ਗ਼ਜ਼ਲ ਜਜ਼ਬਿਆਂ ਦੇ ਰਕਸ ਦਾ ਇੱਕ ਕਾਫ਼ਲਾ ਹੈ ਜ਼ਿੰਦਗੀ।
ਆਦਮੀ ਦਾ ਆਦਮੀ ਨਾ’ ਰਾਬਤਾ ਹੈ ਜ਼ਿੰਦਗੀ।
------
ਤੁਰ ਪਏ ਖ਼ਾਬਾਂ ਮਗਰ, ਘਰ ਦੇ ਰਹੇ ਨਾ ਘਾਟ ਦੇ,
ਇਸ ਤਰ੍ਹਾਂ ਦਾ ਖ਼ੂਬਸੂਰਤ ਹਾਦਸਾ ਹੈ ਜ਼ਿੰਦਗੀ।
-----
ਦਿਨ ਜਿਹੀ ਹੈ ਰਾਤ ਕਿਧਰੇ, ਰਾਤ ਵਰਗਾ ਦਿਨ ਕਿਤੇ,
ਰੌਸ਼ਨੀ ਤੇ ਨ੍ਹੇਰ ਵਿਚਲਾ ਫਾਸਲਾ ਹੈ ਜ਼ਿੰਦਗੀ।
-----
ਉੜਦਿਆਂ ਤੇ ਡਿਗਦਿਆਂ ਪੈਂਦਾ ਹੈ ਕਰਨਾ ਇਹ ਸਫ਼ਰ,
ਤੁਰਨ ਤੋਂ ਪਰਵਾਜ਼ ਤੱਕ ਦਾ ਸਿਲਸਿਲਾ ਹੈ ਜ਼ਿੰਦਗੀ।
-----
ਹਰ ਫਸਾਨਾ ਜੱਗ ਵਿੱਚ ਕਲਮਾਂ ਸਹਾਰੇ ਕਾਇਮ ਹੈ,
ਹਰਫ਼ ਦੀ ਜਾਦੂਗਰੀ ਦਾ ਫਲਸਫਾ ਹੈ ਜ਼ਿੰਦਗੀ।
-----
ਜਾਪਦਾ ਫਸਿਆ ਜਿਹਾ, ਜਿਉਂ ਉੜਨ ਜੋਗਾ ਵੀ ਨਹੀਂ,
ਰਿਸ਼ਤਿਆਂ ਦੇ ਜਾਲ਼ ਦਾ ਇੱਕ ਪਿੰਜਰਾ ਹੈ ਜ਼ਿੰਦਗੀ।
No comments:
Post a Comment