ਮੌਸਮ

ਆਰਸੀ ਤੇ ਨਵੀਆਂ ਰਚਨਾਵਾਂ

ਦੋਸਤੋ! ਜਿਵੇਂ ਕਿ ਤੁਸੀਂ ਜਾਣਦੇ ਹੀ ਹੋ ਕਿ ਆਰਸੀ ਨੂੰ Facebook ਅਤੇ Twitter ਨਾਲ਼ ਵੀ ਜੋੜ ਦਿੱਤਾ ਗਿਆ ਹੈ। ਜੇਕਰ ਤੁਹਾਡੇ ਕੋਲ਼ ਇਹਨਾਂ ਸਾਈਟਾਂ ਤੇ ਅਕਾਊਂਟ ਹਨ, ਤਾਂ ਤੁਸੀਂ ਆਰਸੀ ਬਲੌਗ ਨੂੰ ਓਥੋਂ ਵੀ join ਅਤੇ follow ਕਰ ਸਕਦੇ ਹੋ। ਲਿੰਕ ਹੇਠਾਂ ਦਿੱਤੇ ਜਾ ਰਹੇ ਹਨ। ਹੁਣ ਤੱਕ ਤੁਹਾਡੇ ਦਿੱਤੇ ਹਰ ਸਹਿਯੋਗ ਲਈ ਮਸ਼ਕੂਰ ਹਾਂ।
ਅਦਬ ਸਹਿਤ
ਤਨਦੀਪ ਤਮੰਨਾ



Monday, February 1, 2010

ਬਖ਼ਤਾਵਰ ਸਿੰਘ ਦਿਓਲ - ਨਜ਼ਮ

ਅਲਿਖੀ ਗਾਥਾ

ਨਜ਼ਮ

ਮੇਰਾ ਕੋਈ ਕਾਦਰਯਾਰ ਨਹੀਂ

ਮੈਂ ਤੇ ਆਪੇ ਹੀ ਪੂਰਨ ਹਾਂ

ਆਪੇ ਹੀ ਭਗਤ ਹਾਂ।

.............

ਲੂਣਾ ਨੇ ਸੱਦਿਆ ਸੀ, ਮੈਂ ਗਿਆ ਨਹੀਂ

ਇਹ ਜਾਣਦਿਆਂ ਵੀ, ਕਿ

ਲੂਣਾ ਦੇ ਪਾਸ ਜਾਏ ਬਿਨਾ ਕ੍ਰਿਸ਼ਮਾ ਨਹੀਂ ਹੋਣਾ

ਚਲਿਆ ਜਾਂਦਾ ਤਾਂ ਕ੍ਰਿਸ਼ਮਾ ਹੋ ਜਾਣਾ ਸੀ।

................

ਗੌਣ ਸੁਣਨ ਦੇ ਸ਼ੁਕੀਨਾਂ ਨੇ

ਮੇਰੇ ਬੁੱਲ੍ਹਾਂ ਨੂੰ ਬਾਂਸਰੀ ਲਾ ਦਿੱਤੀ

ਆਪੇ ਹੀ ਵਜਾ ਰਿਹਾ ,ਤੇ

ਆਪੇ ਹੀ ਸੁਣ ਰਿਹਾ ਹਾਂ।

.................

ਲੰਘਣ ਲੱਗੇ ਇਕ ਮੁਸਕਾਨ

ਜ਼ਰੂਰ ਦੇ ਜਾਣਾ।

ਤ੍ਰਿਸਕਾਰ ਦੀ ਨਦੀ ਪਾਰ ਕਰਦੇ ਸਮੇਂ

ਓਥੇ ਹੀ ਛੱਡ ਆਉਣਾ।

............

ਆਪਾਂ ਕਦੇ ਵੀ ਨਾ ਮਿਲਣ ਦਾ

ਨਾ ਵਿਛੜਨ ਦਾ, ਕੋਈ ਵੀ ਇਕਰਾਰ ਨਹੀਂ ਕੀਤਾ।

ਫਿਰ ਪਾਬੰਦ ਕਰਦੇ ਹਾਂ?

................

ਨਦੀ ਨੇ ਸਾਨੂੰ ਕੀ ਡੋਬਣਾ ਸੀ

ਸਾਨੂੰ ਤਰਨਾ ਹੀ ਨਹੀਂ ਆਇਆ।

ਤਰ ਸਕਦੇ ਤਾਂ ਆਪਾਂ ਵੀ

ਪਾਰਲੇ ਕਿਨਾਰੇ ਹੁੰਦੇ

ਤੇ ਸਾਡਾ ਵੀ ਕੋਈ ਕਾਦਰਯਾਰ ਹੁੰਦਾ

ਜੋ ਸਾਡੀ ਗਾਥਾ ਲਿਖਦਾ।

No comments: