀ ਜੀਵਨ ‘ਚ ਥਾਂ, ਥਾਂ ਡੋਲਦਾ ਫਿਰਦਾ ਹਾਂ ਮੈਂ।
-----
ਚੰਦ ਉੱਤੇ ਅੱਪੜ ਕੇ ਵੀ ਚਾਹ ਮਿਰੀ ਹਾਰੀ ਨਹੀਂ,
ਹੋਰ ਉੱਚਾ ਜਾਣ ਨੂੰ ਪਰ ਤੋਲਦਾ ਫਿਰਦਾ ਹਾਂ ਮੈਂ।
-----
ਜੱਗ ਨੂੰ ਉਪਦੇਸ਼ ਦੇਵਾਂ, ਸ਼ਾਂਤੀ ਤੇ ਪਿਆਰ ਦਾ,
ਆਪ ਕਾਂਜੀ ਨਫ਼ਰਤਾਂ ਦੀ ਘੋਲ਼ਦਾ ਫਿਰਦਾ ਹਾਂ ਮੈਂ।
-----
ਜ਼ਿੰਦਗੀ ਵਿਚ ਸ਼ਾਇਰੀ ਦੀ ਦਾਤ ਤਾਂ ਹੈ ਮਿਲ਼ ਗਈ,
ਰੱਬ ਜਾਣੇ! ਹੋਰ ਕੀ ਸ਼ੈ ਟੋਲ਼ਦਾ ਫਿਰਦਾ ਹਾਂ ਮੈਂ।
No comments:
Post a Comment